អេហ្ស៊ីបប្រកាសថា ទោះបីគ្មានជំនួយអាមេរិក ក៏ប្រទេសមួយនេះអាចរស់បានដែរ
នាយករដ្ឋមន្ត្រីបណ្តោះអាសន្នអេហ្ស៊ីប កាលពីថ្ងៃអង្គារ បានប្រកាសថា ប្រទេសអេហ្ស៊ីបអាចរស់នៅដោយគ្មានជំនួយពីអាមេរិកបាន។ ការប្រកាសនេះធ្វើឡើងបន្ទាប់ពីទីក្រុងវ៉ាស៊ីនតោន និងសហភាពអឺរុបបានថ្កោលទោសចំពោះការបង្ក្រាបបង្ហូរឈាមទៅលើអ្នកគាំទ្រលោកប្រធានាធិបតី មហាម៉ាត់ ម័រស៊ី និងបានព្រមានពិចារណាឡើងវិញអំពីជំនួយរបស់ខ្លួនទៅឲ្យអេហ្ស៊ីប។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៨
ទោះបីជាគ្មានជំនួយអាមេរិក ក៏ប្រទេសអេហ្ស៊ីបអាចរស់បានដែរ ហើយការផ្តាច់ជំនួយយោធារបស់អាមេរិកមកកាន់អេហ្ស៊ីបជាកំហុសមួយរបស់អាមេរិក។ នេះជាការព្រមានរបស់លោក Hazem Beblawi នាយករដ្ឋមន្ត្រីបណ្តោះអាសន្នរបស់អេហ្ស៊ីប កាលពីថ្ងៃអង្គារទី២០ សីហា។ ប្រមុខរដ្ឋាភិបាលបណ្តោះអាសន្នអេហ្ស៊ីបបន្តថា ប្រទេសរបស់ខ្លួនធ្លាប់រស់ដោយសារជំនួយរបស់រុស្ស៊ី ដូច្នេះ វាគ្មានបញ្ហាទេដែលប្រទេសនេះត្រូវរស់ក្នុងស្ថានភាពផ្សេងៗនោះ។
សេចក្តីថ្លែងការណ៍បែបនេះ បានធ្វើឡើងបន្ទាប់ពីសហរដ្ឋអាមេរិក និងសហភាពអឺរ៉ុបកំពុងពិចារណាអំពីការផ្អាកជំនួយយោធាដល់រដ្ឋាភិបាលទីក្រុងគែរ។ លោកប្រធានាធិបតីសហរដ្ឋអាមេរិក លោក Barack Obama កំពុងតែពិចារណាឡើងវិញចំពោះជំនួយដែលត្រូវផ្តល់ដល់ប្រទេសអេហ្ស៊ីប។ នេះបើយោងតាមអ្នកនាំពាក្យនៅសេតវិមាន លោក Josh Earnest។ លោកបានឲ្យដឹងថា ជំនួយដែលអាមេរិកផ្តល់ឲ្យអេហ្ស៊ីបជាប្រចាំឆ្នាំ មានចំនួន ១ពាន់លាន៣សែនដុល្លារ សម្រាប់វិស័យយោធា និង២៥០លានដុល្លារសម្រាប់វិស័យសេដ្ឋកិច្ច។
ស្របពេលជាមួយគ្នានេះដែរ មន្ត្រីការបរទេសរបស់សហគមអឺរុបក៏បានឲ្យដឹងនៅថ្ងៃពុធនេះថា ជំនួយដែលសហភាពអឺរុបបានសន្យាថាផ្តល់ឲ្យអេហ្ស៊ីប សម្រាប់ឆ្នាំ ២០១២-២០១៣ ដែលមានចំនួនជិត ៥ពាន់លានអឺរូ ត្រូវបានលើកទៅពិភាក្សាក្នុងទីក្រុង Bruxelles ឡើងវិញ។
ការព្រមានរបស់អាមេរិក និងសហភាពអឺរ៉ុបថា នឹងពិចារណាឡើងវិញអំពីជំនួយបានកើតឡើង ខណៈដែលស្ថានការណ៍ក្នុងប្រទេសអេហ្ស៊ីបកំពុងតែឈានទៅរកសង្គ្រាមស៊ីវិល បន្ទាប់ពីសមត្ថកិច្ចបើកការបង្ក្រាបដោយបង្ហូររឈាម បង្ក្រាបទៅលើក្រុមអ្នកគាំទ្រលោកអតីតប្រធានាធិបតី ម៉រស៊ី ដែលបានបោះជំរុំតវ៉ាអស់រយៈពេលជាង ១ខែ។ ការបង្ក្រាបហិង្សាកន្លងមក បានបណ្តាលឲ្យមនុស្សជាង៩០០នាក់បានស្លាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ