លោក មូបារ៉ាក់ អតីតប្រធានាធិបតីផ្តាច់ការអេហ្ស៊ីបបានសេរីភាពបណ្តោះអាសន្ន
តុលាការអេហ្ស៊ីប បានចេញដីកា នៅថ្ងៃពុធទី ២១ សីហា ព្រមព្រៀងផ្តល់សេរីភាពដោយមានលក្ខខណ្ឌដល់លោក ហូស្នី មូបារ៉ាក់ (Hosni Moubarak) អតីតប្រធានាធិបតីអេហ្ស៊ីប ឃ្លាតចេញពីអំណាចកាលពីឆ្នាំ២០១១ ដោយចលនាបដិវត្តប្រជាជន។ សេចក្តីសម្រេចរបស់តុលាការនេះ ធ្វើឡើងជួនចំពេលដែលក្រុមអ្នកកាន់អំណាចបច្ចុប្បន្នបានចាប់ខ្លួនមេដឹកនាំអ៊ីស្លាមជ្រុលនិយម ភាតរអ៊ីស្លាម។
ចុះផ្សាយនៅថ្ងៃ៖ កែប្រែថ្ងៃទី៖
លោក មូបារ៉ាក់ អាចនឹងមានសេរីភាព ចេញក្រៅឃុំឃាំង យ៉ាងយូរ នៅថ្ងៃព្រហស្បតិ៍នេះ ពីព្រោះតុលាការបានព្រមព្រៀងផ្តល់សេរីភាពបណ្តោះអាសន្ននេះ កាលពីម្សិលមិញ ហើយលើកនេះ គេមិនអាចធ្វើបណ្តឹងឧទ្ធរណ៍ទេ នេះបើតាមរដ្ឋអាជ្ញាលោក Ahmed el Bahraoui។
លោកហូស្នី មូបារ៉ាក់ ធ្លាប់បានទទួលសេរីភាពដោយមានលក្ខខណ្ឌ ក្នុងសំណុំរឿងបីរួចមកហើយ ពីបទចោទប្រកាន់ធ្វើឃាតបាតុករ និងប្រព្រឹត្តអំពើពុករលួយ ដែលកំពុងរង់ចាំការបើកសវនាការ។ ជារៀងរាល់លើក ឱ្យតែមានការសេចក្តីសម្រេចរបស់តុលាការផ្តល់សេរីភាពបណ្តោះអាសន្នភ្លាម គេតែងឃើញមានការចោទប្រកាន់បន្ថែម ដាក់បន្ទុកលើរូបលោក មូបារ៉ាក់ មិនឱ្យអតីតប្រធានាធិបតីរូបនេះអាចចេញពីពន្ធនាគារបាន។
ប៉ុន្តែ លើកនេះ ជាសេចក្តីសម្រេចពាក់ព័ន្ធនឹងសំណុំរឿងទីបួន និងចុងក្រោយ ដែលបូកផ្សំសំណុំរឿងពុករលួយជាមួយផង។ រាល់បន្ទុកដែលនាំដល់ការឃុំឃាំងរូបអតីតប្រធានាធិបតី ត្រូវលើកចេញវិញទាំងអស់ ព្រោះលោកបានជាប់ពន្ធនាគារជាកិច្ចការពារដល់កំរិតអតិបរិមាដែលកំណត់ដោយច្បាប់។
អាយុ៨៥ឆ្នាំ មានជំងឺប្រចាំកាយផង លោក មូបារ៉ាក់ ទំនងជាមិនអាចដើរតួនយោបាយអ្វីទៀតមែន តែសម្រាប់ក្រសែភ្នែកជនទូទៅ ការផ្តល់សេរីភាពនេះអាចនឹងធ្វើឱ្យសម្ពាធសង្គមដែលកំពុងតានតឹងស្រាប់ កាន់តែធ្ងន់ធ្ងរបន្ថែមទៀត។ កាលពីខែកុម្ភៈឆ្នាំ២០១១ របបផ្តាច់ការយោធា មូបារ៉ាក់ បានដួលរលំ ដោយចលនាបដិវត្តប្រជាជន ! អេហ្ស៊ីបមានប្រធានាធិបតីថ្មីប្រសូតចេញពីសំឡេងឆ្នោត គឺលោក ម៉រស៊ី ជាអ្នកអ៊ីស្លាមជ្រុលនិយម Frère musulman ឬក្រុមភារតអ៊ីស្លាម។ បានតែមួយឆ្នាំចលនាបាតុកម្មផ្ទុះឡើងជាថ្មីទៀត លោក ម៉រស៊ី ត្រូវចាប់ខ្លួន ក្រុមយោធាបានឡើងមកដឹកនាំប្រទេសជាថ្មី ហើយពេលនេះកំពុងបន្ត ចាប់ខ្លួនឥស្សរជនអ៊ីស្លាមជ្រុលនិយម ភារតអ៊ីស្លាម។ តើនេះមិនមានន័យថា អេហ្ស៊ីកំពុងសាកល្បងស្ថាបនា របបមូបារ៉ាក់ ឡើងវិញ ឬក៏ថារលកបដិវត្តកំពុងបោកបញ្ចាសខ្យល់ទេឬ ?!
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ