ចំណាត់ថ្នាក់ AAA៖ យុទ្ធសាស្រ្ត "កាំបិតចិតដងឯង” របស់លោកសាកូហ្ស៊ី
ការបាត់ចំណាត់ថ្នាក់បំណុល AAA នៅតែ ១០០ថ្ងៃ មុនការបោះឆ្នោតប្រធានាធិបតី កំពុងតែធ្វើឲ្យឱកាសជាប់ឆ្នោតអាណត្តិថ្មីរបស់លោកនីកូឡា សាកូហ្ស៊ី មានកាន់តែតិចទៅៗ។ លោកសាកូហ្ស៊ី ដែលបានយកចំណាត់ថ្នាក់បំណុលធ្វើជាយុទ្ធសាស្រ្តសំខាន់ ក្នុងការរកសំឡេងគាំទ្រពីប្រជាជន កំពុងតែរងគ្រោះដោយយុទ្ធសាស្រ្តរបស់ខ្លួនឯង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៤:៣៧
បើគេក្រឡេកមើលទៅមួយឆ្នាំមុន ប្រជាជនបារាំងមិនសូវជាយកចិត្តទុកដាក់លើចំណាត់ថ្នាក់បំណុល AAA ប៉ុន្មាននោះទេ។ បច្ចុប្បន្ន ចំណាត់ថ្នាក់បំណុលបានក្លាយជាសំណុំរឿងសំខាន់ គឺជាលទ្ធផលនៃយុទ្ធសាស្រ្តរបស់លោកនីកូឡា សាកូហ្ស៊ីខ្លួនឯង។
អស់រយៈពេលជាច្រើនខែកន្លងមកហើយ ដែលលោកនីកូឡា សាកូហ្ស៊ី និងមន្រ្តីរដ្ឋាភិបាលបារាំង តែងតែលើកយកចំណាត់ថ្នាក់បំណុល AAA មកធ្វើជាសំណុំរឿងសំខាន់។ លោកសាកូហ្ស៊ីបានចេញមុខតាំងខ្លួនជាអ្នកការពារចំណាត់ថ្នាក់នេះ ព្រោះការបាត់បង់ចំណាត់ AAA នេះ នឹងធ្វើឲ្យបារាំងត្រូវបង់ការប្រាក់ខ្ពស់ ដើម្បីខ្ចីលុយពីទីផ្សារមូលបត្រ។
ដើម្បីជំរុញការធ្វើកំណែទម្រង់មួយចំនួន ដែលប្រជាជនមិនសូវគាំទ្រ ដូចជា ការដំឡើងអាយុចូលនិវត្តន៍ ការកាត់បន្ថយមុខចំណាយសាធារណៈ ការកាត់បន្ថយបុគ្គលិករដ្ឋ និងការដំឡើងពន្ធដារ ជាដើម លោកសាកូហ្ស៊ីតែងតែលើកឡើងថា កំណែទម្រង់ទាំងនេះ គឺជារឿងចាំបាច់ ដើម្បីកាត់បន្ថយបំណុលរបស់បារាំង ចៀសវាងកុំឲ្យបារាំងបាត់បង់ចំណាត់ថ្នាក់ AAA។
ការការពារចំណាត់ថ្នាក់ AAA នេះ ក៏ជាយុទ្ធសាស្រ្តមួយដ៏សំខាន់ដែររបស់លោកសាកូហ្ស៊ី ក្នុងការប្រជែងជាមួយបេក្ខជនបក្សប្រឆាំង ក្នុងការបោះឆ្នោតប្រធានាធិបតី ដែលនឹងរៀបចំធ្វើនៅថ្ងៃទី២២ មេសា និងថ្ងៃទី៦ ឧសភា ខាងមុខ។
លោកសាកូហ្ស៊ីបានខិតខំព្យាយាមទាញអារម្មណ៍របស់ពលរដ្ឋបារាំងឲ្យផ្តោតលើចំណាត់ថ្នាក់ AAA នេះ ដើម្បីបង្ហាញថា នៅក្នុងពេលដែលប្រទេសកំពុងប្រឈមមុខនឹងវិបត្តិ មានតែលោកទេ ដែលមានបទពិសោធន៍ និងមានសមត្ថភាព ដើម្បីដឹកនាំបារាំងឲ្យឆ្លងផុតពីវិបត្តិនេះ។ លោកហ្វ្រង់ស័រ អូឡង់ (François Holland) ដែលជាបេក្ខជនមកពីគណបក្សសង្គមនិយម (Parti Socialiste) ហើយដែលកំពុងមានប្រជាប្រិយភាពនាំមុខគេនោះ មិនដែលទាំងធ្វើជារដ្ឋមន្រ្តីម្តងផង ប្រាកដជាមិនមានបទពិសោធន៍ ដើម្បីដោះស្រាយវិបត្តិបំណុលនេះបានទេ។
ប៉ុន្តែ ទីបំផុត នៅសល់តែ ១០០ថ្ងៃ មុនដល់ពេលបោះឆ្នោត ចំណាត់ថ្នាក់ AAA ក៏ត្រូវរបូតពីដៃ។ គណបក្សប្រឆាំងបាននាំគ្នារិះគន់ថា ការណ៍ដែលបារាំងត្រូវគេទម្លាក់ចំណាត់ថ្នាក់បំណុលនេះ គឺជាបរាជ័យនៃនយោបាយរបស់លោកសាកូហ្ស៊ី ក្នុងរយៈពេល ៥ឆ្នាំកន្លងទៅនេះ។ ឱកាសជាប់ឆ្នោតជាថ្មីរបស់លោកសាកូហ្ស៊ី ដែលកំពុងតែមានប្រជាប្រិយភាពធ្លាក់ដុនដាបស្រាប់នោះ កាន់តែមានតិចទៅៗ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ