ភេរវកម្មប៉ារីស ៖ បែលហ្សិក ដំឡើងកំរិតអាសន្នភេរវកម្មជាថ្មី
នាយករដ្ឋមន្ត្រីបែលហ្ស៊ិកបានប្រកាសរក្សាភាពអាសន្នភេរវកម្មកំរិតបី នៅក្នុងផ្ទៃប្រទេសបែលហ្ស៊ិក ដដែល បន្ទាប់ពីមានផ្ទុះការបាញ់រះកណ្តាលក្រុងព្រុចសែល កាលពីល្ងាចថ្ងៃអង្គារ ពេលប៉ូលិសបារាំងនិងបែលហ្ស៊ិកចេញធ្វើប្រតិបត្តិការឆែកឆេររកបណ្តាញភេរវជនមានពាក់ព័ន្ធនឹងភេរកម្មថ្ងៃទី ១៣វិច្ឆិកា នៅប៉ារីស។ មកទល់ល្ងាចថ្ងៃពុធទី ១៦មីនា ភេរវជនសង្ស័យពីររូបកំពុងគេចខ្លួននៅឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
នៅក្នុងប្រតិបត្តិការឆែកឆេរផ្ទះមួយ ក្នុងក្របខ័ណ្ឌនៃការអង្កេតភេរវកម្មនៅប៉ារីសថ្ងៃទី ១៣វិច្ឆិកា២០១៥ ដែលក្លាយជាការបាញ់រះតគ្នា កណ្តាលក្រុងព្រុចសែល ប៉ូលិសបារាំងនិងបែលហ្សិក កម្ចាត់បានខ្មាន់កាំភ្លើងអាកាម្នាក់ និងកំពុងតាមស្វែងចាប់ជនសង្ស័យពីរនាក់ផ្សេងទៀត មិនស្គាល់អត្តសញ្ញាណ ដែលរត់គេចរួច។
នៅក្បែរសាកសពភេរវជន Belkahid Mohamed អាយុ៣៥ឆ្នាំ ជាតិអាល់ហ្សេរីរស់នៅដោយខុសច្បាប់នៅព្រុចសែល ដែលប៉ូលិសបែលហ្សិកទើបកំណត់អត្តសញ្ញាណបាន មានទង់ជាតិរបស់អង្គការរដ្ឋអ៊ីស្លាម និងគម្ពីអ៊ីស្លាមសាឡាហ្វីស ព្រមទាំងកាំភ្លើងជាច្រើនដើម។
បើអ្នកនាំពាក្យប៉ូលិសបែលហ្ស៊ិក ប្រតិបត្តិការនេះ គ្មានគម្រោងតាមចាប់ ភេរវជន Salah Abdeslam ជនដៃដល់ ដែលបាត់ស្រមោលឈឹងតាំងពីថ្ងៃភេរវកម្មនៅក្រុងប៉ារីសមកទេ តែគឺដើម្បីតាមចាប់ជនជាប់សង្ស័យផ្សេងទៀត ជាបណ្តាញរបស់ក្រុមភេរវជន កំពុងជាប់ចោទក្នុងតុលាការបែលហ្ស៊ិក។
នៅពេលធ្វើប្រតិបត្តិការនោះ ភេរវជនម្នាក់ឬច្រើននាក់បានបាញ់រះមកលើប៉ូលិសបារាំងនិងបែលហ្ស៊ិកមុន ធ្វើឱ្យប៉ូលិសបួននាក់រងរបួស។ ពេលនេះក្រុងព្រុចសែលបានស្គាល់ភាពស្ងប់ស្ងាត់វិញហើយ ប៉ុន្តែក្រោយជំនួបប្រជុំក្រុមប្រឹក្សារដ្ឋមន្ត្រី និងអ្នកទទួលខុសត្រូវផ្នែកសន្តិសុខជាតិ នៅល្ងាចថ្ងៃពុធនេះមក ប្រមុខរដ្ឋាភិបាលបែលហ្ស៊ិកបានសម្រេចរក្សាភាពអាសន្នភេរវកម្មកំរិតបីដដែល។
សូមបញ្ជាក់ថា បែលហ្ស៊ិកចាប់បានជនមានពាក់ព័ន្ធនឹងភេរវកម្មថ្ងៃទី ១៣វិច្ឆិកា២០១៥នៅក្រុងប៉ារីស ចំនួន១១នាក់។ ហើយការអង្កេតបានបង្ហាញថា ភេរវកម្មនៅប៉ារីសនេះមានការរៀបចំ និងសហការបញ្ហាពីក្រុងព្រុចសែលមក។ ប៉ុន្តែ Salah Abdeslam និងមិត្តMohamed Abrini ដែលប៉ូលិសបារាំងសង្ស័យថាមានតួនាទីសំខាន់ជាអ្នកចាត់ចែងរៀបចំភេរវកម្មនៅប៉ារីសនោះ នៅតែបាត់ឈឹងគ្មានដានដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ