៤ខែក្រោយភេរវកម្មនៅប៉ារីស ជនសាឡា អាប់ដេស្លាម ត្រូវចាប់ខ្លួននៅព្រុចសែល
ភេរវករចុងក្រោយ ឈ្មោះ សាឡា អាប់ដេស្លាម ដែលជាមនុស្សសំខាន់ម្នាក់ ក្នុងការរៀបចំអំពើភេរវកម្ម នៅទីក្រុងប៉ារីស កាលពីថ្ងៃទី១៣ វិច្ឆិកា ២០១៥ ត្រូវបានចាប់ខ្លួនកាលពីល្ងាចថ្ងៃសុក្រ ទី១៨មីនា ដោយកងកម្លាំងពិសេសរបស់បែលហ្ស៊ិក នៅភូមិម៉ូលិនបិក ក្នុងទីក្រុងព្រុយសែល។ បន្ទាប់ពីត្រូវបញ្ជូនទៅកាន់មន្ទីរពេទ្យដើម្បីព្យាបាលរបួសជើងកាលពីយប់ថ្ងៃសុក្រ ជន សាឡា អាប់ដេស្លាម កំពុងតែត្រូវបានក្រុមសួរចម្លើយ និងចៅក្រមស៊ើបអង្កេតរបស់បែលលហ្ស៊ិក ធ្វើការសាកសួរជាលើកដំបូង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:៤៧
លាក់ខ្លួន៤ខែ ចាប់បានដោយចៃដន្យ៖
៤ខែ ដែលក្រុមនគរបាលស៊ើបអង្កេតរបស់បារាំង និងបែលហ្ស៊ិក ខំតាមចាប់ជនឈ្មោះសាឡា អាប់ដេស្លាម។ ២- ៣ដងហើយ ដែលនគរបាលទៅដល់យឺតបន្តិច ធ្វើឲ្យរបូតជននេះ។ ពេលដំបូងគេស្មានថាជននេះ បានរត់គេចចេញពីបារាំង និងបែលហ្ស៊ិក ហើយអាចត្រឡប់ទៅស៊ីរី តែទីបំផុតទៅ គឺ ជននេះមិនបានទៅណាឆ្ងាយទេ គឺនៅក្រវ៉ែល ម្តុំៗក្រុងព្រុយសែល និងក្នុងភូមិម៉ូលិនបិក ទីកន្លែងកំណើត និងនៅក្បែរផ្ទះរបស់ឪពុកម្តាយជននេះផ្ទាល់តែម្តង។
ការតាមប្រម៉ាញ់ជននេះ គេសឹងតែថាអស់សង្ឃឹមទៅហើយ តែស្រាប់តែនៅថ្ងៃទី១៥ មីនា បី បួនថ្ងៃមុននេះ ក្រុមនគរបាលបែលហ្ស៊ិក បានធ្វើការឆែកឆេរដោយចៃដន្យ នៅផ្ទះមួយកន្លែងនៅភូមិ Forest ជាយក្រុងព្រុយសែល។ ប៉ុន្តែពេលទៅដល់ ហៀបនឹងឆែកឆេរ ស្រាប់តែមានគ្រាប់កាំភ្លើងបាញ់ចេញពីផ្ទះនោះ ទើបនគរចាប់ផ្តើមភ្ញាក់ព្រើតថា ផ្ទះនេះពិតជាកន្លែងលាក់ខ្លួនរបស់ក្រុមជនទុច្ចរិត រឺក្រុមភេរវកម្មមិនខាន។ ការបាញ់តបតគ្នា បានផ្ទុះឡើង ធ្វើឲ្យរបួសខាងនគរបាលម្នាក់ និងស្លាប់ជនដៃដល់ដែលលាក់ខ្លួននៅក្នុងនោះម្នាក់។ ជនដៃដល់ពីរនាក់ទៀតបានរត់គេចខ្លួន បានសម្រេច។
បន្ទាប់ពីធ្វើការពិនិត្យទៅ ក្រុមអ្នកជំនាញ បានសន្និដ្ឋានថា ជនឈ្មោះសាឡា អាប់ដេស្លាម ពិតជាបាននៅក្នុងផ្ទះនោះ ដោយយោងទៅលើស្នាម ADN ដែលនៅជាប់នឹងមាត់កែវ។ អញ្ចឹងជនពីរនាក់ដែលរត់គេចខ្លួនបានកាលពីពេលនោះ គឺមានម្នាក់ជាជនសាឡា អាប់ដេស្លាម នេះឯង។
ជនអនាមិកទូរស័ព្ទប្រាប់នគរបាល ឈានទៅដល់ការកំណត់ទីតាំងលាក់ខ្លួន៖
បន្ទាប់មកទៀតការស៊ើបអង្កេត ចាប់ផ្តើមកំរើកក្តៅឡើងវិញ ព្រោះគេដឹងថាជននេះនៅមិនទាន់ទៅណាឆ្ងាយទេ គឺនៅក្បែរៗក្រុងព្រុយសែល។ ជាសំណាងល្អ ភ្លាមៗស្រាប់តែមានទូរស័ព្ទពីជនមិនស្គាល់មុខម្នាក់ បានទូរស័ព្ទទៅប្រាប់នគរបាលថា ជនឈ្មោះសាឡា អាប់ដេស្លាម បានពឹងខ្លួន ឲ្យជួយរកកន្លែងលាក់ខ្លួន។ គ្រាន់តែភ្លាមនោះ ក្រុមនគរបាលស៊ើបអង្កេត បានធ្វើការស្រាវជ្រាវ រកប្រភពលេខទូរស័ព្ទ នឹងបណ្តាញគ្នាវា ដែលទូរស័ព្ទទាក់ទងគ្នាចុះឡើង ទើបឈានទៅដល់ការកំណត់ទីតាំងលាក់ខ្លួនថ្មីរបស់ជននេះ គឺនៅផ្ទះមួយ ស្ថិតលើផ្លូវ Quatre Vents ក្នុងសង្កាត់ម៉ូលិនបិក ក្រុងព្រុយសែល នេះតែម្តង។
ពេលដែលនគរបាលចូលទៅដល់ក្នុងផ្ទះ ជននេះបានទាំងស្រែកប្រាប់នគរបាលថា គឺវាឈ្មោះ សាឡា អាប់ដេស្លាម។ នគរបាលបានបាញ់ មួយគ្រាប់ធ្វើឲ្យត្រូវរបួសជើង មុននឹងអូសជននេះចេញមកខាងក្រៅ។ ក្រៅពីចាប់បានជនសាឡា អាប់ដេស្លាម នគរបាលបានចាប់មនុស្ស៤នាក់ផ្សេងទៀត ដែលនៅក្នុងកន្លែងលាក់ខ្លួននោះដែរ។ ម៉ោងប្រហែលជា ជិត៥ល្ងាច ជននេះត្រូវបាននគរបាលចាប់ក្របួច-កបញ្ចូលឡាន ដើម្បីយកទៅមន្ទីរពេទ្យព្យាបាលរបួសជើង។ នៅព្រឹកថ្ងៃទី១៩ នេះ ក្រុមនគរបាលបានបញ្ជូនជននេះចេញពីពេទ្យ ដើម្បីយកទៅកន្លែងសាកសួរចម្លើយ។
បែលហ្ស៊ិក និងបញ្ជូនជន សាឡា អាប់ដេស្លាម ទៅឲ្យបារាំង៖
តាមការប៉ាន់ស្មាន ខាងបែលហ្ស៊ិក និងបញ្ជូនជននេះទៅឲ្យបារាំង ក្នុងពេលឆាប់ៗនេះ។ ដីកាតាមចាប់ខ្លួនជននេះ មានទាំងសងខាង បារាំងក៏ធ្វើ បែលហ្ស៊ិកក៏ធ្វើ។ ប្រតិបត្តិការតាមប្រម៉ាញ់ជនដៃដល់ បណ្តាញភេរវកម្មនេះ គឺនគរបាលបារាំង និងបែលហ្ស៊ិកធ្វើការជាមួយគ្នាបានល្អ។ ជាក់ស្តែងគ្រាន់តែចាប់បានជននេះភ្លាមកាលពីល្ងាចម្សិលមិញ លោកនាយករដ្ឋមន្ត្រីបែលហ្ស៊ិក និងលោកប្រធានាធិបតីបារាំង បានធ្វើសន្និសីទរួមគ្នាភ្លាមដែរ ដើម្បីបង្ហាញពីជោគជ័យរួមគ្នា ក្នុងការកម្ទេចបណ្តាញភេរវកម្មអ៊ីស្លាមនេះ។
ភេរវកម្មបានកើតនៅក្រុងប៉ារីស ហើយជនរងគ្រោះសុទ្ធតែជាជនជាតិបារាំងសឹងតែទាំងអស់។ ដូច្នេះ គ្មានរឿងអ្វីដែលបែលហ្ស៊ិក ត្រូវបដិសេធមិនបញ្ជូនជន សាឡា អាប់ដេស្លាម នេះទៅឲ្យបារាំងកាត់ទោសទេ។ មួយវិញទៀត ក្នុងករណីជនដៃដល់ឈ្មោះ ម៉េឌី នេមូឈ ដែលបានបាញ់រះសម្លាប់មនុស្សនៅខាងមុខវិហារជ្វីហ្វនៅក្រុងព្រុយសែល កាលពីពាក់កណ្តាលឆ្នាំ២០១៤ ត្រូវបានគេចាប់ខ្លួននៅក្រុងម៉ាកសីប្រទេសបារាំង។ បន្ទាប់មកនគរបាលបារាំងបានបញ្ជូនជននោះទៅឲ្យខាងបែលហ្ស៊ិក។ អញ្ចឹងលើកនេះ បែលហ្ស៊ិកក៏ត្រូវបញ្ជូនជនសាឡា អាប់ដេស្លាម មកឲ្យបារាំងវិញដែរ។
សាឡា អាប់ដេស្លាម នឹងព្រមសហការដែររឺទេ?
អ្វីៗវាអាស្រ័យថាជននេះព្រមនិយាយ ព្រមសហការជាមួយក្រុមស៊ើបអង្កេតដែររឺទេ? ជាការពិត ជនដៃដល់ឯទៀតមាន៩នាក់ គឺស្លាប់អស់ហើយ។ អ្នកខ្លះស្លាប់ដោយដាក់គ្រាប់បែកបំផ្ទុះខ្លួនឯង អ្នកខ្លះស្លាប់ក្នុងពេលចុះបង្រ្កាបតាមចាប់របស់នគរបាលបារាំង។ ជនសាឡា អាប់ដេស្លាម នេះ ជាជនដៃដល់តែម្នាក់គត់ដែលនៅរស់មានជីវិត។ ក្នុងភេរវកម្មថ្ងៃទី ១៣ វិច្ឆិកា នៅប៉ារីស គឺជននេះមិនមែនជាមេគំនិតដឹកនាំទេ តែជននេះហើយជាអ្នករត់ការរៀបចំគ្រប់បែបយ៉ាង។
ជនឈ្មោះសាឡា អាប់ដេស្លាម គឺជាអ្នលជួលបន្ទប់សណ្ឋាគារ ឲ្យពួកភេរវករផ្សេងទៀតដេក មុនពេលចេញធ្វើប្រតិបត្តិការ។ ជននេះជាអ្នកជួលឡានពីរគ្រឿង ពីព្រុយសែល បើកសំដៅមកប៉ារីសដើម្បីធ្វើប្រតិបត្តិការបាញ់រះ។ ជននេះទៀត ជាអ្នកផ្ញើរលុយទៅឲ្យបងប្អូនរបស់ក្រុមជនដៃដល់។ ហើយតាមធម្មតាជននេះក៏ត្រូវចេញទៅធ្វើប្រតិបត្តិការជាមួយគេដែរ។
សាឡា អាប់ដេស្លាម ជនកំសាក?
អ្វីដែលចំលែក ហើយដែលក្រុមស៊ើបអង្កេតកំពុងឆ្ងល់គឺថា ក្រុមភេរវករចេញធ្វើប្រតិបត្តិការនៅថ្ងៃនោះ មានចែកជាក្រុម មួយក្រុមមាន៣នាក់ នៅតាមទីតាំងនីមួយៗ។ ប្លែកត្រង់ថាជនសាឡា អាប់ដេស្លាម នេះនៅតែម្នាក់ឯង បន្ទាប់ពីបានដឹកគ្នាវាទៅទម្លាក់នៅពហុកីឡាដ្ឋានជាតិបារាំង ដើម្បីបំផ្ទុះគ្រាប់បែកអត្តឃាតនៅទៅនោះ។ តាមធម្មតាជនសាឡា អាប់ដេស្លាម នេះ ក៏មានខ្សែក្រវ៉ាត់គ្រាប់បែក ដែលត្រូវដាក់បំផ្ទុះសម្លាប់ខ្លួនដែរ តែស្រាប់តែគេរកឃើញខ្សែក្រវ៉ាត់គ្រាប់បែកនោះ បោះចោលនៅតាមផ្លូវម្តុំក្បែរ Montrouge ខាងត្បូងជាយក្រុងប៉ារីស មួយថ្ងៃក្រោយថ្ងៃភេរវកម្ម។
អញ្ចឹងគេកំពុងសន្និដ្ឋានថាជនសាឡា អាប់ដេស្លាមនេះ អាចកំសាក ញញើតមិនហ៊ានស្លាប់ ដូចគ្នាវាដទៃទៀត បានសុខចិត្តចោលឡាន និងចោលគ្រាប់បែក ហើយបានទូរស័ព្ទហៅគ្នាវាផ្សេងទៀត ឲ្យមកដឹកទៅព្រុយសែលវិញ នៅថ្ងៃបន្ទាប់។ ហើយនៅថ្ងៃម្សិលមិញពេលចាប់ខ្លួនទៀត ជននេះបានស្រែកប្រាប់ឈ្មោះវាទៅប៉ូលិសទៀត។
ទាំងអស់នេះធ្វើឲ្យគេមានសង្ឃឹមគួរសមថា ជននេះអាចនៅមានហេតុផល នៅខ្លាចស្លាប់ហើយអាចព្រមសហការជាមួយក្រុមស៊ើបអង្កេតដើម្បី ផ្តល់ពន្លឺដល់ការស្រាវជា្រវរកការពិត ជុំវិញការរៀបចំភេរវកម្មនៅប៉ារីស។ បន្ថែមពីនេះទៀត ការលាក់ខ្លួនរយៈពេល៤ខែមកនេះ មិនមែនជននេះនៅតែម្នាក់ឯងទេ គឺមានបណ្តាញគ្នាវាច្រើននាក់ណាស់ ដែលនៅចាក់ស្រេស។ ដូច្នេះបើជននេះសហការ នគរបាលអាចនឹងឈានទៅចាប់បណ្តាញភេរវកម្មនេះ បានកាន់តែច្រើន មិនថានៅបែលហ្ស៊ិក រឺនៅបារាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ