ផ្ទុះវិបត្តិការទូតក្នុងក្រុមប្រឹក្សាតំបន់ឈូងសមុទ្រពែរស៍ ដោយសារភាពមិនចុះសម្រុងជាមួយកាតា
នៅថ្ងៃពុធនេះ រដ្ឋាភិបាលកាតាបានសំដែងការសោកស្តាយដោយសារប្រទេសជិតខាងខ្លួនចំនួន៣ គឺអារ៉ាប៊ី សាអូឌីត អេមីរ៉ាតអារ៉ាប់រួម និងបារ៉ែនបានដកឯកអគ្គរាជទូតខ្លួនចេញពីក្រុងដូហា ប្រទេសកាតា។ ប្រទេសទាំង៣បានបន្ទោសប្រទេសកាតាថា បានលូកដៃចូលក្នុងកិច្ចការផ្ទៃក្នុងខ្លួន និងបានគាំទ្រចលនាអ៊ីស្លាមក្នុងតំបន់ បែបយ៉ាងក្រុមភាតរអ៊ីស្លាមអេហ្ស៊ីប។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
ការដែលប្រទេសអារ៉ាប៊ីសាអូឌីត អេមីរ៉ាតអារ៉ាប់រួម និងបារ៉ែនសម្រេចដកឯកអគ្គរាជទូតខ្លួនចេញពីក្រុងដូហា ប្រទេសកាតានោះ គឺដើម្បីដាក់សម្ពាធដល់រដ្ឋាភិបាលកាតា។ ប្រទេសទាំង៣ ចោទថា កាតាបានលូកដៃចូលក្នុងកិច្ចការផ្ទៃក្នុងប្រទេសទាំង៣ និងបានគាំទ្រចលនាអ៊ីស្លាមក្នុងតំបន់ បែបយ៉ាងក្រុមភាតរអ៊ីស្លាមនៅអេហ្ស៊ីប។
នៅថ្ងៃពុធនេះ ប្រទេសកាតាបានសំដែងការសោកស្តាយ ចំពោះសេចក្តីសម្រេចដកតំណាងការទូតរបស់ប្រទេសទាំង៣នេះ ហើយបានប្រាប់ថា ខ្លួនមិនចាត់វិធានការ ដកតំណាងទូតចេញពីប្រទេសទាំង៣នេះទេ។ គួររំលឹកថា កាតា អារ៉ាប៊ីសាអូឌីត អេមីរ៉ាតអារ៉ាប់រួម និងបារ៉ែន ស្ថិតក្នុងក្រុមប្រឹក្សាសហប្រតិបត្តិការតំបន់ឈូងសមុទ្រពែរស៍ ដែលបានបង្កើតឡើង ក្នុងឆ្នាំ១៩៨១។
នេះជាលើកទី១ហើយ ដែលក្រុមប្រឹក្សានេះជួបវិបត្តិការទូតគួរអោយកត់សម្គាល់បែបនេះ។ អារ៉ាប៊ីសាអូឌីត អេមីរ៉ាតអារ៉ាប់រួម និងបារ៉ែន ចោទកាតា ថាមិនបានគោរពតាមពាក្យសន្យាដែលបានធ្វើកាលពី៣ខែមុន ថាឈប់គាំទ្រចលនាអ៊ីស្លាមនៅអេហ្ស៊ីបទៀត។ ទង្វើកាតា គឺផ្ទុយពីគោលការណ៍ចែងធានាអោយមានសន្តិសុខ និងស្ថិរភាពអោយដល់បណ្តាប្រទេសសមាជិកក្រុមប្រឹក្សាសហប្រតិបត្តិការតំបន់ឈូងសមុទ្រពែរស៍។ អារ៉ាប៊ីសាអូឌីត អេមីរ៉ាតអារ៉ាប់រួម និងបារ៉ែន ចង់រុញអោយកាតានៅឯកា ដាក់សម្ពាធរដ្ឋាភិបាលកាតាអោយប្តូរជំហរនយោបាយខ្លួនក្នុងតំបន់ឡើងវិញ។
គួររំលឹកថា រដ្ឋាភិបាលកាតាគាំទ្រក្រុមភាតរអ៊ីស្លាមរបស់អតីតប្រធានាធិបតីអេហ្ស៊ីប ម៉ូហាមេដ មរស៊ី ដែលបានបាត់បង់អំណាចកាលពីខែកក្កដា ឆ្នាំ២០១៣កន្លងទៅ។ តែ អារ៉ាប៊ីសាអូឌីត អេមីរ៉ាតអារ៉ាប់រួម និងបារ៉ែន គាំទ្ររដ្ឋាភិបាលស្តីទីអេហ្ស៊ីបថ្មី ទាំងផ្នែកនយោបាយនិងហិរញ្ញវត្ថុ។ ប្រទេសទាំង៣សង្ស័យថា កាតាថាបានគាំទ្រក្រុមភាតរអ៊ីស្លាមដែលមានវត្តមានក្នុងប្រទេសទាំង៣នេះ ក្នុងនោះ មានពួកភាតរអ៊ីស្លាមជាង១០នាក់ ដែលទទួលទោសជាប់គុកនៅប្រទេសអេមីរ៉ាតអារ៉ាប់រួម។
វិបត្តិការទូតរវាងកាតានិងប្រទេសទាំង៣ បានចាប់ផ្ទុះឡើង កាលពីខែកុម្ភៈ ពេលអ្នកប្រៀនប្រដៅអ៊ីស្លាមអេហ្ស៊ីបដ៏មានឥទ្ធិពលមួយរូប គឺលោកយូសេហ្វ អាល់ការ៉ាដាវី បានចោទអេមីរ៉ាតអារ៉ាប់រួមថា ធ្វើសកម្មភាពប្រឆាំងក្រុមភាតរអ៊ីស្លាមអេហ្ស៊ីប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ