ប្រទេសរុស្ស៊ីមិនអាចវិលត្រឡប់ទៅកាន់របបគ្រប់គ្រងផ្តាច់ការវិញឡើយ
សេចក្តីនេះលើកឡើងរសៀលម្សិលមិញដោយលោកនាយករដ្ឋមន្ត្រីរុស្ស៊ី ពូទីនជាចម្លើយតបនឹងសំណួរយុវនារីម្នាក់ដែលចូលរួមក្នុង “វេទិកាបណ្តុះបណ្តាលយុវជនអន្តរជាតិ” ក្រោមឈ្មោះថា“ វេទិកាSeliguer ឆ្នាំ២០១១ ”ដែលថ្ងៃនេះ បញ្ចប់ការងាររយៈពេលមួយខែរបស់ខ្លួន។ មហាវេទិកានេះ ចូលរួមដោយយុវជន២ម៉ឺននាក់ មកពីខេត្តចំនួនទាំង៨៣នៃសហព័ន្ធរុស្ស៊ីនិងមកពីរដ្ឋបរទេសចំនួនជាង ៨០ដែរ។
ចុះផ្សាយនៅថ្ងៃ៖
ស្តាប់ - ០២:០៣
គឺម្សិលមិញដែលលោកនាយករដ្ឋមន្ត្រីពូទីនជាបុរសខ្លាំងនៅរុស្ស៊ី បានអញ្ជើញទៅជាអធិបតីជាន់ខ្ពស់ក្នុងវេទិកានោះ ដែលប្រព្រឹត្តទៅមួយឆ្នាំម្តងតាំងពីឆ្នាំ២០០៥ មកនៅមាត់បឹងឈ្មោះ Seliguer ក្នុងខេត្ត Tver ចម្ងាយប្រមាណ ២៦០គ.ម.ពាយព្យពីរដ្ឋធានីម៉ូស្គូ។
រីឯសំណួរគឺបានត្រូវបន្លឺឡើងដោយនារីប្រតិភូម្នាក់ដែលតែងចិញ្ចឹមទុកនូវសមានចិត្តខ្លួនចំពោះរបបគ្រប់គ្រងដោយកណ្តាប់ដៃដែកដូចមេកាន់អំណាចផ្តាច់ការសូវៀត Staline អ៊ីចឹង។
ក្នុងបទអន្តរាគមន៍ពន្យល់បំភ្លឺទៅនារីនោះ លោកពូទីនគូសបញ្ជាក់ថា គឺជាការមិនអាចកើតមានទៅរួចឡើយការបង្វែរប្រទេសរុស្ស៊ីទៅកាន់របបគ្រប់គ្រងតាមរូបភាពផ្តាច់ការដ្បិតរបបនេះ មិនអាចមានប្រសិទ្ធិភាពទេ។ វានឹងនាំតែទៅកាន់ភាពទ័លច្រកប៉ុណ្ណោះ ក្នុងលក្ខណៈបច្ចុប្បន្ន។ មូលហេតុមកពីគ្រប់តែធាតុផ្សំនៃរបបផ្តាច់ការគឺជាធាតុអកុសលសុទ្ធសាធ៖
ទី១-របបគ្រប់គ្រងតាមរូបភាពផ្តាច់ការគឺរំងាប់ សេរីភាព និងគំនិតឆ្នៃប្រឌិតបង្កបង្កើតរបស់បុគ្គល។
ទី២-ដោយហេតុថា ផលវិបាកនៃរបបគ្រប់គ្រងនេះ ជះចំហាយសែនអាក្រក់ទៅលើវិស័យសេដ្ឋកិច្ច សង្គមកិច្ច និងនយោបាយបានជារដ្ឋដែលស្ថិតនៅក្រោមការគ្រប់គ្រងនៃរបបផ្តាច់ការមុខជានឹងជាប់ក្នុងទំនាយត្រូវតែរលំរលាយទៅដូចសហភាពសូវៀតអ៊ីចឹង។
លោកពូទីនក៏បន្ថែមថា ក្រោយពីសហភាពសូវៀតរលាយទៅប្រទេសរុស្ស៊ីដែលបន្តមរតកពីសហភាពនោះ បានឆ្លងកាត់ កាលសម័យយ៉ាប់យ៉ឺនក្រៃ ពីព្រោះរលាយបាត់ទៅទាំងការកសាងសេដ្ឋកិច្ចតាមវិធីចាស់ដែលធ្លាប់មានទាំងវិស័យធានារ៉ាប់រងសង្គមដ៏កក់ក្តៅដែលធ្លាប់មានហើយប្រជាពលរដ្ឋមួយចំនួនធំ ស្រាប់តែធ្លាក់ខ្លួនក្រីក្ររួចនៅទីបំផុតមានផ្ទុះឡើងជា “សង្គ្រាមបង្ហូរឈាម” នៅតំបន់ភ្នំកូកាសទៅផង។
ប៉ុន្តែអស់ទាំងនេះ មិនមែនជាសញ្ញានៃភាពហិនហោចទេវាគ្រាន់តែជាសញ្ញានៃជម្ងឺប៉ុណ្ណោះ ដែលក្រោយពីងើបពីឈឺទៅ ប្រទេសរុស្ស៊ីបែរទៅជាមានសុខភាពកាន់តែមាំមួនទៅវិញ ពីព្រោះភាពស៊ាំនឹងជម្ងឺរបស់ប្រទេសរុស្ស៊ីមានកម្រិតកើនខ្ពស់ឡើងទៅវិញលោកពូទីនបញ្ចប់សេចក្តី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ