អ៊ីតាលីផ្ទុះកំហឹងរឿងបារាំងបិទមិនឲ្យរទេះភ្លើងអ៊ីតាលីឆ្លងកាត់ព្រំដែន
ជាយូរណាស់មកហើយ ដែលព្រំដែនរវាងប្រទេសនៅសហភាពអឺរ៉ុបត្រូវបានលុបចោលទាំងស្រុង។ ក៏ប៉ុន្តែ នៅថ្ងៃអាទិត្យ ១៧ មេសា ២០១១នេះ ចរាចរណ៍តាមរថភ្លើងរវាងអ៊ីតាលី និងបារាំង ត្រូវបានអាជ្ញាធរបារាំងបិទ រហូតដល់ម៉ោង ៧យប់។ មូលហេតុ គឺបណ្តាលមកពីមានការខ្វែងគំនិតគ្នា ជុំវិញជនអន្តោប្រវេសន៍ខុសច្បាប់ ដែលអ៊ីតាលីបណ្តោយឲ្យធ្វើដំណើរចូលមកក្នុងទឹកដីបារាំង។ រដ្ឋមន្រ្តីក្រសួងការបរទេសអ៊ីតាលីបានបញ្ជាឲ្យឯកអគ្គរដ្ឋទូតប្រចាំ ទីក្រុងប៉ារីស ធ្វើការតវ៉ាជាផ្លូវការទៅកាន់រដ្ឋាភិបាលបារាំង អំពីការបិទព្រំដែននេះ។
ចុះផ្សាយនៅថ្ងៃ៖
ការពន្យល់របស់សេង ឌីណា
នៅម៉ោង១២ថ្ងៃត្រង់ ថ្ងៃអាទិត្យ បាតុករជនជាតិបារាំង និងអ៊ីតាលី ប្រមាណ ៣០០នាក់ បានជួបជុំគ្នា គ្រោងធ្វើដំណើរតាមរថភ្លើង ដើម្បីអមដំណើរជនអន្តោប្រវេសន៍ជនជាតិទុយនីស៊ី ដែលចង់ធ្វើដំណើរចេញពីអ៊ីតាលី ឆ្ពោះទៅកាន់ប្រទេសបារាំង។ ក៏ប៉ុន្តែ ទាំងបាតុករ និងជនជាតិទុយនីស៊ី បានត្រូវជាប់គាំងនៅត្រឹមព្រំដែន ក្រោយពីរដ្ឋាភិបាលបារាំង បានសម្រេចបិទផ្លូវរទេះភ្លើង មិនឲ្យឆ្លងព្រំដែន។
រដ្ឋាភិបាលអ៊ីតាលីបានផ្ទុះកំហឹងយ៉ាងខ្លាំង ចំពោះវិធានការរបស់អាជ្ញាធរបារាំងនេះ ដោយបានចោទបារាំងថាបានរំលោភលើគោលការណ៍របស់សហភាពអឺរ៉ុប។ អ៊ីតាលីបានលើកឡើងថា ជនអន្តោប្រវេសន៍ទុយនីស៊ីមានឯកសារធ្វើដំណើរស្របច្បាប់ ដែលចេញដោយអាជ្ញាធរអ៊ីតាលី។ យោងតាមអនុសញ្ញា Schengen (ស្តីពីការលុបព្រំដែនរវាងប្រទេសក្នុងសហភាពអឺរ៉ុប) ជនជាតិទុយនីស៊ីទាំងនោះ មានសិទ្ធិធ្វើដំណើរទៅកាន់ប្រទេសបារាំង ក៏ដូចជាទៅប្រទេសផ្សេងទៀត ដែលជាហត្ថលេខីនៃអនុសញ្ញា Schengen ។
គួរបញ្ជាក់ថា ចាប់តាំងពីមានចលនាបដិវត្តន៍នៅអាហ្វ្រិកខាងជើងមក មានជនអន្តោប្រវេសន៍ប្រមាណជាង ២ម៉ឺននាក់ ភាគច្រើន មកពីប្រទេសទុយនីស៊ី បានលួចឆ្លងដែនដោយខុសច្បាប់ ចូលទៅក្នុងប្រទេសអ៊ីតាលី។ ក្នុងចំណោមជនអន្តោប្រវេសន៍ខុសច្បាប់នេះ មានតិចតួចប៉ុណ្ណោះ ដែលជាជនភៀសខ្លួននយោបាយ។ មួយចំនួនធំ គឺជាជនអន្តោប្រវេសន៍ដែលចង់ទៅរស់នៅ និងធ្វើការនៅអឺរ៉ុប។
ដោយមិនចង់ទទួលរ៉ាប់រងបញ្ហាជនអន្តោប្រវេសន៍ខុសច្បាប់នេះតែម្នាក់ឯង រដ្ឋាភិបាលអ៊ីតាលីបានសម្រេចចេញប័ណ្ណស្នាក់នៅ និងលិខិតឆ្លងដែនបណ្តោះអាសន្នទៅឲ្យជនអន្តោប្រវេសន៍ខុសច្បាប់ទាំងនោះ ដើម្បីឲ្យពួកគេធ្វើដំណើរចេញពីអ៊ីតាលី ទៅកាន់ប្រទេសផ្សេងទៀត នៅក្នុងសហភាពអឺរ៉ុប ជាពិសេស គឺប្រទេសបារាំង ដែលមានជនជាតិទុយនីស៊ីរស់នៅច្រើន។
នៅពេលបច្ចុប្បន្ននេះ នៅបារាំង បញ្ហាជនអន្តោប្រវេសន៍កំពុងតែជាប្រធានបទដ៏ក្តៅគគុកមួយ ក្នុងយុទ្ធនាការរកសំឡេងឆ្នោត សម្រាប់ការបោះឆ្នោតប្រធានាធិបតី នៅឆ្នាំក្រោយនេះ។ គណបក្សកាន់អំណាចបារាំង កំពុងតែយករឿងកាត់បន្ថយជនអន្តោប្រវេសន៍មកធ្វើជាគោលនយោបាយចម្បង នៅក្នុងការបោះឆ្នោតប្រធានាធិបតីនេះ។ រដ្ឋាភិបាលរបស់លោកសាកូហ្ស៊ី មិនមែនចង់កាត់បន្ថយត្រឹមតែជនអន្តោប្រវេសន៍ខុសច្បាប់នោះទេ។ សូម្បីតែជនអន្តោប្រវេសន៍ស្របច្បាប់ ក៏គ្រោងនឹងកាត់បន្ថយដែរ។ កាលពីពេលថ្មីៗនេះ រដ្ឋមន្រ្តីក្រសួងមហាផ្ទៃបារាំងបានលើកឡើងថា បារាំងគ្រោងនឹងកាត់បន្ថយចំនួនជនបរទេស ដែលចង់ចូលមកធ្វើការនៅក្នុងប្រទេសបារាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ