ភាពតានតឹងរវាងប៉ារីសនិងប៊ែរឡាំងស្តីពីតួនាទីរបស់ធនាគារកណ្តាលអឺរ៉ុប
ទីផ្សារមូលបត្រនៅអឺរ៉ុបបានស្គាល់ការធ្លាក់ស្រុតចុះនៅថ្ងៃអង្គារនិងថ្ងៃពុធទី២៣វិច្ឆិកាឆ្នាំ២០១១នេះ ដោយហេតុតែមានភាពតានតឹងកើតមានរវាងប្រទេសអាល្លឺម៉ង់និងប្រទេសបារាំងពាក់ព័ន្ធនឹងតួនាទីរបស់ធនាគារកណ្តាលអឺរ៉ុបក្នុងការរិះរកដំណោះស្រាយជួយប្រាក់អឺរ៉ូ។ នៅទីក្រុងប៊ែរឡាំងឯណោះ លោកស្រីនាយករដ្ឋមន្ត្រីអាល្លឺម៉ង់ Angela Merkel បានថ្លែងបញ្ជាក់ម្តងទៀតនៅថ្ងៃអង្គារម្សិលមិញថា ប្រទេសអាល្លឺម៉ង់ប្រឆាំងនឹងការធ្វើអន្តរាគមន៍របស់ធនាគារកណ្តាលអឺរ៉ុប។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៧
លោកស្រីនាយករដ្ឋមន្ត្រីអាល្លឺម៉ង់ Angela Merkel លោករដ្ឋមន្ត្រីក្រសួងហិរញ្ញវត្ថុហើយនិងលោកប្រធានធនាគារកណ្តាលអាល្លឺម៉ង់ បានសម្តែងឲ្យឃើញនៅថ្ងៃអង្គារម្សិលមិញនូវការប្រឆាំងរបស់គេទល់នឹងការធ្វើអន្តរាគមន៍របស់ធនាគារកណ្តាលអឺរ៉ុប។ អ្នកដែលមានទស្សនៈយល់ឃើញខុសពីអ្នកដឹកនាំអាល្លឺម៉ង់យល់ថា អន្តរាគមន៍របស់ធនាគារកណ្តាលអឺរ៉ុបគឺពិតជាឧបករណ៍មួយដ៏ប្រពៃសម្រាប់ជួយកាត់បន្ថយសម្ពាធដែលមាននៅក្នុងតំបន់អឺរ៉ូ។ តំបន់ចាយប្រាក់អឺរ៉ូដែលកំពុងតែជួបនឹងវិបត្តិប្រាក់បំណុលសាធារណៈដ៏សែនធ្ងន់ធ្ងរ។ ហើយពួកគេយល់ឃើញទៀតថា ការទិញសញ្ញាប័ណ្ណអឺរ៉ូក្នុងកម្រិតអត្រាការប្រាក់តែមួយគត់សម្រាប់តំបន់អឺរ៉ូទាំងមូលគឺពិតជាមធ្យោបាយដោះស្រាយមួយដ៏ប្រសើរសម្រាប់ជួយបន្ធូរគំនាបនៃវិបត្តិហិរញ្ញវត្ថុដែលកំពុងតែកើតមាននៅក្នុងតំបន់អឺរ៉ូ។
ក៏ប៉ុន្តែ ប្រទេសអាល្លឺម៉ង់បដិសេធសំណើខាងលើនេះ ដោយទីក្រុងប៊ែរឡាំងយល់ថា ទាំងនេះនឹងធ្វើឲ្យប៉ះពាល់ដល់ឯករាជភាពរបស់ធនាគារកណ្តាលអឺរ៉ុប ដែលមានតួនាទីសម្រាប់ជួយរក្សាឲ្យមានស្ថិរភាពនិងប្រយុទ្ធប្រឆាំងទល់នឹងបញ្ហាទំនិញឡើងថ្លៃ។
សម្រាប់លោកស្រីនាយករដ្ឋមន្ត្រីអាល្លឺម៉ង់ Angela Merkel គេត្រូវតែធ្វើការវាយប្រយុទ្ធទៅលើឫសគល់ពិតៗដែលបានបង្កបង្កើតចោទចេញជាវិបត្តិហិរញ្ញវត្ថុ ពោលគឺគេត្រូវតែមាន “វិធានច្បាប់យ៉ាងតឹងរ៉ឹង” ដាក់ទៅលើប្រទេសណាដែលពុំគោរពវិន័យ ហើយនិងពុំបានគ្រប់គ្រងថវិកាជាតិរបស់ខ្លួនឲ្យបានត្រឹមត្រូវ។ ក៏ប៉ុន្តែ ដៃគូដ៏សំខាន់របស់ប្រទេសអាល្លឺម៉ង់មានដូចជាប្រទេសបារាំងជាដើមនៅតែសង្ឃឹមថា ប្រទេសអាល្លឺម៉ង់ក្រោមការដឹកនាំរបស់ លោកស្រីនាយករដ្ឋមន្ត្រី Angela Merkel គង់តែប្តូរប្រែបន្ទន់ជំហររបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ