អូទ្រីសពង្រាយទ័ព៥០០នាក់ដើម្បីទប់លំហូរអន្តោប្រវេសន៍
អន្តោប្រវេសន៍រាប់រយៗនាក់ នៅតែបន្តសម្រុកឆ្លងព្រំដែនសែរប៊ី ចូលហុងគ្រី ដើម្បីបានចូលមកជ្រកកោនក្នុងទឹកដីអឺរ៉ុប។ ម្សិលមិញ ជាងពីរពាន់នាក់បានឆ្លងជញ្ជាំងព្រំដែនរួច ! ប្រទេសក្នុងតំបន់បាល់កង់ ដែលជារនាំងជួរមុខរបស់អឺរ៉ុប កំពុងរងសម្ពាធកាន់តែខ្លាំងៗឡើង។ អូទ្រីស ដែលជាប្រទេសម្ចាស់ផ្ទះទទួលរៀបចំជំនួប ស្តីពីបញ្ហាអន្តោប្រវេសន៍ នៅក្រុងវីយ៉ែន នៅថ្ងៃព្រហស្បតិ៍នេះ បានដាក់ពង្រាយទ័ពចំនួន៥០០នាក់ ដើម្បីជួយសម្រួលការងាររបស់អាជ្ញាធរទប់ទល់នឹងលំហូរអន្តោប្រវេសន៍។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
អូទ្រីសនឹងដាក់ពង្រាយទ័ព តាមដែលត្រូវការ ! នេះជាប្រសាសន៍របស់រដ្ឋមន្ត្រីការពារជាតិអូទ្រីសមុននឹងចូលប្រជុំគណៈរដ្ឋមន្ត្រីស្តីពីបញ្ហាអន្តោប្រវេសន៍។ នៅពេលនេះទាហាន៥រយនាក់ នឹងចេញជួយធ្វើសកម្មភាពសាងសង់ជំរំបណ្តោះអាសន្ន ព្រមទាំងចែកចាយស្បៀង។ ប៉ុន្តែការដាក់ពង្រាយទ័ពនៅតាមព្រំដែន ជាសេចក្តីសម្រេចចុងក្រោយ ! នេះបើតាមការគូសបញ្ជាក់បន្ថែមរបស់រដ្ឋមន្ត្រីក្រសួងមហាផ្ទៃអូទ្រីស។
អូទ្រីស ដែលមានព្រំប្រទល់ម្ខាងជាប់ អ៊ីតាលី និងម្ខាងទៀតជាប់ហុងគ្រី ត្រូវបានចាត់ទុកជាប្រទេសជួរមុខប្រឈមខ្លាំងនឹងចរន្តអន្តោប្រវេសន៍ដែរ បានស្នើផែនការ៥ចំណុច (បង្កើនការប្រយុទ្ធប្រឆាំងនឹងបណ្តាញមេខ្យល់ បែងចែងដោយស្មើភាពជនភៀសខ្លួនដល់ប្រទេសជាសមាជិកអឺរ៉ុប ពង្រឹងកិច្ចសហប្រតិបត្តិការសន្តិសុខ ជួយប្រទេសកំណើតរបស់ជនភៀសខ្លួន និងបង្កើតយុទ្ធសាស្ត្រផ្តល់សិទ្ធិជ្រកកោនថ្នាក់អឺរ៉ុប) ព្រមទាំងបង្កើតឱ្យមានក្រុមអ្នកសម្របសម្រួលមួយ ទទួលបន្ទុកកិច្ចការអន្តោប្រវេសន៍។ អន្តោប្រវេសន៍ដែលដោយចៀសមិនរួចនឹងក្លាយទៅជារបៀបវារៈដ៏សំខាន់នៃជំនួបអឺរ៉ុបថ្ងៃព្រហស្បតិ៍ស្អែកនេះ។
ក្នុងរយៈពេលមួយសប្តាហ៍ចុងក្រោយនេះ ចរន្តអន្តោប្រវេសន៍បានហូរមកដូចទឹកបាក់ទំនប់ ទាំងខាងសមុទ្ទមេឌីទែរ៉ាណេ ទាំងខាងច្រកបាល់កង់ខាងកើតអឺរ៉ុប។ ក្នុងពេលតែមួយយប់ថ្ងៃចន្ទឆ្លងចូលអង្គារសោះ អន្តោប្រវេសន៍ប្រមាណ២០៩៣នាក់បានឆ្លងចូលអឺរ៉ុបរួច តាមច្រកហុងគ្រី។ ជនភៀសខ្លួនទាំងឡានៗ ដែលគាំងដំណើរនៅប្រទេសម៉ាសេដ្វាន អស់ជាច្រើនថ្ងៃ បានសម្រុកចេញពីប្រទេសសែរប៊ី ឱ្យបានមុនការបញ្ចប់សំណង់រនាំងដែកបិទព្រំដែនហុងគ្រីទាំងស្រុងនៅថ្ងៃទី ៣១សីហា។
ប៊ុលហ្ការី បានរួចខ្លួនពីរលកអន្តោប្រវេសន៍នេះ បានបញ្ជូនទ័ពនិងរថកោះទៅបញ្ឈរជើងជួយប៉ូលិសព្រំដែន តាមគ្រប់ច្រកជាប់ប្រទេសម៉ាសេដ្វាន។ បើតាមតំណាងអង្គការសហប្រជាជាតិទទួលបន្ទុកសិទ្ធមនុស្ស អឺរ៉ុបគួរឱ្យមាននយោបាយទទួលអន្តោប្រវេសន៍រួម និងស៊ីចង្វាក់គ្នា ព្រោះការបិទខ្ទប់ដោយរបង ដោយយោធា ដោយការបាញ់ផ្សែងបង្ហូរទឹកភ្នែក និងដោយភាពហិង្សាផ្សេងៗ ពិតជាមិនអាចទប់ស្កាត់ជនអន្តោប្រវេសន៍ដែលគេចពីសង្គ្រាមនិងទុក្ខវេនាក្នុងប្រទេស មិនឱ្យសម្រុកចូលអឺរ៉ុបបានឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ