ការប្រកាសសង្គ្រាមបច្ចេកវិទ្យារវាងក្រុមអនាមិក Anonymousនិងក្រុមសកម្មជនអ៊ីស្លាមនិយមជ្រុល
បន្ទាប់ពីភេវរកម្មនៅទីក្រុងប៉ារីសលើទស្សនាវដ្តីCharlie Hebdo គឺសង្រ្គាមព័ត៌មានវិទ្យាតាម អ៊ីនធ័រនែត រវាងក្រុមអនាមិក Anonymous ដែលសងសឹករកយុត្តិធម៌ឲ្យ Charlie Hebdo និងក្រុមសកម្មជនអ៊ីស្លាមនិយមជ្រុលដែលបានលួចលុកលុយក្នុងវិបសាយស្ថាប័នរាប់រយរបស់បារាំងនិងថ្មីៗនេះក្នុងគណនេយ្យ Twitter និង Youtube របស់ទីបញ្ជាការយោធាអាមេរិកនៅមជ្ឈឹមបូព៌ា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១១
ចាប់តាំងពីសោដនាដកម្មនៅទីក្រុងប៉ារីសដែលបានសំលាប់មនុស្សអស់១៧នាក់កាលពីសប្តាហ៍កន្លងទៅ វិបសាយស្ថាប័នរដ្ឋរាប់រយរបស់បារាំងត្រូវបានក្រុមចោរ Hackers លុកលុយ។
ក្នុងនោះរួមមាន វិបសៃតិ៍ របស់ឃុំសង្កាត់ ក្រុមប្រឹក្សាក្រុងសាលារៀន សាកលវិទ្យាល័យ ព្រះវិហារនិងសហគ្រាសមួយចំនួន។ ជា ក្រុមចោរព័ត៌មានវិទ្យាដែលបានឲ្យគេដឹងថាជាក្រុមសកម្មជនអ៊ីស្លាមនិយមជ្រុល ដែលបានប្រើនូវវិធីបច្ចេកទេសបង្វែងដានវិបសៃតិ៍ដែលគេឲ្យឈ្មោះថា Defacing ឬ Défaçage ដោយការគ្រប់គ្រងនិងកែប្រែគេហទំព័រនៃវិបសៃតិ៍នោះ ដើម្បីបិទផ្សាយនូវមនោគមន៍វិជ្ជាលើគេហទំព័រតាមរយៈពាក្យស្លោកលើ ទំព័រខាងក្រោយពណ៌ខ្មៅជាភាសាបារាំងនិងអង់គ្លេសដែលមានន័យដូចជា«មានតែព្រះអាទិទេពតែមួយគត់» «ស្លាប់ទៅប្រទេសបារាំង» «ស្លាប់ទៅ Charlie»។ បើតាមលោក Gérôme Billois អ្នកជំនាញនៅអឺរ៉ុបខាងសុវត្ថិភាពព័ត៌មានវិទ្យាបាន និយាយទៅកាន់សារព័ត៌មាន AFP ថាគាត់មិនដែលប្រទះឃើញនូវ ការប្រើបច្ចេកទេសបង្វែងដានវិបសាយដ៏ព្រោងព្រាតក្នុងរយៈពេលដ៏ខ្លីនោះទេ ប៉ុន្តែគាត់ពន្យល់ថា វិបសាយដែលរងផលប៉ះពាល់ដោយទង្វើនេះ ជាទូទៅមានរចនាសម្ព័ន្ធដែលមិនមានបុគ្គលិកបច្ចេកទេស គ្រប់គ្រាន់ដើម្បីរក្សាកម្រិតសន្ដិសុខចាំបាច់ឬដើម្បីមានប្រតិកម្មតបឲ្យបានរហ័ស នៅក្នុងករណីមាន ការវាយប្រហារ។
យ៉ាងណាមិញក្រុមអនាមិក Anonymous ដែលបានប្រកាសប្រមែប្រមូលគ្នាដើម្បីសងសឹករកយុត្តិធម៌ឲ្យ Charlie Hebdo ក៏បានប្រើនូវវិធីសាស្រ្តដូចគ្នានេះដើម្បីប្រឆាំងតបទៅនឹងទង្វើរបស់ក្រុមខាងលើដោយ ការវាយប្រហារលើវិបសៃតិ៍ឃោសនាមនោគមវិជ្ជាពួកជីហាដ និងក៏បានលុបគណនេយ្យ Twitter ចំនួន ៣៦ដែលគេសង្ស័យថាមានជាប់ទាក់ទងនឹងពួកជីហាដ ចេញពីបណ្តាញព្រមទាំងបានកាត់ផ្តាច់វិបសៃតិ៍ ansar-alhaqq.net ដែលជាវិបសៃតិ៍យោងមួយរបស់ពួកជីហាតចេញពីអ៊ីនធ័រនែតកាលពីថ្ងៃច័ន្ទនេះ។ ក្រុម Anonymous បានបង្ហាញនូវគោលគំនិតរបស់ក្រុមខ្លួនតាមពាក្យស្លោកថា « ប្រយុទ្ធដើម្បីការពារសេរីភាពនៃការបញ្ចេញមតិនិងគំនិត »។ ជាចលនាថ្មីមួយដែលមានគោលដៅស្របនឹងអជ្ញាធរ មានសមត្ថកិច្ចក៏ពិតមែន តែនៅពេលណាដែលសកម្មភាពរបស់ពួកគេតម្រង់ការវាយប្រហារលើ បណ្តាញទំនាក់ទំនងពួកជីហាដ វាក៏អាចជាការរំខានដល់ការងាររបស់ក្រុមអ្នកស៊ើបអង្កេតផងដែរ នេះបើតាមការពន្យល់របស់លោក Olivier Laurelli អ្នកសរសេរប្លុកនិងជំនាញខាងសន្តិសុខព័ត៌មានវិទ្យា។
ដោយឡែក គណនេយ្យ Twitter និង Youtube របស់ទីបញ្ជាការយោធាអាមេរិកនៅមជ្ឈឹមបូព៌ាក៏ទើបនឹងបានទទួលរងនូវការរំខានពីសំណាក់ក្រុមចោរព័ត៌មានវិទ្យាដែលបានប្រកាសថាខ្លួនជាអង្គការរដ្ឋអ៊ីស្លាម។ ភ្លាមៗនោះ លោក Steven Warren អ្នកនាំពាក្យរបស់មន្ទីរបញ្ចកោណ បានបញ្ជាក់ប្រាប់សារព័ត៌មានថា វាគ្រាន់តែជាគេលេងសើចប៉ុណ្ណោះ មិនមានអ្វីធំដុំទេ ព្រោះ Twitter និង Youtube ប៉ុណ្ណោះដែលទទួលរងការរំខាន មិនមែនបណ្តាញព័ត៌មានរបស់ទីបញ្ជាការយោធាអាមេរិកនៅមជ្ឈឹមបូព៌ានោះទេ។ ហើយវា ខុសគ្នាឆ្ងាយណាស់ រវាងការលុកលុយក្នុងគណនេយ្យ Twitter និងការលួចចូលក្នុងទិន្នន័យពត៌មានវិទ្យា នេះបើតាមការបំភ្លឺរបស់លោក Josh Earnest អ្នកនាំពាក្យសេតវិមាន។
ហេតុការណ៍នេះកើតឡើងព្រមគ្នានឹងពេលដែលអូបាម៉ាកំពុងបង្ហាញពី សេចក្តីព្រាងច្បាប់ជាច្រើន គោលដៅរឹតបន្តឹងបន្ថែមលើការការពារទិន្នន័យផ្ទាល់ខ្លួនលើអ៊ីនធ័រនែត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ