លោកប្រធានាធិបតីរុស្ស៊ីរិះគន់អឺរ៉ុបថាដើរតែតាមខ្សែញាក់របស់អាមេរិក
គឺក្រុងវ៉ាស៊ីនតោន ដែលបានបញ្ឆេះឡើងវិញ នូវការរត់ប្រណាំងបំពាក់សព្វាវុធ ចំណែក ថ្នាក់ដឹកនាំសហភាពអឺរ៉ុប គប្បីតែចេះប្រកាន់យកគោលជំហរឯករាជ្យ ម្ចាស់ការណ៍ ខ្លួនឯងទៅ កុំអ្វីៗ រវល់តែសួរយោបល់ក្រុងវ៉ាស៊ីនតោន ជាមុនសិន ហើយជាធម្មតាទេ ដែលម៉ូស្គូ បង្ខំចិត្តការពារផលប្រយោជន៍ខ្លួន ប៉ុន្តែ រុស្ស៊ីឥតប្រាថ្នា មានជម្លោះ ជាមួយបស្ចិមលោកឡើយ -នេះ ជាខ្លឹមសារនៃបទសម្ភាសន៍ ដែលលោកពូទីន បានសប្បុរសឲ្យទៅ ទូរទស្សន៍ស្វ៊ីស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៧
បទសម្ភាសន៍លោកពូទីន ទៅកាណាល់ទូរទស្សន៍ស្វីស RTS បានក្លាយជាដំណឹងទី១ នៅតាមប្រព័ន្ធផ្សព្វផ្សាយរុស្ស៊ី ថ្ងៃ២៨កក្កដានេះ។ ក្នុងបទអន្តរាគមន៍ខ្លួន លោកប្រមុខរដ្ឋរុស្ស៊ី ចង្អុលឲ្យឃើញថា ៖ គឺក្រុងវ៉ាស៊ីនតោន ដែលជាមេបង្ក ឲ្យមានការរត់ប្រណាំងបំពាក់សព្វាវុធឡើងវិញ ដោយកាលពី ឆ្នាំ២០០១ បានដកខ្លួនចេញពី “សន្ធិសញ្ញាស្តីអំពីប្រព័ន្ធខែលមីស្ស៊ីលប្រឆាំងមីស្ស៊ីល” ចុះឆ្នាំ ១៩៧២ រវាងសហភាពសូវៀត និងស.រ.អា. ដ្បិតពិតជាសន្ធិសញ្ញានេះឯង ដែលបានបម្រើជា “ គ្រឹះមូលដ្ឋាន នៃ សន្តិសុខអន្តរជាតិទាំងមូល “។ រួចជំហានផងទាំងឡាយ ដែលបន្ទាប់មក ឈាន ដោយរុស្ស៊ី ជាប្រទេសបន្តកេរ្តិ៍ពីសហភាពសូវៀត គឺគ្រាន់តែជាចម្លើយបកវិញប៉ុណ្ណោះ។
ស្តីអំពីនយោបាយអាងយ៉ាង ផ្តាច់មុខរបស់ក្រុងវ៉ាស៊ីតោន ដែលសាយភាយ យុត្តាធិការអាមេរិក ទៅលើពិភពលោកទាំងមូល ដែលរុស្ស៊ីចាត់ទុកជា ”ការមិនអាចទទួលយកបាន” ព្រោះវា ”បំផ្លាញទំនាក់ទំនងអន្តរជាតិ” មេដឹកនាំរុស្ស៊ី ដោយ យោងទៅលើមតិពួកអ្នកវិភាគ នៅស.រ.អា. ផ្ទាល់ កត់សម្គាល់ថា នយោបាយបែបនេះ នៅទីបំផុត គឺនាំឲ្យខូចដល់ផលប្រយោជន៍អាមេរិក ទេតើ។
ដោយបញ្ចេញយោបល់ អំពីលទ្ធភាពផ្ទុះឡើងជា សង្គ្រាម នៅអឺរ៉ុប លោកពូទីន សំដែងសេចក្តី សង្ឃឹមថា សង្គ្រាមបែបនេះ មុខជានឹងត្រូវបញ្ចៀសបានផុតដូចចិត្តពុំខាន។ ប៉ុន្តែ ព្រមជាមួយ នេះ រុស្ស៊ីប្រាថ្នាឃើញ សហភាពអឺរ៉ុប ចេះបង្ហាញមកនូវ “ បន្ទាត់នយោបាយឯករាជ្យ និង អធិបតេយ្យ ឲ្យបានក្នុងកម្រិតខ្ពស់ ជាងសព្វថ្ងៃ”។ មូលហេតុ តាមដែលលោកពូទីន សង្កេត ឃើញ ពេលពិភាក្សាអំពីបញ្ហាផ្ទៃក្នុងអឺរ៉ុបសោះ ពួកដៃគូរបស់រុស្ស៊ី នៅអឺរ៉ុប រមែងបង្ខំចិត្តសួរ ទៅ ក្រុងវ៉ាស៊ីនតោនសិន ម៉្លោះហើយ បានជាតាមសម្តីលោកពូទីន សភាពការណ៍បែបនេះ ដូចជា “ចម្លែកបន្តិច”។
លោកពូទីនគូសបញ្ជាក់ថា រុស្ស៊ីឥតប្រាថ្នា មានជម្លោះ ជាមួយប្រទេសឯទៀតឡើយ ប៉ុន្តែ ក្រុងម៉ូស្គូ បង្ខំចិត្ត ការពារផលប្រយោជន៍ជាតិរុស្ស៊ីជានិច្ច ហើយ តទៅអនាគត នឹងពុំបោះបង់ គោលជំហរនេះសោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ