ស្វ៊ីសជាប់លេខជាប្រទេសមានភាពសុខដុមរមនាជាងគេនៅលើពិភពលោក
ស្វ៊ីសជាប្រទេសមានសុភមង្គលជាងគេនៅលើពិភពលោក ! បន្ទាប់មកគឺប្រទេសអ៊ីស្លង់ ដាណឺម៉ាក ន័រវេស និងកាណាដា។ នេះបើតាមរបាយការណ៍សិក្សាអន្តរជាតិស្តីអំពីសុភមង្គលនៅលើពិភពលោក ដែលចេញផ្សាយពីទីក្រុងញូវយ៉ក នៅល្ងាចថ្ងៃព្រហស្បតិ៍ម្សិលមិញ។
ចុះផ្សាយនៅថ្ងៃ៖
ហ្វាំងឡង់ ហូឡង់ ស៊ុយអែត នូវែលសេឡង់ និងអូស្ត្រាលី ស្ថិតក្នុងលំដាប់១០ប្រទេសដំបូងគេ ចំណែកសហរដ្ឋអាមេរិកជាប់លេខ១៥ ប្រទេសបារាំងជាប់លេខ២៩។ ឯប្រទេសនៅអាហ្វ្រិកវិញ ស្ថិតក្នុងលំដាប់ចុងប៉ូចបំផុត។
នេះគឺជាលើកទីបី ហើយដែលអ្នកស្រាវជ្រាវបានចេញរបាយការណ៍ស្តីអំពីសុភមង្គលនៅលើពិភពលោក ព្រោះការវាយតម្លៃ និងផ្តល់ចំណាត់ថ្នាក់ប្រទេសនីមួយៗ (១៥៨ប្រទេសនៅលើពិភពលោក) ទៅតាមកំរិតនៃភាពរីករាយនិងសុខដុមរមនារបស់ពលរដ្ឋ អាចមានឥទ្ធិពលជំរុញឱ្យអ្នកនយោបាយ និងរដ្ឋាភិបាលគិតគូរអំពីការដឹកនាំប្រទេសរបស់ខ្លួន។ របាយការណ៍លើកទីមួយ ត្រូវបានអង្គការសហប្រជាជាតិចេញផ្សាយនៅឆ្នាំ២០១២។
ដើម្បីអាចសម្រេចចេញជាសេចក្តីសន្និដ្ឋាន មានចំណាត់ថ្នាក់សម្រាប់ឆ្នាំ២០១៥នេះបាន អ្នកស្រាវជ្រាវបានផ្តោតការសិក្សាទៅលើចំណុចសំខាន់ៗមួយចំនួនដូចជា ៖ ការរស់រាន (អាយុវែងឬខ្លី)ប្រកបដោយសុខភាពល្អ -ប្រាក់ចំណូលប្រចាំឆ្នាំរបស់ពលរដ្ឋម្នាក់ៗ -ការគាំទ្ររបស់សង្គម តើមានទីពំនាក់អាស្រ័យបានប៉ុណ្ណា ? -ទំនុកចិត្តរបស់ពលរដ្ឋទៅលើអ្នកនយោបាយ ថាគ្មានប្រព្រឹត្តអំពើពុករលួយ ទៅលើសេរីភាពនៃជម្រើសជីវិត និងកំរិតនៃសប្បុរសធម៌។
អ្នកជាប់ចំណាត់ថ្នាក់១៣ដំបូងគេបង្អស់នៅលើពិភពលោក គឺជាប្រទេសដដែលដែលបានជាប់លេខកាលពីឆ្នាំ២០១៤ គ្រាន់ប្តូរលេខរៀងប៉ុណ្ណោះ។ ប្រទេសទាំងនោះ មានលក្ខខណ្ឌជីវិតរស់នៅ មានបានផង និងការគាំទ្រសង្គមខ្លាំងផង ហើយមានរដ្ឋាភិបាលជាអ្នកទទួលខុសត្រូវខ្ពស់ និងស្មោះត្រង់។ ចំណែកក្រុមប្រទេសក្នុងចំណាត់ថ្នាក់បន្តបន្ទាប់មក ខ្លះមិនសូវមានចំណូល ខ្លះមិនសូវមានជំនួយសង្គម និងខ្លះខ្វះទាំងពីរមុខតែម្តង។
របាយការណ៍បានបញ្ជាក់ទៀតថា ក្រៅអំពីលុយ ភាពស្មោះត្រង់ ទំនុកចិត្ត និងសុខភាព ដើរតួនាទីស្មើគ្នាក្នុងការទ្រទ្រង់ប្រទេសឱ្យមានសុភមង្គល។ វិបត្តិសេដ្ឋកិច្ច ឬគ្រោះធម្មជាតិ មិនប្រាកដនាំអពមង្គលដល់ប្រទេសជាតិឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ