ខ្យល់ព្យុះត្រជាក់សម្លាប់មនុស្សពីរនាក់ នៅអង់គ្លេស
បុរស និងស្រ្តីពីរនាក់បានស្លាប់នៅក្នុងគ្រោះថ្នាក់ខ្យល់ព្យុះ ដែលបានបក់បោកខ្លាំងទៅលើប្រទេសអង់គ្លេស កាលពីថ្ងៃសុក្រ។ រហូតមកដល់ល្ងាចថ្ងៃសៅរ៍ ខ្យល់ព្យុះ នៅរដូវត្រជាក់បង្កឲ្យ រលំបាក់ដី ចំណែកចរន្តអគ្គិសនី ផ្លូវធ្វើដំណើរ ត្រូវកាត់ផ្តាច់ នៅជាច្រើនកន្លែង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៣
អង់គ្លេសនៅមិនទាន់ចាកផុតពីគ្រោះមហន្តរាយខ្យល់ព្យុះ ដែលបានយាយីអង់គ្លេស អស់ប៉ុន្មានសប្តាហ៍ មកហើយ។ នៅទីក្រុងឡុងដ៍ ស្រ្តីម្នាក់បានស្លាប់នៅក្នុងរថយន្តដែលត្រូវដើមឈើរលំ បាក់សង្កត់លើ។ ភាគខាងត្បូងប្រទេសអង់គ្លេសរងគ្រោះខ្លាំង ដោយខ្យល់ព្យុះទឹកភ្លៀង។ អ្នកដំណើរវ័យ៨៥ឆ្នាំបានស្លាប់ និងមនុស្សជាច្រើននាក់ផ្សេងទៀតរងរបួស នៅពេលខ្យល់បក់បោកខ្លាំងទៅលើកប៉ាល់ទេសចរណ៍។
មនុស្សជាង៣០នាក់ត្រូវបានជម្លៀសចេញជាបន្ទាន់ពីភោជនីយដ្ឋានមួយ ដោយសារតែខ្យល់វាយបំបែកបង្អួចកញ្ចក់។ ចំណែកមនុស្សពីរនាក់ដែលដើរលេងភ្នំពីរនាក់ត្រូវបានអាជ្ញាធរប្រកាសបាត់ខ្លួន នៅអេកូស កាលពីថ្ងៃសៅរ៍។
ខ្យល់ព្យុះពេញមួយយប់ថ្ងៃសុក្រ បានធ្វើឲ្យសម្បែងប្រជាជនអង់គ្លេសជាងមួយសែន បួនម៉ឺនខ្នងគ្មានអគ្គិសនីប្រើប្រាស់ នៅថ្ងៃសៅរ៍នេះ។ អាជ្ញាធររកឃើញដើមឈើរលើងឬសជាង១២០ដើម ដែលរលំបាក់ ឃាំងផ្លូវរថយន្ត និងផ្លូវរទេះភ្លើង ជាង១០នៅភាគខាងត្បូងអង់គ្លេស។
រហូតមកដល់ល្ងាចថ្ងៃសៅរ៍ខ្យល់ព្យុះ នៅមិនទាន់ថមថយកម្លាំង ដោយនៅតែរត់ក្នុងល្បឿន ១៣០គីឡូម៉ែត្រ ក្នុងមួយម៉ោង។ អ្នកព្យាករឧតុនិយមអង់គ្លេសបានព្រមានពីគ្រោះទឹកជំនន់ទឹកភ្លៀងជាថ្មី នៅពេលដែលតំបន់ជាច្រើនរបស់អង់គ្លេសកំពុងត្រាំនៅក្នុងទឹកជំនន់រួចទៅហើយនោះ។ ភ្លៀងនៅបន្តធ្លាក់ខ្លាំងនៅថ្ងៃសៅរ៍ ហើយភាពស្ងប់ស្ងាត់នឹងអាចមានវិញ នៅថ្ងៃអាទិត្យនេះ។
នៅភាគពាយ័ព្យប្រទេសបារាំងវិញ ខេត្ត ជាប់សមុទ្រ ដែលស្ថិតនៅមិនឆ្ងាយប៉ុន្មានពីប្រទេសអង់គ្លេស រងប៉ះពាល់ខ្លាំងណាស់ដែរពីខ្យល់ព្យុះអុលឡា។ ខ្យល់ព្យុះដែលសំដៅសមុទ្រភាគខាងជើងបារាំងកាលពីថ្ងៃសៅរ៍ បានកាត់ផ្តាច់អគ្គិសនីរបស់ផ្ទះប្រជាជនបារាំង ជាង ១សែននាក់។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ