ប្រធានាធិបតីបារាំង៖ មាន១៩ជាតិសាសន៍ រងគ្រោះក្នុងអំពើភេរវកម្ម នៅប៉ារីស
វិមានប្រធានាធិបតីបារាំង បានបង្ហាញកាលពីថ្ងៃពុធ ទី ១៨វិច្ឆិកាថា គេបានកំណត់អត្តសញ្ញាណរាល់ជនរងគ្រោះ ដែលបានស្លាប់បាត់បង់ជីវិត និងរងរបួស នៅក្នុងការវាយប្រហារភេរវកម្ម កាលពីថ្ងៃសុក្រ។ នៅក្រោយភេរវកម្ម សម្លាប់មនុស្ស១២៩នាក់ រដ្ឋាភិបាលបារាំង បានបើកចាត់វិធានការសំខាន់ៗ ប្រឆាំងក្រុមជីហាតនៃអង្គការរដ្ឋអ៊ីស្លាមទាំងនៅប្រទេសស៊ីរី និងក្នុងស្រុកបារាំង ជាទី ដែលប៉ូលិសបារាំងកំពុងតាមប្រមាញ់ និងបំបែកសំបុកក្រុមជីហាត ជ្រុលនិយម។ នៅថ្ងៃព្រហស្បតិ៍នេះ រដ្ឋសភាបារាំងក៏នឹងត្រូវពិភាក្សាផងដែរលើសំណើរបស់រដ្ឋាភិបាលបារាំងដែលចង់ពន្យារពេល ដាក់ប្រទេសបារាំងឲ្យស្ថិតនៅក្នុងស្ថានភាពប្រកាសអាសន្នរយៈពេល ៣ខែបន្តទៀត។
ចុះផ្សាយនៅថ្ងៃ៖
ស្តាប់ - ០២:១៦
ក្រឹត្យរបស់ប្រធានាធិបតីបារាំង ដែលប្រកាសដាក់ប្រទេសឲ្យស្ថិតនៅក្នុងស្ថានភាពអាសន្ន តាំងពីថ្ងៃសៅរ៍ បានបើកផ្លូវឲ្យអាជ្ញាធរបារាំងបើកប្រតិបត្តិការទ្រង់ទ្រាយធំ ប្រយុទ្ធប្រឆាំង នឹងក្រុមភេរវនិយម។ ជារួម តាំងពីយប់ថ្ងៃសៅរ៍ នៅទូទាំងប្រទេស ប៉ូលិសបារាំង បានចូលទៅឆែកឆេររដ្ឋបាល ប្រមាណ៤១៤កន្លែង ចាប់ឃាត់ខ្លួនមនុស្ស ៦០នាក់ និងរឹបអូសបាន អាវុធ ៧៥ដើម ដែលមាន១១ដើមជាអាវុធធ្វើសង្រ្គាម។
តាមរដ្ឋមន្រ្តីក្រសួងមហាផ្ទៃបារាំង Bernard Cazeneuve ប្រតិបត្តិការតាមប្រមាញ់ក្រុមភេរវជននៅមានបន្តទៀត នៅប្រទេសបារាំង។ នៅមុខសភាបារាំង រដ្ឋមន្រ្តីបារាំង នៅបានលើកឡើងថា ប្រតិបត្តិការសម្រុកចូលផ្ទះ នៅជាយក្រុងប៉ារីស កាលពីព្រឹកថ្ងៃពុធ ដែលនៅក្នុងនោះ ភេរវជនពីរនាក់បានស្លាប់បាត់បង់ជីវិត បានធ្វើឲ្យគេរកឃើញថា ក្រុមភេរវជនកំពុងមានផែនការចង់ធ្វើភេរវកម្ម នៅថ្ងៃព្រហស្បតិ៍ នៅកន្លែងមួយទៀត នៅប្រទេសបារាំង។ តាមប្រភពស្និទ្ធនឹងក្រុមស៊ើបអង្កេតបារាំង ដែលដកស្រង់សំដីដោយទីភ្នាក់ងារព័ត៌មានអង់គ្លេស Reuters នៅក្នុងប្រតិបត្តិការតាមរកចាប់មេក្លោងភេរវកម្ម នៅទីក្រុងប៉ារីស ប៉ូលិសបានរកឃើញដោយចៃដន្យក្រុមភេរវជនមួយក្រុមផ្សេងទៀត ដែលគ្មានពាក់ព័ន្ធនឹងក្រុមធ្វើភេរវកម្មនៅប៉ារីស ប៉ុន្តែ ក្រុមថ្មីនេះកំពុងតែត្រៀមរៀបចំគម្រោងធ្វើភេរវកម្ម នៅLa Défense ជាយក្រុងប៉ារីស។ ទាំងភេរវជនដែលបានស្លាប់ និងជនសង្ស័យដែលប៉ូលិសចាប់ខ្លួន នៅក្នុងប្រតិបត្តិការឡោមព័ទ្ធនៅភាគខាងជើងក្រុងប៉ារីស កាលពីថ្ងៃពុធ សុទ្ធសឹង ជាមុខក្រុមភេរវជនដែលកំពុង ត្រៀមធ្វើភេរវកម្ម នៅLa défense សង្កាត់ពាណិជ្ជកម្មដ៏មមាញឹកបំផុតរបស់អឺរ៉ុប ដែលមានក្រុមហ៊ុនប្រមាណ ២៥០០ក្រុមហ៊ុន។
នៅក្នុងវេទិការជំនុំជាមួយចៅហ្វាយក្រុងក្នុងស្រុកបារាំង លោកប្រធានាធិបតី បានប្រកាសបំពាក់អាវុធដល់ប៉ូលិសក្រុង ដែល នៅមួយរយៈចុងក្រោយនេះ បានបញ្ចេញស្នាដៃ ល្អ រួមសហការ ជាមួយប៉ូលិសថ្នាក់ជាតិ ដើម្បី តាមប្រមាញ់ក្រុមភេរវនិយម។
នៅថ្ងៃពុធដដែល វិមានប្រធានាធិបតី បារាំងបានប្រកាសឲ្យដឹងពីអត្តសញ្ញាណរបស់ជនរងគ្រោះ ដែលបានស្លាប់ និងរងរបួស ក្នុងអំពើភេរវកម្ម។ ជារួម មានមនុស្ស ចម្រុះជាតិសាសន៍ចំនួន ១៩ ដែលរងគ្រោះក្នុងភេរវកម្មកណ្តាលក្រុងប៉ារីស។ ការិយាល័យអន្តរក្រសួងដែលស្ថិតនៅក្រោមការដឹកនាំរបស់ក្រសួងការបរទេសនឹងទទួលបន្ទុកផ្តល់ជំនួយដល់ក្រុមគ្រួសារសម្រាប់ធ្វើពិធីបុណ្យសព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ