ការរិះរកដំណោះស្រាយឲ្យបញ្ហាប្រាក់បំណុលអឺរ៉ុបបានជឿនលឿនទៅមុខ
ក្រុមប្រទេសឧស្សាហកម្មG20 ជួបប្រជុំគ្នានៅថ្ងៃសៅរ៍ម្សិលមិញនៅទីក្រុងប៉ារីសបានទទួលស្គាល់ថា ការស្វែងរកដំណោះស្រាយឲ្យបញ្ហាប្រាក់បំណុលដោយប្រទេសតំបន់អឺរ៉ូបាន ជឿនលឿនទៅមុខ។ ក៏ប៉ុន្តែពួកគេបារម្ភខ្លាចបញ្ហាប្រាក់បំណុលទាំងនេះធ្វើឲ្យប៉ះពាល់ ដល់កំណើនសេដ្ឋកិច្ចពិភពលោក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
នាឱកាសជំនួបក្រុមប្រទេសG20 នៅថ្ងៃសៅរ៍ទី១៥តុលាឆ្នាំ២០១១នៅទីក្រុងប៉ារីស លោករដ្ឋមន្ត្រីក្រសួងហិរញ្ញវត្ថុអាមេរិក Timothy Geithner បានថ្លែងថា “យើងបានឮសំណើដ៏គួរឲ្យពេញចិត្តពីសំណាក់សហសេវិកអឺរ៉ុបពាក់ព័ន្ធនឹងផែនការថ្មីដើម្បីរិះរកដំណោះស្រាយសម្រាប់ប្រយុទ្ធទប់ទល់នឹងវិបត្តិប្រាក់បំណុល”។
ក៏ប៉ុន្តែ បញ្ហាហិរញ្ញវត្ថុសាធារណៈនៃប្រទេសឧស្សាហកម្មសំខាន់ៗទាំងនោះបានធ្វើឲ្យប៉ះពាល់ដល់សន្ទុះកំណើនសេដ្ឋកិច្ចពិភពលោក។ ហេតុដូច្នេះហើយបានជាលោកស្រី Christine Lagarde អគ្គនាយិកានៃមូលនិធិរូបិយវត្ថុអន្តរជាតិ FMI បានរំលឹកថា “ការវិវឌ្ឍន៍អវិជ្ជមាន”នារយៈពេលប៉ុន្មានសប្តាហ៍ចុងក្រោយនេះកំពុងតែធ្វើឲ្យប៉ះពាល់ដល់សេដ្ឋកិច្ចនៃប្រទេសកំពុងអភិវឌ្ឍន៍រីកចម្រើនខ្លាំង។
ឆ្លៀតឱកាសនេះ ប្រទេសកំពុងអភិវឌ្ឍន៍រីកចម្រើនខ្លាំងដូចជាប្រទេសចិននិងប្រទេសប្រេស៊ីលបានស្នើជំរុញឲ្យមានការពង្រឹងទៅលើមធ្យោបាយហិរញ្ញវត្ថុរបស់ មូលនិធិរូបិយវត្ថុអន្តរជាតិ FMI ដើម្បីជួយគាំទ្រអឺរ៉ុប នៅករណីដែលវិបត្តិហិរញ្ញវត្ថុរីករាលដាលដល់សេដ្ឋកិច្ចនៃប្រទេសអឺរ៉ុបសំខាន់ៗដូចជាប្រទេសអ៊ីតាលីឬប្រទេសអេស្ប៉ាញ។
ក៏ប៉ុន្តែ សំណើនេះពុំបានទទួលការគាំទ្រជាឯកច្ឆ័ន្ទឡើយ។ ប្រទេសបារាំងយល់ស្របតាមសំណើរបស់ប្រទេសចិននិងប្រទេសប្រេស៊ីល ប៉ុន្តែប្រទេសអាល្លឺម៉ង់និងសហរដ្ឋអាមេរិកមានការរួញរា។
គួរកត់សម្គាល់ថា ជំនួបប្រជុំនៃរដ្ឋមន្ត្រីក្រសួងហិរញ្ញវត្ថុនៃក្រុមប្រទេស G20 នៅថ្ងៃសៅរ៍ទី១៥តុលាឆ្នាំ២០១១នៅទីក្រុងប៉ារីស គឺធ្វើឡើងសម្រាប់រៀបចំជំនួបកំពូលនៃក្រុមប្រទេសឧស្សាហកម្ម G20 ដែលនឹងត្រូវប្រព្រឹត្តទៅនៅទីក្រុងកាននៅថ្ងៃទី៣និងទី៤វិច្ឆិកាឆ្នាំ២០១១ខាងមុខនេះ។ ហើយនៅចន្លោះពេលនោះ ក្រុមប្រទេសនៃតំបន់អឺរ៉ូត្រូវរិះរកដំណោះស្រាយឲ្យបញ្ហាបន្ទាន់សំខាន់ៗ មានដូចជាបញ្ហាជោគវាសនានៃប្រទេសក្រិកពាក់ព័ន្ធនឹងវិបត្តិប្រាក់បំណុល បញ្ហាចាក់បន្ថែមមូលធនចូលទៅក្នុងធនាគារអឺរ៉ុបដែលមានវិបត្តិ ហើយនិងធ្វើការពង្រឹង “មូលនិធិអឺរ៉ុបសម្រាប់រក្សាស្ថិរភាពហិរញ្ញវត្ថុ” Fonds Européen de Stabilité Financière (FESF)៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ