ថ្ងៃកាន់ទុក្ខលោកហ្វីដែល កាស្ត្រូ ចុងក្រោយនៅគុយបា គុយបាមិនធ្វើរូបសំណាកនិមិត្តរូបកាស្ត្រូទេ
ថ្ងៃអាទិត្យនេះ ជាថ្ងៃទី៩ និងជាថ្ងៃចុងក្រោយដែលប្រជាជនគុយបាកាន់ទុក្ខបិតាបដិវត្ត ហ្វីដែល កាស្ត្រូ។ លោកកាស្ត្រូ ទទួលមរណភាព កាលពីថ្ងៃ២៥វិច្ឆិកា ក្នុងជន្មាយុ៩០ ឆ្នាំ។ គុយបាប្រកាសមិនធ្វើរូបសំណាកអ្វី ដើម្បីជានិមិត្តរូបដល់បិតាឯករាជ្យទេ។ ធាតុរបស់លោកនឹងបញ្ចុះនៅក្រុងសាន់ចាហ្កូ ក្បែរចេតិយបិតាឯករាជ្យ ចូសេ ម៉ាទី និងវីរបុរសជាតិច្រើនរូបទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២៥
គុយបាមិនធ្វើរូបសំណាកនិមិត្តរូបដល់បិតាឯករាជ្យហ្វីដែល កាស្ត្រូ ក៏ព្រោះតែកាលពីនៅរស់ លោកហ្វីដែល កាស្ត្រូ មិនចង់មានរូបសំណាកអ្វីសម្រាប់លោក ពេលលោកស្លាប់នោះទេ។ នេះបើយោងតាមការប្រកាសរបស់លោករ៉ាអ៊ូល កាស្ត្រូ នៅថ្ងៃសៅរ៍ម្សិលមិញ។
ថ្ងៃអាទិត្យនេះ ជាថ្ងៃកាន់ទុក្ខចុងក្រោយនៅគុយបា។ ធាតុរបស់លោកនឹងត្រូវបញ្ចុះ នៅក្រុងសាន់ចាហ្កូ ជាក្រុងតំណាងបដិវត្តគុយបា។ ពិធីបុណ្យសពថ្ងៃអាទិត្យនេះ ធ្វើបែបសាមញ្ញ ជាគ្រួសារ តែក៏មានវត្តមានរបស់មេដឹកនាំបរទេសមួយចំនួនដែរ។
ម្សិលមិញនេះ លោករ៉ាអ៊ូល កាស្ត្រូ បានស្បថនៅចំពោះព្រលឹងបងប្រុសថា នឹងការពារទឹកដី និងរបបសង្គមនិយមគុយបា។ លោករ៉ាអ៊ូល បានទទួលអំណាចពីលោកហ្វីដែល កាស្ត្រូ កាលពីឆ្នាំ២០០៦ ប៉ុន្តែ ការដឹកនាំគុយបា នៅតែត្រូវស្តាប់តាមការណែនាំរបស់បងប្រុសលោកជាប្រចាំ។
ទោះយ៉ាងនេះក្តី លោករ៉ាអ៊ូល បានធ្វើកំណែទម្រង់បើកចំហរទីផ្សារបានខ្លះៗ ហើយក៏បានធ្វើអោយអន្តរជាតិចាប់អារម្មណ៍ខ្លាំងដែរ ដោយសារលោកបានខិតទំនាក់ទំនងគុយបា ទៅរកសហរដ្ឋអាមេរិកដែលជាសត្រូវរាប់ជំនាន់មកហើយនោះ។ លោករ៉ាអ៊ូល បានប្រកាសចុះចេញពីអំណាច នៅឆ្នាំ២០១៨ ប៉ុន្តែ គុយបានៅតែប្រកាន់ជំហរដើរតាមផ្លូវលោកហ្វីដែល កាស្ត្រូ។
ត្បិតថា ហ្វីដែល កាស្ត្រូគ្មានរូបចម្លាក់ រឺរូបសំំណាកអ្វីតំណាង ក្នុងប្រទេសមែន តែលោកជានិមិត្តរូបបិតាបដិវត្តពិតប្រាកដ សម្រាប់ប្រជាជនគុយបាទូទៅ។ ដោយឡែក លោកក៏មានចំណែកធ្វើអោយគុយបាក្លាយជាប្រទេសក្រីក្របំផុតមួយដែរ ក្នុងពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ