ប្រធានាធិបតីបារាំង និងអាល្លឺម៉ង់អំពាវនាវឲ្យមានអឺរ៉ុបរួបរួមគ្នា ដើម្បីឆ្លើយតបនឹងវិបត្តិជនអន្តោប្រវេសន៍
ប្រមុខដឹកនាំបារាំង និងអាល្លឺម៉ង់ឡើងថ្លែងរួមគ្នា កាលពីថ្ងៃពុធម្សិលមិញ នៅក្នុងសភាអឺរ៉ុប។ នេះជាលើកទី ២ ដែលបារាំង និងអាល្លឺម៉ង់ ដែលគេចាត់ទុក មេក្បាលម៉ាស៊ីនអឺរ៉ុប រួមគ្នា ឡើងថ្លែង នៅមុខអ្នកតំណាងរាស្រ្តអឺរ៉ុប។ ក្នុងបរិបទដែលអឺរ៉ុបកំពុងជួបវិបត្តិជនអន្តោប្រវេសន៍ និងជនភៀសខ្លួនថ្នាក់ដឹកនាំកំពូលអាល្លឺម៉ង់ លោកស្រីនាយករដ្ឋមន្រ្តីអង់ហ្គែឡា ម៉ែរគែល និងលោកប្រធានាធិបតីបារាំង ហ្វ្រង់ស័រ ហូឡង់ អំពាវនាវចង់ប្រទេសអឺរ៉ុបរួបរួមគ្នា ដើម្បី ដោះស្រាយវិបត្តិ។
ចុះផ្សាយនៅថ្ងៃ៖
ស្តាប់ - ០២:១៨
ជាព្រឹត្តិការណ៍ដ៏កម្រ ប្រធានាធិបតីបារាំង និងលោកស្រីនាយករដ្ឋមន្រ្តីអាល្លឺម៉ង់បានរួមគ្នា ឡើងថ្លែងសុន្ទរកថា នៅមុខសមាជិកសភាអឺរ៉ុប ក្នុងក្រុងព្រុចស៊ែល។ ទាំង ប្រធានាធិបតីបារាំង លោកហ្រ្វង់ស័រ ហូឡង់ និងលោកស្រីនាយករដ្ឋមន្រ្តី អង់ហ្គែឡា ម៉ែរគែលមានរយៈពេល ១៥នាទី ដើម្បីឡើងនិយាយទៅកាន់ សភាអឺរ៉ុប មុននឹងបើកវេទិការឲ្យមានការសួរដេញដោល។
បារាំង និងអាល្លឺម៉ង់មិនសូវជាល្អូកល្អឺនគ្នាប៉ុន្មាន ដោយសារតែអាល្លឺម៉ង់ មេគំរូសេដ្ឋកិច្ចនៅអឺរ៉ុប ទាមទារឲ្យបារាំង ក៏ដូចជាប្រទេសអឺរ៉ុបផ្សេងទៀត ធ្វើកំណែទម្រង់សេដ្ឋកិច្ច ដើម្បីកាត់បន្ថយឱនភាពថវិកា។ បារាំង ធ្លាប់មិនយល់ស្របជាមួយអាល្លឺម៉ង់ ដែលចង់ឲ្យមានកូតា បែងចែកជនភៀសខ្លួន ដែលកំពុងសម្រុកហូរចូលទៅក្នុងទឹកដី អឺរ៉ុប ជាពិសេសអាល្លឺម៉ង់។ ប៉ុន្តែ នៅមុខសមាជិកសភាអឺរ៉ុប ប្រមុខដឹកនាំបារាំង និងអាល្លឺម៉ង់ បានសំដែងពីសាមគ្គីភាព និងបញ្ចេញសារនយោបាយតែមួយ នោះ គឺឯកភាពតែមួយរបស់អឺរ៉ុប។
នៅក្នុងពេលដែលប្រធានាធិបតី បារាំងអំពាវនាវឲ្យគេចាប់ផ្តើមពង្រឹងព្រំដែនអឺរ៉ុប លោកស្រីនាយករដ្ឋមន្រ្តីអាល្លឺម៉ង់វិញ បានទាមទារឲ្យគេកែប្រែច្បាប់ស្តីពីការទទួលជនភៀសខ្លួន។ សម្រាប់លោកស្រីម៉ែរគែល សន្ធិសញ្ញា Dublin ហួសសម័យ និងត្រូវតែគេកែតម្រូវឡើងវិញ ដើម្បីកុំឲ្យបន្ទុកធ្ងន់មានតែទៅលើប្រទេសមួយចំនួន នៅអឺរ៉ុប។ សន្ធិសញ្ញាDublin ដែលសហភាពអឺរ៉ុបបង្កើតឡើងនៅឆ្នាំ ២០១៣បានចែងថា ជនភៀសខ្លួន ត្រូវតែដាក់ពាក្យសុំសិទ្ធិជ្រកកោន ទៅប្រទេសទីមួយនៅអឺរ៉ុបដែលគេបានដាក់ជើងជាន់មុនគេ។ ក្នុងនាមជាប្រទេសដែលទទួលជនភៀសខ្លួនមុនគេ អ៊ីតាលី ក្រិក ជាពិសេស ហុងគ្រីដែលមិនចង់ទទួលបន្ទុកធ្ងន់ក្នុងរឿងជនភៀសខ្លួន ធ្លាប់បានប្រកាសផ្អាកមិនអនុវត្តសន្ធិសញ្ញាDublin មុននឹងត្រលប់មកគោរពវិញ ដោយសារគំនាបរបស់សហភាពអឺរ៉ុប។
ប្រមុខដឹកនាំបារាំង និងអាល្លឺម៉ង់សុទ្ធតែដឹងច្បាស់ថា មានតែអឺរ៉ុបរួមគ្នាទេដែលអាចដោះស្រាយវិបត្តិជនអន្តោប្រវេសន៍បច្ចុប្បន្ន។ ប្រធានាធិបតីបារាំងបានអំពាវនាវប្រទេសសមាជិកអឺរ៉ុបបង្ហាញសាមគ្គីភាព និងឯកភាពជាធ្លុងមួយ។ លោកហ្រ្វង់ស័រ ហូឡង់បានព្រមានថា ក្នុងករណីផ្ទុយទៅវិញ គឺការត្រលប់ទៅបង្កើតព្រំដែនរវាងប្រទេសសមាជិកអឺរ៉ុប ការដកចេញនយោបាយអឺរ៉ុបរួម ហើយនិងការលះបង់ចោលប្រាក់អឺរ៉ូ ដែលគំរាមកំហែងអឺរ៉ុប៕
ទីក្រុងម៉ូស្គូ កាលពីថ្ងៃពុធ បានប្រកាសខ្លួនបានបាញ់មីស៊ីលចម្ងាយឆ្ងាយ ប្រមាណ១៥០០គីឡូម៉ែត្រ ពីក្នុងសមុទ្រកាស្ពីយ៉ែនសំដៅចូលក្នុងទឹកដីស៊ីរី។ នៅមួយសប្តាហ៍ក្រោយ បើកប្រតិបត្តិការទ័ពអាកាស វាយប្រហារលើក្រុមភេរវជន រុស្ស៊ីបានបន្ថែម បញ្ចូលកម្លាំងជើងទឹករបស់ខ្លួនទៅក្នុងអន្តរាគមន៍យោធារបស់ខ្លួន នៅស៊ីរី។
ការប្រើមីស៊ីលចម្ងាយឆ្ងាយ រាប់ពាន់គីឡូម៉ែត្រ ដើម្បីកម្ទេចទីតាំង ក្រុមជីហាតអង្គការរដ្ឋអ៊ីស្លាម និងក្រុមភេរវជនផ្សេងទៀត នៅក្នុងទឹកដីស៊ីរី ឆ្លុះបញ្ចាំងឲ្យឃើញថា រុស្ស៊ី កំពុងឆ្លៀតយកបញ្ហានៅស៊ីរី ដើម្បីបញ្ចេញ សាច់ដុំ បច្ចេកវិទ្យា សព្វាវុធរបស់ខ្លួន ដាក់ប្រទេសលោកខាងលិច ជាពិសេស អាមេរិក ដែលទើបបដិសេធមិនសហការជាមួយ រុស្ស៊ី ដរាបណារុស្ស៊ីនៅតែទម្លាក់គ្រាប់លើក្រុមប្រឆាំងស៊ីរី ប៉ុន្តែ មិនមែនពួកជីហាត រដ្ឋអ៊ីស្លាម ដូចការអះអាងរបស់រុស្ស៊ីនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ