អឺរ៉ូ

ទីភ្នាក់ងារ Standard & Poor’s ទម្លាក់ចំណាត់ថ្នាក់បំណុលប្រទេស៩ ក្នុងតំបន់អឺរ៉ូ

កាលពីថ្ងៃសុក្រ ១៣មករានេះ ទីភ្នាក់ងារ Standard & Poor’s បានសម្រេចទម្លាក់ចំណាត់ថ្នាក់បំណុលរបស់ប្រទេសចំនួន ៩ នៅក្នុងតំបន់ចាយលុយអឺរ៉ូ ក្នុងនោះ ក៏មានប្រទេសបារាំង និងប្រទេសអូទ្រីសផងដែរ ដែលជាប្រទេសធ្លាប់មានចំណាត់ថ្នាក់ខ្ពស់ផុតលេខ (AAA)។ ការសម្រេចរបស់ Standard & Poor's នេះ បានទទួលនូវការរិះគន់យ៉ាងខ្លាំង ពីសំណាក់មន្រ្តីជាន់ខ្ពស់សហភាពអឺរ៉ុប។

ចុះផ្សាយនៅថ្ងៃ៖ 14/01/2012 - 15:50

ដោយ៖ សេង ឌីណា

ផ្សាយពាណិជ្ជកម្ម

ក្នុងចំណោមប្រទេសទាំង ៩ ក្នុងតំបន់ចាយលុយអឺរ៉ូ ប្រទេសអ៊ីតាលី អេស្ប៉ាញ ព័រទុយហ្កាល់ និងស្ហ៊ីប (Chypre) ត្រូវគេទម្លាក់ចំណាត់ថ្នាក់រហូតដល់ទៅពីរកាំ។ បារាំង និងអូទ្រីស ដែលធ្លាប់តែមានចំណាត់ថ្នាក់ AAA (ខ្ពស់ជាងគេបំផុត) ត្រូវធ្លាក់មួយកាំ មកនៅត្រឹម AA+។ ស្លូវ៉ាគី ស្លូវេនី និងម៉ាល់ត៍ ក៏ត្រូវធ្លាក់ចំណាត់ថ្នាក់មួយកាំដែរ។ អាល្លឺម៉ង់ ហ្វាំងឡង់ ហុល្លង់ និងលុចសំ រក្សាចំណាត់ថ្នាក់ AAA របស់ខ្លួនដដែល។

ស្នងការអឺរ៉ុបទទួលបន្ទុកកិច្ចការសេដ្ឋកិច្ច (លោក Olli Rehn) បានរិះគន់ថា ការសម្រេចរបស់ Standard & Poor’s មិនស៊ីចង្វាក់នឹងស្ថានភាពជាក់ស្តែង ក្នុងតំបន់អឺរ៉ូ ដែលមេដឹកនាំកំពុងចាត់វិធានការសំខាន់ៗ ដើម្បីដោះស្រាយវិបត្តិប្រាក់បំណុល។

ទីភ្នាក់ងារ Standard & Por’s បានចេញសេចក្តីថ្លែងការណ៍ពន្យល់ថា ការសម្រេចទម្លាក់ចំណាត់ថ្នាក់បំណុលប្រទេសក្នុងតំបន់អឺរ៉ូ គឺធ្វើឡើង ព្រោះ Standard & Poor’s វាយតម្លៃថា នយោបាយដាក់ចេញដោយតំបន់អឺរ៉ូ ក្នុងរយៈពេលប៉ុន្មានសប្តាហ៍ចុងក្រោយនេះ មិនគ្រប់គ្រាន់ ក្នុងការដោះស្រាយវិបត្តិបំណុល។

ម្យ៉ាងវិញទៀត Standard & Poor’s យល់ថា ការណ៍ដែលតំបន់អឺរ៉ូ ផ្តោតតែលើវិធានការកាត់បន្ថយការចំណាយសាធារណៈ ដើម្បីកាត់បន្ថយបំណុល អាចនឹងធ្វើឲ្យវិបត្តិកាន់តែមានសភាពធ្ងន់ធ្ងរថែមទៀត។ ការកាត់បន្ថយការចំណាយអាចនឹងធ្វើឲ្យតម្រូវការទីផ្សារក្នុងស្រុកធ្លាក់ចុះ ដែលជាហេតុបណ្តាលឲ្យប៉ះពាល់ដល់កំណើនសេដ្ឋកិច្ច និងចំណូលពន្ធដារ។

នៅបារាំង ដែលនៅសល់តែជាង ៣ខែទៀត ដល់ពេលបោះឆ្នោតប្រធានាធិបតី ដំណឹងស្តីពីការធ្លាក់ចំណាត់ថ្នាក់បំណុលកំពុងតែបង្កឲ្យមានការរំជើបរំជួលយ៉ាងខ្លាំង។ គណបក្សប្រឆាំងបានឆ្លៀតពេលនេះ រិះគន់ថា ការណ៍ដែលបារាំងបាត់បង់ចំណាត់ថ្នាក់ AAA គឺបង្ហាញអំពីបរាជ័យនៃនយោបាយសេដ្ឋកិច្ចរបស់លោកសាកូហ្ស៊ី។

នាយករដ្ឋមន្រ្តី និងរដ្ឋមន្រ្តីក្រសួងសេដ្ឋកិច្ចបារាំងបានព្យាយាមរំងាប់ក្តីបារម្ភរបស់ប្រជាជន ដោយលើកឡើងថា ថ្វីដ្បិតតែការបាត់បង់ចំណាត់ថ្នាក់ AAA មិនមែនជាដំណឹងល្អ ប៉ុន្តែ វាក៏មិនធ្ងន់ធ្ងរដោះស្រាយមិនរួចនោះដែរ។ ម្យ៉ាងទៀត ការធ្លាក់មកនៅចំណាត់ថ្នាក់ AA+ ក៏នៅតែជាចំណាត់ថ្នាក់មួយល្អដែរ។

សំណួរដែលចោទនៅពេលនេះ គឺថា ការណ៍ដែលបារាំងបាត់បង់ចំណាត់ថ្នាក់ AAA នឹងជះផលវិបាកអ្វីខ្លះ? ចំណាត់ថ្នាក់បំណុលរដ្ឋមួយ គឺជារង្វាស់នៃហានិភ័យបំណុលរបស់រដ្ឋនោះ។ ជាទូទៅ ការធ្លាក់ចំណាត់ថ្នាក់បំណុល អាចនឹងបណ្តាលឲ្យអត្រាការប្រាក់បំណុលរបស់រដ្ឋត្រូវកើនឡើង។

ក៏ប៉ុន្តែ នៅបារាំង គេសង្កេតឃើញថា អត្រាការប្រាក់បំណុលរដ្ឋបានកើនឡើង តាំងពីមុនពេលបារាំងធ្លាក់ចំណាត់ថ្នាក់បំណុលម៉្លេះ ដោយសារតែអ្នកវិនិយោគមើលឃើញអំពីស្ថានភាពសេដ្ឋកិច្ច និងហិរញ្ញវត្ថុរបស់បារាំង និងការជាប់ពាក់ព័ន្ធក្នុងវិបត្តិបំណុលនៅក្នុងតំបន់អឺរ៉ូ។ ម្យ៉ាងវិញទៀត ទីភ្នាក់ងារវាយតម្លៃហានិភ័យបំណុលក៏ធ្លាប់បានប្រកាសព្រមានជាច្រើនដងរួចមកហើយដែរ អំពីការទម្លាក់ចំណាត់ថ្នាក់បំណុលបារាំង។

បើធៀបនឹងប្រទេសអាល្លឺម៉ង់ ដែលមានចំណាត់ថ្នាក់ AAA ដូចគ្នា អត្រាការប្រាក់បំណុលរបស់បារាំងខ្ពស់ជាងអាល្លឺម៉ង់រហូតដល់ទៅជាង ១%។ អត្រាការប្រាក់បំណុលរយៈពេលវែងរបស់អាល្លឺម៉ង់ មានត្រឹមតែ ១,៨% ចំណែកបារាំងវិញ មានរហូតដល់ទៅ ៣%។ នេះបញ្ជាក់ថា នៅក្នុងទីផ្សារមូលបត្រ អ្នកវិនិយោគហាក់ដូចជាលែងរាប់បារាំងជាប្រទេសជាប់ចំណាត់ថ្នាក់ AAA តាំងពីមុនសេចក្តីសម្រេចរបស់ Standard & Poor’s ម៉្លេះ។

ដូច្នេះ ការប្រកាសរបស់ Standard & Poor’s ទំនងជានឹងមិនបណ្តាលឲ្យអត្រាការប្រាក់បំណុលរដ្ឋបារាំងកើនឡើងខ្ពស់ហួសពីកម្រិតបច្ចុប្បន្ននេះខ្លាំងប៉ុន្មានទេ។ ទោះជាយ៉ាងណា គេត្រូវរង់ចាំមើលពីរ-បីសប្តាហ៍ ឬពីរ-បីខែទៀត ទើបអាចមើលឃើញច្បាស់ថា តើអត្រាការប្រាក់បំណុលបារាំងនឹងកើនឡើងដល់កម្រិតណា?