ប៊ុលហ្ការី ធ្វើបត្យាប័នបញ្ជូនជនសង្ស័យជីហាត ប្អូនថ្លៃរបស់ភេរវជនCherif Kouachi ឲ្យបារាំង
នៅថ្ងៃ ទី១៦សីហា តុលាការក្រុងសូហ្វីយ៉ា ប្រទេសប៊ុលហ្ការី ទើបបានសម្រេចធ្វើបត្យាប័ន ទៅតាមការស្នើសុំរបស់បារាំង ដើម្បីប្រគល់ខ្លួនជនសង្ស័យជីហាតម្នាក់ ដែលត្រូវជាប្អូនថ្លៃរបស់ជនជីហាត Cherif Kouachi ដែលបានធ្វើភេរវកម្ម នៅស្នាក់ការកាសែត Chalie Hebdo កាលពីខែមករា ឆ្នាំ២០១៥។ ជនសង្ស័យជីហាត ដែលមានគម្រោងធ្វើដំណើរទៅប្រទេសស៊ីរីនេះ នឹងត្រូវប្រឈមមុខនឹងការចោទប្រកាន់ពីបទ ជាប់ពាក់ព័ន្ធនឹងបណ្តាញភេរវកម្មជីហាដ ដែលអាចជាប់ទោសពន្ធនាគារ១០ឆ្នាំ។
ចុះផ្សាយនៅថ្ងៃ៖
ស្តាប់ - ០១:៥១
ជនឈ្មោះ Mourad Hamyd អាយុ២០ឆ្នាំ ត្រូវបានចាប់ខ្លួន កាលពីថ្ងៃទី២៦ ខែកក្កដា ឆ្នាំ២០១៦ នៅប្រទេសប៊ុលហ្ការី ក្នុងពេលដែលជននេះ មានបំណងឆ្លងកាត់ទៅតួកគី តែត្រូវតួកគីបញ្ជូនចេញមកវិញ។ ជននេះ ត្រូវបាននគរបាលបារាំង ចាប់ខ្លួនសាកសួរចម្លើយរយៈពេល ៤៨ម៉ោង ម្តងរួចទៅហើយ ក្រោយហេតុការណ៍ភេរវកម្ម នៅការិយាល័យកាសែត Charlie Hebdo កាលពីខែមករា ឆ្នាំ២០១៥ ដោយសារតែ ជននេះគឺជាប្អូនថ្លៃរបស់ភេរវករ Cherif Kouachi។ តែដោយពុំមានភស្តុតាងគ្រប់គ្រាន់ នគរបាលបារាំងក៏បានដោះលែងជននេះវិញ។
ក្រោយមកនៅដើមខែ កក្កដា បងស្រីរបស់ជន Mourad Hamyd បានរាយការណ៍ទៅនគរបាលបារាំង ថាប្អូនប្រុសបាត់ខ្លួន ហើយអាចកំពុងតែធ្វើដំណើរទៅធ្វើជាជនជីហាតនៅស៊ីរី។ នគរបាលបារាំង បានចេញលិខិតកំណត់សំគាល់មួយភ្លាម ដើម្បីតាមរកជននេះ។ ទីបំផុត ជននេះ ត្រូវបាននគរបាលប៊ុលហ្ការីចាប់ឃាត់ខ្លួន។
តុលាការក្រុងប៉ារីស បានចេញដីកាចាប់ខ្លួន អន្តរជាតិមួយ ភ្លាមៗផងដែរ។ ឆ្លងតាមការស៊ើបអង្កេត នៅក្នុងកុំព្យូទ័ររបស់ជននេះ គេបានរកឃើញថា ជននេះ បានចូលទៅមើលគេហទំព័រអ៊ីនធើនែត របស់បណ្តាញជីហាដ អង្គការរដ្ឋអ៊ីស្លាមជាច្រើនលើក។ ហើយផ្លូវធ្វើដំណើររបស់ជននេះ ឆ្លងកាត់ប្រទេសហុងគ្រី ស៊ែប៊ី ប៊ុលហ្ការី មុននឹងចូលទៅដល់តួកគី រួចឆ្លងចូលទៅស៊ីរី គឺជាផ្លូវធ្វើដំណើរជាទំលាប់ របស់ជនជីហាត។ សម្រាប់សមត្ថកិច្ច ជននេះពិតជាមានបំណងទៅធ្វើជាជនជីហាតនៅស៊ីរី បើទោះបីជននេះធ្លាប់ ប្រកែកប្រាប់អាជ្ញាធរប៊ុលហ្ការី ថាខ្លួនធ្វើដំណើរក្នុងគោលដៅទេសចរណ៍ក៏ដោយ។
តាមការគ្រោងទុក ជន Mourad Hamyd នេះ នឹងត្រូវបញ្ជូនមកដល់បារាំង នៅក្នុងរយៈពេល៧ថ្ងៃទៀត។ ជននេះប្រឈមនឹងទោសពន្ធធនាគារ១០ឆ្នាំ ពីបទឃុបឃិត ក្នុងបណ្តាញជីហាដ ដែលបានរៀបគំរោងធ្វើភេរវកម្ម។ សូមបញ្ជាក់ថា ក្រៅពីជននេះ នៅមានយុវជនក្មេងៗ អ៊ីស្លាមជាច្រើននាក់ទៀត ដែលបានធ្លាក់ក្នុងអន្លង់នៃការអូសទាញរបស់ពួកជ្រុលនិយមអ៊ីស្លាម ហើយក្លាយខ្លួនជាជនជីហាតបំរើឲ្យក្រុមជីហាតអង្គការរដ្ឋអ៊ីស្លាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ