ខ្ញុំជាស្ហារលី (Je suis Charlie)
នៅថ្ងៃព្រហស្បតិ៍ ទី៨ មករា ២០១៥ ដែលជាថ្ងៃកាន់ទុក្ខទូទាំងប្រទេសបារាំង ចំពោះជនរងគ្រោះក្នុងការវាយប្រហារភេរវកម្ម ទៅលើសារព័ត៌មានស្ហារលីអិបដូ (Charlie Hebdo ថ្នាក់ដឹកនាំប្រព័ន្ធផ្សព្វផ្សាយព័ត៌មានធំៗជាច្រើនទៀតនៅបារាំង ក្នុងនោះក៏មានវិទ្យុបារាំងអន្តរជាតិផងដែរ បានថ្លែងសារ ដើម្បីចូលរួមរំលែកទុក្ខដល់ជនរងគ្រោះ ដែលជាមិត្តរួមអាជីព និងដើម្បីបង្ហាញពីភាពមិនចុះញ៉មក្នុងបេសកកម្មការពារសិទ្ធិសេរីភាពក្នុងការបញ្ចេញមតិ។
ចុះផ្សាយនៅថ្ងៃ៖ កែប្រែថ្ងៃទី៖
ខ្ញុំជាស្ហារលី (Je suis Charlie)
កាលពីពុធទី ៧ មករា នៅទីក្រុងប៉ារីស សារព័ត៌មានស្ហារលីអិបដូ (Charlie Hebdo) បានទទួលរងការវាយប្រហារភេរវកម្ម។ មនុស្ស ១២នាក់ត្រូវបាត់បង់ជីវិត។ ជនរងគ្រោះគឺជាអ្នកសារព័ត៌មាន ជាភ្នាក់ងារប៉ូលិស ជាមិត្តរបស់យើង។ ក្នុងនាមប្រព័ន្ធផ្សព្វផ្សាយទាំងអស់របស់បារាំង យើងសូមចូលរួមរំលែកទុក្ខដ៏សែនក្រៀមក្រំបំផុត ចំពោះជនរងគ្រោះដែលជាមិត្តរួមអាជីព ព្រមទាំងក្រុមគ្រួសារ ចំពោះអ្នកដែលបានបូជាជីវិត ដើម្បីការពារសុវត្ថិភាពរបស់ពួកគេ និងចំពោះសហការីទាំងអស់របស់សារព័ត៌មានស្ហារលីអិបដូ។
ការវាយប្រហារទៅលើសារព័ត៌មានស្ហារលីអិបដូ គឺជាការវាយប្រហារទៅលើសិទ្ធិសេរីភាពបញ្ចេញមតិ និងជាពិសេស វាយប្រហារទៅលើគោលគំនិតនៃសិទ្ធិសេរីភាព។ សារព័ត៌មានបែបត្លុកកំប្លែងគឺជាអ្នកដាស់តឿននិងអង្រួនមនសិការបស់យើង ឲ្យយើងចេះគិតពិចារណា ដើម្បីចៀសវាងនូវការរើសអើងប្រកាន់ពូជសាសន៍និងសាសនា និងចៀសវាងគំនិតជ្រុលនិយម។ អ្នកដែលបានបាត់បង់ជីវិតកាលពីម្សិលមិញ គឺជាអ្នកដែលបានធ្វើឲ្យជីវិតរបស់យើងប្រកបទៅដោយសំណើចសប្បាយ ដើម្បីឲ្យយើងបានជាមនុស្សដែលមានសិទ្ធិសេរីភាព។
នៅពេលនេះ លើសជាងពេលណាៗទាំងអស់ សិទ្ធិសេរីភាពក្នុងការគិត និងការបញ្ចេញមតិ គឺជាមូលដ្ឋានគ្រឹះនៃអាជីពរបស់យើងដែលជាអ្នកសារព័ត៌មាន។ នៅក្នុងទិវាកាន់ទុក្ខជាតិថ្ងៃនេះ យើងសូមបញ្ជាក់សាជាថ្មីម្តងទៀតថា យើងនឹងមិនចុះញ៉មចំពោះការគំរាមកំហែង ហើយក៏មិនចុះញ៉មចំពោះអំពើភេរវកម្មណាទាំងអស់។ យើងនឹងមិនទុកបណ្តោយឲ្យទង្វើអស់ទាំងនេះមកបំបិទមាត់របស់ពួកយើងជាដាច់ខាត ហើយយើងសូមប្រឆាំងដាច់ខាតចំពោះការរើសអើងតាមគ្រប់រូបភាពទាំងអស់។
ប្រព័ន្ធផ្សព្វផ្សាយបារាំងត្រៀមខ្លួនផ្តល់នូវប្រភពធនធានគ្រប់យ៉ាងដែលចាំបាច់ ទាំងធនធានមនុស្ស និងទាំងសម្ភារៈ ដើម្បីធ្វើយ៉ាងណាឲ្យសារព័ត៌មានស្ហារលីអិបដូអាចបន្តការផ្សាយរបស់ខ្លួនតទៅទៀត។ យើងចាំបាច់ត្រូវតែរួបរួមគ្នា ដើម្បីការពារសិទ្ធិសេរីភាពសារព័ត៌មាន ហើយយើងនឹងបន្តធ្វើ នៅក្នុងនាមអ្នកសារព័ត៌មានស្ហារលីអិបដូ។
មេដឹកនាំបណ្តាញសារព័ត៌មានបារាំង
Christopher Baldelli (RTL), Christophe Barbier (L'Express), Jean-Paul Baudecroux (NRJ), Pierre Bellanger (SKYROCK), Jérôme Bellay (Le Journal du Dimanche), Nicolas Beytout (L’Opinion), Véronique Cayla (ARTE), Matthieu Croissandeau (L’Obs), Nicolas de Tavernost (M6), Bruno Delport (Nova), Louis Dreyfus (Le Monde), Marc Feuillée (Le Figaro), Mathieu Gallet (Radio France), Etienne Gernelle (Le Point), Emmanuel Hoog (AFP), Jean Hornain (Le Parisien),Patrick Le Hyaric (L'Humanité), Gérard Leclerc (LCP-AN), Gilles Leclerc (Public Sénat), Bertrand Meheut (CANAL+), Francis Morel (Les Echos), Denis Olivennes (Lagardère Active / Europe 1), Nonce Paolini (TF1), Fabienne Pascaud (Télérama), Rémy Pflimlin (France Télévisions), Matthieu Pigasse (Les Inrockuptibles), Dominique Quinio (La Croix), Olivier Royant (Paris Match), Marie-Christine Saragosse (France Médias Monde), Jean-Christophe Tortora (La Tribune), Jean-Eric Valli (Les Indés Radio), Maurice Szafran (Le Magazine Littéraire), Alain Weill (NextRadioTV)
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ