ក្រោយភេរវកម្មនៅប៉ារីសអ្នកកាន់សាសនាអ៊ីស្លាមបារាំងបារម្ភខ្លាចមានការរើសអើង
ចាប់តាំងពីមានភេរវកម្មនៅប៉ារីសមក ប្រជាជនបារាំងដែលកាន់សាសនាអ៊ីស្លាមកំពុងតែមានក្តីបារម្ភខ្លាចត្រូវក្លាយជាចំណុចស៊ីបនៃការវាយប្រហារសងសឹក ឬក៏ត្រូវទទួលរងនូវការរើសអើង។ គេសង្កេតឃើញថាចាប់តាំងពីមានការវាយប្រហារភេរវកម្មនៅប៉ារីសមក វិហារអ៊ីស្លាមជាច្រើនកន្លែង នៅក្នុងប្រទេសបារាំង ត្រូវទទូលរងនូវការវាយប្រហារពីជនមិនស្គាល់មុខ។
ចុះផ្សាយនៅថ្ងៃ៖
ស្តាប់ - ០២:០០
ការវាយប្រហារទៅលើអ្នកកាន់សាសនាអ៊ីស្លាមកំពុងតែកើតមានឡើង ចាប់តាំងពីមានភេរវកម្មនៅប៉ារីស ចាប់តាំងពីការសរសេរពាក្យជេរប្រមាថតាមបណ្តាញសង្គម រហូតដល់ការវាយប្រហារទៅលើវិហារសាសនាអ៊ីស្លាម។
ស្ថិតនៅក្នុងស្ថានភាពនេះហើយ ដែលប្រមុខដឹកនាំបារាំង ទាំងនាយករដ្ឋមន្រ្តី និងទាំងប្រធានាធិបតីបារាំង ព្រមទាំងមេដឹកនាំសាសនាអ៊ីស្លាមនៅបារាំង បានអំពាវនាវម្តងហើយម្តងទៀត កុំឲ្យមានការរើសអើងប្រកាន់គ្នាទៅវិញទៅមក ហើយជាពិសេស កុំឲ្យមានការច្រឡូកច្រឡំគ្នា រវាងភេរវកម្មនៃពួកជ្រុលនិយម និងអ្នកកាន់សាសនាអ៊ីស្លាមជាទូទៅ។
កាលពីយប់ថ្ងៃសៅរ៍ម្សិលមិញនេះ ក្រុមគ្រួសារជនរងគ្រោះ ដោយភេរវកម្មនៅប៉ារីស ក៏បានធ្វើការអំពាវនាវក្នុងន័យនេះផងដែរ។ ចំណែកឯក្រុមគ្រួសារភេរវជនវិញ បានចេញមុខថ្កោលទោសការវាយប្រហារភេរវកម្មនេះ។
គួរបញ្ជាក់ថា នៅក្នុងចំណោមជនរងគ្រោះទាំង ១៧រូប ដែលត្រូវភេរវជនអ៊ីស្លាមជ្រុលនិយមបាញ់សម្លាប់នៅប៉ារីស កាលពីប៉ុន្មានថ្ងៃកន្លងទៅនេះ ក៏មានអ្នកកាន់សាសនាអ៊ីស្លាមម្នាក់ដែរ គឺប៉ូលិសម្នាក់ ក្នុងចំណោមប៉ូលិសទាំងពីរនាក់ ដែលត្រូវបាត់បង់ជីវិតក្នុងការវាយប្រហារលើសារព័ត៌មាន Charlie Hebdo។ ប៉ូលិសរូបនេះមានឈ្មោះថា Ahmet Merabet វ័យ ៤០ឆ្នាំ ត្រូវបានភេរវជនបាញ់ឲ្យរបួសដួលនឹងដី មុននឹងចូលទៅបាញ់ក្បាលមួយគ្រាប់បន្ថែម។
នៅក្នុងសន្និសីទសារព័ត៌មាន កាលពីល្ងាចថ្ងៃសៅរ៍ ប្អូនប្រុសរបស់ Ahmet Merabet បានអំពាវនាវឲ្យបញ្ឈប់នូវរាល់ការរើសអើងប្រកាន់ពូជសាសន៍ និងសាសនា ហើយកុំឲ្យយកពួកអ៊ីស្លាមជ្រុលនិយម និងអ្នកកាន់សាសនាអ៊ីស្លាមទូទៅ ដាក់ក្នុងកន្រ្តកជាមួយគ្នា។
ប៉ុន្មានម៉ោងក្រោយមកទៀត ម្តាយរបស់ Amedy Coulibaly ភេរវជនដែលបាញ់ប្រហារលើប៉ូលិស និងចាប់ចំណាប់ខ្មាំងក្នុងហាងលក់ទំនិញជ្វីហ្វ ក៏បានចេញផ្សាយនូវសេចក្តីថ្លែងការណ៍មួយដែរ ក្នុងនាមក្រុមគ្រួសារទាំងមូល ដើម្បីចូលរួមរំលែកទុក្ខដល់ជនរងគ្រោះទាំងអស់ ព្រមទាំងថ្កោលទោសចំពោះទង្វើកូនប្រុសរបស់ខ្លួន ដោយលើកឡើងថា ទង្វើដ៏ឃោរឃៅតិរច្ឆានទាំងនេះ មិនមានអ្វីជាប់ពាក់ព័ន្ធនឹងសាសនាអ៊ីស្លាមនោះទេ។
គួរបញ្ជាក់ថា នៅក្នុងអំឡុងចាប់ចំណាប់ខ្មាំងនៅក្នុងហាងលក់ទំនិញជ្វីហ្វ Amedy Coulibaly បានអះអាងថា អ្វីដែលខ្លួនធ្វើនោះ គឺដើម្បីជាការសងសឹកឲ្យប្រជាជនប៉ាឡេស្ទីន។ ក៏ប៉ុន្តែ នៅថ្ងៃអាទិត្យនេះ អាជ្ញាធរប៉ាឡេស្ទីនបានអំពាវនាវឲ្យបណ្តាជនប៉ាឡេស្ទីនទាំងអស់នាំគ្នាចេញដើរដង្ហែរក្បួន ដើម្បីបង្ហាញនូវសាមគ្គីភាពជាមួយប្រជាជនបារាំង ក្នុងការប្រឆាំងនឹងភេរវកម្ម។ សូម្បីតែក្រុម Hamas នៅហ្កាហ្សា និងក្រុម Hezbollah នៅលីបង់ ដែលអ្នកខ្លះចាត់ទុកជាក្រុមអ៊ីស្លាមជ្រុលនិយមដែរនោះ ក៏បានប្រកាសថ្កោលទោសភេរវកម្មនៅប៉ារីសនេះដែរ។
ប្រមុខដឹកនាំក្រម Hezbollah គឺលោក Hassan Nasrallah បានលើកឡើងថា មានរូបត្លុកខ្លះគឺជាការជេប្រមាថដល់ព្យាការីមហាម៉ាត់ ក៏ប៉ុន្តែ ទង្វើរបស់ភេរវជនជ្រុលនិយមនៅប៉ារីស បានធ្វើឲ្យប៉ះពាល់ដល់កិត្តិយសសាសនាអ៊ីស្លាមជាងរូបត្លុកទាំងនេះទៅទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ