វិបត្តិហិរញ្ញវត្ថុក្រិកបានប្រែក្លាយទៅជាសោកនាដកម្ម
ការប្រយុទ្ធតទល់គ្នារវាងក្រុមបាតុករ និងនគរបាលក្រិកកាលពីថ្ងៃពុធម្សិលមិញនៅទីក្រុងAthènesបានបណ្តាល ឲ្យមានមនុស្សស្លាប់យ៉ាងតិច៣នាក់។ ទាំងនេះបានធ្វើឲ្យតម្លៃភាគហ៊ុននៅទីផ្សារទូទាំងពិភពលោកធ្លាក់ស្រុត ចុះយ៉ាងខ្លាំង ដោយគេបារម្ភខ្លាចវិបត្តិហិរញ្ញវត្ថុក្រិករីករាលដាលដល់ប្រទេសដទៃ ទៀត។
ចុះផ្សាយនៅថ្ងៃ៖
សេចក្តីរាយការណ៍របស់ សៀក សារិន
បាតុកម្មដ៏ធំធេងប្រឆាំងនឹងផែនការត្បិតត្បៀតតឹងរ៉ឹងរបស់រដ្ឋាភិបាលក្រិកបានប្រែក្លាយទៅជាសោកនាដកម្មដ៏គួរឲ្យសោកស្តាយ។ យ៉ាងតិចមានបុគ្គលិកធនាគារបីនាក់បានរងគ្រោះស្លាប់ដោយអគ្គីភ័យដែលបានឆាបឆេះដោយការគប់ដបប្រេងសាំងទៅលើអាគារ។
នៅក្នុងសេចក្តីថ្លែងការណ៍មួយលោកប្រធានាធិបតីក្រិកបានបញ្ជាក់ថា “យើងទាំងអស់គ្នាសុទ្ធតែមានការទទួលខុសត្រូវ យើងត្រូវធ្វើយ៉ាងណាកុំឲ្យប្រទេសក្រិកធ្លាក់ទៅក្នុងជ្រោះមហន្តរាយ។”
ឆ្លើយតបទៅនឹងការអំពាវនាវរបស់ក្រុមសហជីព ប្រជាជនក្រិកយ៉ាងតិច៥០ ០០០នាក់បាននាំគ្នាចុះថ្នល់ធ្វើបាតុកម្មប្រឆាំងនឹងផែនការត្បិតត្បៀតតឹងរ៉ឹងរបស់រដ្ឋាភិបាលGeorges Papandréou។ មានប្រជាជនក្រិកប្រមាណ៣០ ០០០នាក់បានធ្វើបាតុកម្មទីក្រុងAthènes ហើយនិងប្រមាណ២០ ០០០នាក់បានធ្វើបាតុកម្មទីក្រុងSalonique ឋិតនៅប៉ែកខាងជើងនៃប្រទេស។
គួរកត់សម្គាល់ថា វិធានការដែលមាននៅក្នុងផែនការត្បិតត្បៀតតឹងរ៉ឹងរបស់រដ្ឋាភិបាលGeorges Papandréouមានជាអាទិ៍៖
-តម្លើងអត្រាពន្ធលើតម្លៃបន្ថែមTVA ពី២១%ទៅ២៣%។
-តម្លើងពន្ធលើកញ្ចប់បារីនិងសុរា។
-លុបចោលប្រាក់បៀវត្សរ៍បន្ថែមសម្រាប់ខែទី១៣និងខែទី១៤សម្រាប់អ្នករដ្ឋការណាដែលមានប្រាក់បៀវត្សរ៍លើសពី៣ ០០០€ក្នុង១ខែ។
-អាយុអាចចូលនិវត្តន៍បាននឹងត្រូវតម្លើងដល់៦០ឆ្នាំ។
នៅព្រឹកថ្ងៃព្រហស្បតិ៍នេះទីផ្សារភាគហ៊ុននៅទីក្រុងTokyoបានធ្លាក់ស្រុតបាត់បង់អស់-៣,២៧%បន្ថែមទៀត។ ចំណែកឯប្រាក់អឺរ៉ូវិញ១€ប្តូរបានតែ១$២៧សេនប៉ុណ្ណោះ។ ទាំងនេះ ដោយហេតុតែមានការបារម្ភខ្លាចវិបត្តិហិរញ្ញវត្ថុក្រិករីករាលដាលដល់ប្រទេសអឺរ៉ុបដទៃទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ