ឧត្តមស្នងការទទួលបន្ទុកសិទ្ធិមនុស្ស បរិហារប្រទេសឆែកថាបានឃុំខ្លួន ធ្វើបាបជនភៀសខ្លួន
ប្រធានឧត្តមស្នងការជាន់ខ្ពស់ ទទួលបន្ទុកកិច្ចការសិទ្ធិមនុស្ស របស់អង្គការសហប្រជាជាតិ បានថ្លែងបរិហារពី សាធារណរដ្ឋឆែក ថាបានធ្វើការឃុំឃាំង ធ្វើបាបជនភៀសខ្លួន ក្នុងលក្ខខណ្ឌអមនុស្សធម៌ ជាពិសេសគឺទៅលើជនភៀសខ្លួនជាកុមារ។ កន្លងមកឧត្តមស្នងការទទួលបន្ទុកសិទ្ធិមនុស្ស តែងតែអំពាវនាវឲ្យសហភាពអឺរ៉ុប រកដំណោះស្រាយរួម ដើម្បីទទួលជនភៀសខ្លួន។ តែនេះជាលើកទីមួយហើយ ដែលអង្គការអន្តរជាតិនេះ បានចោទប្រកាន់ដោយត្រង់ៗ ទៅលើប្រទេសមួយ ថាបានបំពានលើច្បាប់អន្តរជាតិ ដោយចាប់ជនភៀសខ្លួន ដាក់ឃុំដោយខុសច្បាប់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៦
ថ្លែងពីក្រុងហ្សឺណែវ ទីស្នាក់ការឧត្តមស្នងការជាន់ខ្ពស់ ទទួលបន្ទុកសិទ្ធិមនុស្ស របស់អង្គការសហប្រជាជាតិ លោក Zeid Ra’ad Al Hussein បានប្រកាសថា រដ្ឋាភិបាលឆែក កំពុងតែរំលោភសិទ្ធិមនុស្យយ៉ាងធ្ងន់ធ្ងរ តាមរយៈការចាប់ជនភៀសខ្លួនដាក់ឃុំ និងនៅក្នុងលក្ខខណ្ឌឃុំឃាំង ដែលអមនុស្សធម៍ជាទីបំផុត។ លោកឧត្តមស្នងការបានបន្តថា ការចាប់ជនភៀសខ្លូនដាក់ឃុំនេះ មិនមែនជាករណីដាច់ដោយឡែកទេ តែជាករណីទូទៅមួយ ដែលរដ្ឋាភិបាលឆែក បានបញ្ជាឲ្យអាជ្ញាធរខ្លួន អនុវត្តទៅលើជនភៀសខ្លួនទាំងអស់ ដែលបានឆ្លងចូលដល់ទឹកដីគេ។ ទង្វើរនេះ គឺធ្វើឡើង ក្នុងទិសដៅ បំភិតបំភ័យ ជនភៀសខ្លួន ដែលមានបំណងឆ្លងកាត់តាមប្រទេសនេះ ទៅកាន់ប្រទេសផ្សេងទៀត នៅអឺរ៉ុបខាងលិច និងខាងជើង។
នៅក្នុងសេចក្តីរាយការណ៍ ដែលចេញដោយឧត្តមស្នងការទទួលបន្ទុកសិទ្ធិមនុស្ស មានបញ្ជាក់ថា អាជ្ញាធរឆែក បានធ្វើការចាប់ឃាត់ខ្លួន ជនភៀសខ្លួនដោយស្វ័យប្រវត្តិ ចំនួន៤០ថ្ងៃ រឺអាចលើសរហូតដល់ទៅ៩០ថ្ងៃ ដែលការឃុំខ្លួនបានធ្វើឡើង ក្នុងលក្ខខណ្ឌមួយ ដែលគេអះអាងថា អមនុស្សធម៌ និងធ្វើបាបជាពន់ពេក ទៅលើជនភៀសខ្លួន។
យោងតាមប្រសាសន៍លោក ឧត្តមស្នងការជាន់ខ្ពស់ តាមច្បាប់អន្តរជាតិ ការចាប់ជនភៀសខ្លួន យកទៅដាក់ឃុំ អាចធ្វើទៅបាន ល្គិកណាទាល់តែជាជម្រើសចុងក្រោយ គ្មានវិធីផ្សេងដោះស្រាយ។ ផ្ទុយទៅវិញអ្វីដែលអាជ្ញាធរឆែកបានអនុវត្ត វាគឺជាការចាប់ដាក់ឃុំទូទៅ ភ្លាមៗ ដោយមិនបានដោះស្រាយរកវិធីផ្សេងជាមុនទេ។ ហើយមួយវិញទៀត ការចាប់កុមារយកទៅដាក់ឃុំ ដោយសំអាងថាគ្នា ជាជនភៀសខ្លួន គឺជាការរំលោភច្បាប់អន្តរជាតិទាំងស្រុង ទោះបីជាក្នុងករណីណាក៏ដោយ។
ដោយឡែក មន្ទីរឃុំឃាំងមួយកន្លែង ឈ្មោះ Bila-Jevoza នៅចម្ងាយ៨០គីឡូម៉ែត្រ ភាគខាងជើងទីក្រុងប្រាហ្គ បានធ្វើឲ្យគេព្រួយបារម្ភជាខ្លាំង ដោយសារតែមន្ទីរឃុំឃាំងនោះ ត្រូវបានលោករដ្ឋមន្ត្រីក្រសួងយុត្តិធម៌ឆែកខ្លួនឯងផ្ទាល់ មានប្រសាសចាត់ទុកថា ប្រៀបបាននឹងឋានរក លើសពីមន្ទីរឃុំឃាំងធម្មតា។ យ៉ាងណាមិញ លោកស្រី Anna Sabatova អ្នកសម្របសម្រួលកិច្ចការជនភៀសខ្លួន នៅឆែក បានចេញរបាយការណ៍មួយ កាលពីថ្ងៃទី ១៣ តុលា កន្លងទៅនេះ ដោយបានបរិយាយពីសកម្មភាពរំលោភសិទ្ធិមនុស្ស ធ្វើបាបទៅលើជនភៀសខ្លួន ដែលត្រូវជាប់នៅមន្ទីរឃុំឃាំងនេះ។
យោងតាមរបាយការណ៍ខាងលើ មន្ទីរឃុំឃាំងនេះ មានជនភៀសខ្លួន ជាកុមារជាង១០០នាក់។ ជនភៀសខ្លួន ដែលជាប់ឃុំ ត្រូវបានគេរឹបអូសយកទូរស័ព្ទ ដែលធ្វើឲ្យពួកគេ មិនអាចផ្តល់ដំណឹងទៅអ្នកណា បានទាំងអស់។ បន្ថែមពីនេះទៀត ជារៀងរាល់ថ្ងៃ ជនភៀសខ្លួនទាំងអស់ ត្រូវគេចាប់ឆែកឆេរ បង្ខំឲ្យបង់ប្រាក់ចំនួន ២៥០កួរ៉ោនឆែក ដែលស្មើនឹង ១០ដុល្លារ ជាប្រចាំថ្ងៃ ជាថ្លៃដែលពួកគេត្រូវជាប់ឃុំ។ ដែលនេះគឺជាទង្វើមួយថោកទាបជាទីបំផុត។
ឧត្តមស្នងការសិទ្ធិមនុស្ស បានប្រកាសថ្កោលទោសរដ្ឋាភិបាលឆែក ហើយទាមទារឲ្យរដ្ឋាភិបាលប្រទេសនេះ បញ្ឈប់សកម្មភាពរំលោភសិទ្ធិមនុស្សទាំងអស់នេះ ឲ្យខាងតែបាន។ ឆែក ត្រូវតែគោរពច្បាប់អន្តរជាតិ ហើយងៀកមកចរចា សម្របសម្រួល ជាមួយគ្រប់ភាគី ដើម្បីរកវិធីជួយជនភៀសខ្លួន ដែលផ្សងជីវិត មកកាន់អឺរ៉ុប មិនមែនចាប់គ្នាដាក់ឃុំ ដោយអយុត្តិធម៌ បែបនេះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ