សកម្មជនគាំទ្រលោកមរស៊ី ធ្វើបាតុកម្ម មុនពេលអាជ្ញាធរប្រកាសលទ្ធផលបោះឆ្នោតប្រជាមតិលើរដ្ឋធម្មនុញ្ញ
នៅអេហ្ស៊ីប ថ្ងៃសុក្រនេះសកម្មជនគាំទ្រអតីតប្រធានាធិបតីមរស៊ី បានចុះតាមដងផ្លូវ ធ្វើបាតុកម្មសាជាថ្មី ប្រឆាំងនឹងទង្វើរដ្ឋប្រហារយោធា កាលពីដើមខែកក្កដា ឆ្នាំ២០១៣ ដែលបានទំលាក់លោកមរស៊ីពីអំណាច។ ការប៉ះទង្គិចគ្នាជាមួយប៉ូលិស បានបណ្តាលអោយស្លាប់មនុស្សម្នាក់។ សៅរ៍នេះ ជាថ្ងៃប្រកាសលទ្ធផលបោះឆ្នោតប្រជាមតិ។ ស្ថានភាពអេហ្ស៊ីប កំពុងតានតឹង ពិសេសជិតដល់ពេលប្រារព្ធខួប៣ឆ្នាំ រំលឹកថ្ងៃ២៥មករា ឆ្នាំ២០១១ ជាថ្ងៃប្រជាជនបះបោរទំលាក់អតីតប្រធានាធិបតី មូបារ៉ាក់ ពីអំណាច។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
តាមបណ្តាក្រុងជាច្រើន នៅអេហ្ស៊ីប ថ្ងៃសុក្រនេះ សកម្មជនគាំទ្រអតីតប្រធានាធិបតីម៉ូមរស៊ី បាននាំគ្នាធ្វើបាតុកម្មសាជាថ្មីម្តងទៀត ប្រឆាំងនឹងរដ្ឋប្រហារយោធាអេហ្ស៊ីប កាលពីដើមខែកក្កដា ឆ្នាំ២០១៣ ដែលបានទំលាក់លោកមរស៊ីពីអំណាច។ សកម្មជនគាំទ្រលោកមរស៊ី បានសុំអោយមានបាតុកម្មរយៈពេលមួយសប្តាហ៍ តាមបែបផែនសន្តិភាព។
នៅកំពង់ផែស៊ុយអេហ្ស ប៉ូលិសបានប្រើឧស្ម័នបង្ហូរទឹកភ្នែកបំបែកហ្វូងបាតុករ។ ការប៉ះទង្គិចរវាងបាតុករនិងប៉ូលិស បានធ្វើអោយមានមនុស្សស្លាប់។ ជាទូទៅបាតុកម្មអេហ្ស៊ីប តែងបញ្ចប់ដោយហិង្សា។ ថ្ងៃបោះឆ្នោតប្រជាមតិលើរដ្ឋធម្មនុញ្ញ កាលពីថ្ងៃអង្គារ មនុស្ស៩នាក់បានស្លាប់ក្នុងពេលដង្ហែក្បួនបាតុកម្ម។ នៅអេហ្ស៊ីប រាល់សមាជិកបក្សភាតរអ៊ីស្លាមរបស់លោកមរស៊ី ដែលត្រូវកងទ័ពបង្ក្រាបកន្លងមក ត្រូវបានចាត់ទុកជាផ្លូវការ ថាជាក្រុមភេរវជន។ ដូច្នេះ សកម្មភាពបាតុកម្មពួកគេ ត្រូវបានហាមឃាត់។ មេដឹកនាំបក្សភាតរអ៊ីស្លាម ជាច្រើនរូប អាចនឹងទទួលទោសប្រហារជីវិត ហើយអ្នកចូលរួមបាតុកម្ម អាចនឹងជាប់គុក៥ឆ្នាំ។
ថ្ងៃសៅរ៍នេះ ជាថ្ងៃប្រកាសលទ្ធផលបោះឆ្នោតប្រជាមតិ លើរដ្ឋធម្មនុញ្ញ។ សម្លងឆ្នោតគាំទ្ររដ្ឋធម្មនុញ្ញ ដែលតាក់តែងឡើងក្រោមរបបយោធាអេហ្ស៊ីបពេលនេះ ប្រហែលអាចមានដល់៩៨ភាគរយ។ គណៈកម្មការបោះឆ្នោតបានបដិសេធមិនប្រាប់តួលេខអ្នកចូលរួមបោះឆ្នោតប្រជាមតិលើរដ្ឋធម្មនុញ្ញទេ គ្រាន់តែប្រាប់ថា អ្នកចូលរួមឆ្នាំ២០១៤នេះ មានអត្រាខ្ពស់ ជាងឆ្នាំ២០១២ ក្នុងពេលលោកមរស៊ីនៅគ្រប់គ្រងប្រទេសនៅឡើយ។យោងតាមទីភ្នាក់ងារមួយឈ្មោះថា Mena មេណា មានអ្នកចូលរួមបោះឆ្នោត៣៩ភាគរយ នៅតាម២០ខេត្ត ក្នុងចំណោមខេត្តសរុបចំនួន២៧។
នៅថ្ងៃសុក្រនេះ ក្រុមគាំទ្រលោកមរស៊ី ដែលបានអំពាវនាវអោយពហិការមិនចូលរួមបោះឆ្នោតប្រជាមតិនោះ បានបរិហារថា មានការក្លែងបន្លំ និងមានអំពើពុករលួយ ក្នុងដំណើរការបោះឆ្នោតប្រជាមតិលើរដ្ឋធម្មនុញ្ញនេះ។
ការបោះឆ្នោតប្រជាមតិលើរដ្ឋធម្មនុញ្ញ កាលពីថ្ងៃអង្គារ ជាតេស្តសាកល្បង វាស់កម្រិតប្រជាប្រិយភាពរបស់រដ្ឋាភិបាលយោធាអេហ្ស៊ីបបច្ចុប្បន្ន។ កងទ័ពសង្ឃឹមថា ប្រជាជនគាំទ្រខ្លួន ក្នុងដំណើរការបោះឆ្នោតប្រធានាធិបតី នៅ៦ខែខាងមុខទៀតនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ