បារាំងនិងអ៊ីតាលីស្នើឲ្យធ្វើកំណែទម្រង់កិច្ចព្រមព្រៀង Schengen ស្តីពីការលុបព្រំដែនអឺរ៉ុប
នៅក្នុងជំនួបកំពូល កាលពីថ្ងៃអង្គារ ទី២៦ មេសា ២០១១ ម្សិលមិញនេះ ប្រធានាធិបតីបារាំង និងនាយករដ្ឋមន្រ្តីអ៊ីតាលីបានព្រមព្រៀងគ្នាសរសេរលិខិតរួមមួយ ស្នើសុំឲ្យសហភាពអឺរ៉ុបធ្វើកំណែទម្រង់កិច្ចព្រមព្រៀង Schengen ដែលចែងអំពីសេរីភាពនៃការធ្វើដំណើរឆ្លងកាត់ព្រំដែនរវាងប្រទេសជាសមាជិក។ សំណើនេះត្រូវបានធ្វើឡើង ក្រោយពីមានភាពចម្រូងចម្រាសរវាងបារាំង និងអ៊ីតាលី ជុំវិញបញ្ហាជនអន្តោប្រវេសន៍ខុសច្បាប់ មកពីប្រទេសទុយនីស៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥២
នៅក្នុងលិខិតរួមគ្នា ផ្ញើជូនប្រធានាធិបតីសហភាពអឺរ៉ុប និងប្រធានគណៈកម្មការអឺរ៉ុប លោកនីកូឡា សាកូហ្ស៊ី (Nicolas Sarkozy) និងលោកស៊ីលវីយ៉ូ ប៊ែរលូស្កូនី (Silvio Berlusconi) បានស្នើឲ្យសហភាពអឺរ៉ុបពិនិត្យឡើងវិញ ទៅលើលក្ខខណ្ឌនៃការអនុវត្តកិច្ចព្រមព្រៀង Schengen ។ ប្រមុខដឹកនាំបារាំង និងអ៊ីតាលី ចង់ឲ្យមានការធ្វើកំណែទម្រង់ ដើម្បីទុកលទ្ធភាពឲ្យរដ្ឋជាសមាជិក ធ្វើការត្រួតពិនិត្យព្រំដែនរបស់ខ្លួន ក្នុងករណីប្រទេសសមាជិកផ្សេងទៀត មិនអាចទប់ទល់នឹងបញ្ហាជនអន្តោប្រវេសន៍ខុសច្បាប់មកពីខាងក្រៅសហភាពអឺរ៉ុប។
គួរបញ្ជាក់ថា យោងតាមកិច្ចព្រមព្រៀង Schengen ការដាក់ពង្រាយកម្លាំងប៉ូលិស ដើម្បីធ្វើការឆែកឆេរនៅតាមព្រំដែនរវាងប្រទេសជាសមាជិក ត្រូវបានហាមឃាត់។ ការឆែកឆេរតាមព្រំដែនអាចធ្វើទៅបានតែក្នុងករណីមានការគំរាមកំហែងដល់សណ្តាប់ធ្នាប់សាធារណៈ ឬដល់សន្តិសុខជាតិប៉ុណ្ណោះ។ ការឆែកឆេរនេះអាចធ្វើទៅបានតែក្នុងរយៈពេលយ៉ាងយូរបំផុត ៣០ថ្ងៃ។
ក្រោយពីមានចលនាជនអន្តោប្រវេសន៍ខុសច្បាប់ហូរចូលមកពីប្រទេសទុយនីស៊ី ឆ្លងកាត់តាមប្រទេសអ៊ីតាលី រដ្ឋាភិបាលបារាំងចង់បញ្ចូលករណីអន្តោប្រវេសន៍ខុសច្បាប់ ទៅក្នុងករណីពិសេសខាងលើ។ ម្យ៉ាងទៀត បារាំងចង់ឲ្យការត្រួតពិនិត្យព្រំដែននេះ អាចធ្វើទៅបានរហូតទាល់តែបញ្ហាអន្តោប្រវេសន៍ខុសច្បាប់ត្រូវដោះស្រាយចប់ ពោលគឺអាចលើសពី ៣០ថ្ងៃ។
គួររំឭកឡើងវិញថា បារាំង និងអ៊ីតាលីបានពាក់មុខយក្សដាក់គ្នា ក្រោយពីអាជ្ញាធរអ៊ីតាលីបានសម្រេចចេញលិខិតឆ្លងដែនបណ្តោះអាសន្នឲ្យជនអន្តោប្រវេសន៍ខុសច្បាប់មកពីទុយនីស៊ី ដើម្បីឲ្យពួកគេធ្វើដំណើរមកប្រទេសបារាំង។ ឆ្លើយតបមកវិញ កាលពីចុងសប្តាហ៍មុន បារាំងបានបិទផ្លូវដែក មិនឲ្យរទេះភ្លើងអ៊ីតាលីឆ្លងកាត់ព្រំដែន ស្ទើរតែពេញមួយថ្ងៃ ដោយសារតែនៅលើរទេះភ្លើងនោះ មានជនអន្តោប្រវេសន៍ខុសច្បាប់ ដែលកាន់លិខិតឆ្លងដែនបណ្តោះអាសន្នចេញដោយអាជ្ញាធរអ៊ីតាលី។
បារាំងចង់ឲ្យសហភាពអឺរ៉ុបលើកយកសំណើធ្វើកំណែទម្រង់កិច្ចព្រមព្រៀង Schengen ទៅពិភាក្សាគ្នា ក្នុងពេលប្រជុំក្រុមប្រឹក្សាអឺរ៉ុប នៅខែមិថុនា ខាងមុខនេះ។ កំណែទម្រង់នេះអាចធ្វើទៅរួច លុះត្រាតែមានការព្រមព្រៀងជាឯកច្ឆន្ទ ពីសំណាក់ប្រទេសជាសមាជិក ដែលសព្វថ្ងៃមានរហូតដល់ទៅ ២៥ប្រទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ