ភេរវកម្មប៉ារីស បែលហ្ស៊ិកបើកអង្កេត និងបោសសម្អាតជង្រុកអ៊ីស្លាមជ្រុលនិយម
ថ្ងៃអាទិត្យនេះ បារាំងបានប្រារព្ធពិធីកាន់ទុក្ខថ្នាក់ជាតិបីថ្ងៃ ដើម្បីរំលឹកដល់វិញ្ញាណក្ខន្ធជនរងគ្រោះ ១២៩នាក់ ដែលបានស្លាប់ក្នុងការវាយប្រហារភេរវកម្មដ៏រន្ធត់ បង្កឡើងដោយពួកអង្គការរដ្ឋអ៊ីស្លាម។ ការអង្កេតវិញ មានការវិវឌ្ឍន៍ច្រើន។ នៅយប់មិញ រដ្ឋអាជ្ញាបារាំង បានធ្វើសន្និសីទកាសែត បង្ហាញដំណើរដើមទង នៃការវាយប្រហារ យ៉ាងលម្អិត រៀបរាប់ជាដំណាក់ៗ ពីមួយនាទីទៅមួយនាទី ពួកភេរវជនធ្វើអ្វី ហើយនៅព្រឹកថ្ងៃអាទិត្យ ប៉ូលិសបារាំងបានរកឃើញនិងឃាត់ខ្លួនសួរចម្លើយ ក្រុមគ្រួសាររបស់ភេរវជនម្នាក់ ដែលប៉ូលិសអាចកំណត់អត្តសញ្ញាណបានតាំងពីថ្ងៃម្សិលមិញមក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៨:០៦
ដោយមិននឹកស្មានដល់ រដ្ឋអាជ្ញាបារាំងបានធ្វើសន្និសីទកាសែត ផ្តល់ព័ត៌មានយ៉ាងលម្អិត ដោយចាប់ផ្តើមពីនាទីដំបូងដំណើរការវាយប្រហារ និងបានបញ្ជាក់ថា ភេរវជនមានបីក្រុមសហការគ្នា បញ្ចេញសកម្មភាព មួយក្រុមសម្រាប់ទៅបំផ្ទុះនៅស្តាត និងពីរក្រុមទៀត សម្រាប់បាញ់រះ នៅតាមបណ្តោយផ្លូវដូចករណីហាង ឡឺប៉ឺទីកាំបូដ និងនៅសាលប្រគុំតន្ត្រី បាតាក្លង់។ ពួកគេបានទទួលការហ្វឹកហាត់ខ្ពស់ មានបទពិសោធន៍ខ្ពស់ក្នុងការប្រើនិងបញ្ជាអាវុធ និងកាន់កាំភ្លើង ប្រភេទអាកា ព្រមទាំងបំពាក់ជាប់នឹងខ្លួនខ្សែក្រវ៉ាត់មានជាតិផ្ទុះដូចគ្នា មានគន្លឹះចុច ដូចគ្នា ដែលអាចសម្លាប់មនុស្សបានច្រើនខ្លាំងនៅពេលចុចបំផ្ទុះ។
រដ្ឋអាជ្ញាបានបញ្ជាក់ព័ត៌មានទាក់ទងនឹងពេលម៉ោងធ្វើភេរវកម្ម ដែលមានរយៈពេលតែ ៣៣នាទីប៉ុណ្ណោះ។
- នៅម៉ោង ២១ និង២០ នាទី ជាការបំផ្ទុះគ្រាប់បែកអត្តឃាត នៅកីឡាដ្ឋានជាតិបារាំង ស្តាត ច្រកទ្វារ ដេ។ ភេរវជន និងអ្នកដំណើរម្នាក់បានស្លាប់។
- ម៉ោង ២១ និង២៥នាទី ការបាញ់រះទីមួយនៅកាច់ជ្រុងផ្លូវ ក្នុងសង្កាត់ទី១០ ដែលមាន bar Le Carillon និងភោជនីដ្ឋាន Le Petit Cambodgeបង្កការរងគ្រោះខ្លាំងជាងគេ ស្លាប់ ១៥នាក់។
- ម៉ោង ២១ និង៣០នាទី បំផ្ទុះគ្រាប់ទីពីរ នៅស្តាត នៅច្រកទ្វារ H ភេរជនពីរនាក់បានស្លាប់
- ម៉ោង២១ និង៣២នាទី មានការបាញ់រះទីពីរ មួយនាទី នៅសង្កាត់ទី ១១ម្តង។ បុរសមួយក្រុមបើកឡានខ្មៅ បាញ់សម្លាប់មនុស្សអង្គុយនៅរានខាងក្រៅរបស់ហាងកាហ្វេ ស្លាប់អស់៥នាក់។
- ម៉ោង ២១ និង៣៦នាទី ជាការបាញ់រះទីបី នៅផ្លូវមួយទៀត នៃសង្កាត់ទី១១ដដែល ដោយបុរសមួយក្រុមជិះឡានខ្មៅម៉ាកដូចគ្នា សម្លាប់មនុស្សអស់១៩នាក់។
- ម៉ោង២១និង៤០នាទី អត្តឃាតជនម្នាក់បានចុះបំផ្ទុះនៅមុខហាងកាហ្វេមួយទៀត ក្នុងសង្កាត់ទី១១ដដែល ហើយក្នុងមួយរំពេចភ្នែកនោះ មានបុរសបីនាក់ បំពាក់ដោយអាវុធដូចចេញធ្វើសង្គ្រាមបានលេចមុខចេញពីឡានម៉ាកប៉ូឡូ ខ្មៅ ចូលទៅក្នុងសាលប្រគុំតន្រ្តី បាតាក្លង់ បាញ់រះ និងចាប់អ្នកចូលទស្សនាជាចំណាប់ខ្មាំង។
- ម៉ោង២១ និង៥៣នាទី មានការបំផ្ទុះទីបី នៅក្បែរស្តាត
- ម៉ោង ០០និង២០នាទី ប៉ូលិសវាយលុកចូល។ ភេរវជនទាំងបីស្លាប់ ដោយមានពីរនាក់បានចុចបំផ្ទុះអាវគ្រាប់របស់គេ។ គឺនៅទីនេះហើយដែលមានមនុស្សស្លាប់ច្រើនជាងគេដល់ទៅ ៨៩នាក់ ។
ភេរវជនសញ្ជាតិបារាំង
ក្រោយការវាយប្រហារភេរវកម្មបានមួយថ្ងៃ ក្រុមអ្នកអង្កេតអាចវែករក និងស្គាល់អត្តសញ្ញាណភេរវជនបានម្នាក់។ គឺជាភេរវជនម្នាក់ ក្នុងចំណោមបីនាក់ ដែលបានចូលទៅបាញ់រះ និងចាប់ជាចំណាប់ខ្មាំងមនុស្សរាប់រយនៅក្នុងសាលប្រគុំតន្ត្រី បាតាក្លង់។ ប៉ូលិសអាចកំណត់អត្តសញ្ញាណបាន ដោយសារបំណែកសាកសពបានបន្សល់ទុកម្រាមដៃដែលគេអាចកាត់យកទៅពិនិត្យស្នាមក្រយៅដៃបាន។
ជាជនជាតិបារាំង មានអាយុ២៩ឆ្នាំ (កើតនៅថ្ងៃទី ២១ វិច្ឆិកា ១៩៨៥) រស់នៅក្នុងតំបន់អេសូន ជាយក្រុងប៉ារីស Omar Ismaïl Mostefaï គឺជាបុគ្គលដែលមានជាប់ឈ្មោះក្នុងបញ្ជី អ្នកផ្តាច់ខ្លួនទៅជាមនុស្សជ្រុលនិយម តាំងពីឆ្នាំ២០១០មក Fichier S ប៉ុន្តែពុំស្ថិតក្នុងចំណោមមនុស្សត្រូវតាមដានភេរវនិយមទេ។ ភេរវជនជាបារាំងគ្មានអ្វីភ្ញាក់ផ្អើលទេ ព្រោះបើតាមសាក្សី ជាប់នៅក្នុងសាលប្រគុំតន្ត្រីបានបញ្ជាក់ថា ភេរវជននិយាយភាសាបារាំង។ ប៉ុន្តែពេលនេះប៉ូលិសកំពុងសាកល្បងយល់ និងរកឱ្យឃើញនៅព្រឹកថ្ងៃអាទិត្យនេះ ថាតើភេរវជនអូម៉ា ពិតជាបានធ្វើដំណើរទៅប្រទេសស៊ីរីនៅឆ្នាំ២០១៤មែនឬយ៉ាងណា និងយ៉ាងដូចម្តេច ទើបគ្មានបន្សល់ទុកដានឱ្យក្រុមភ្នាក់ងារប្រយុទ្ធប្រឆាំងនឹងភេរវនិយមចាប់អារម្មណ៍សោះអញ្ចឹង។
ទាក់ទងនឹងលិខិតឆ្លងដែនស៊ីរីមួយ នៅជិតអត្តឃាតជនក្នុងកន្លែងបំផ្ទុះគ្រាប់បែក ការអង្កេតបានបញ្ជាក់ថា ជនអាយុ២៥ឆ្នាំ កើតនៅឆ្នាំ១៩៩០នេះមានទាំងបណ្ណស្នាក់នៅអឺរ៉ុប ក្នុងនាមជាជនភៀសខ្លួន ចូលមកអឺរ៉ុប តាមច្រកក្រិក ដោយ ក្រិកបានទទួលជនកាន់លិខិតឆ្លងដែននេះ កាលពីខែតុលា។ ប៉ុន្តែឈ្មោះជននេះគ្មានដាន និងគ្មានប៉ូលិសប្រឆាំងភេរវនិយមបារាំងស្គាល់ទេ។ អាជ្ញាធរក្រិកក៏កំពុងសហការជាមួយបារាំងយ៉ាងស្អិតល្មួតដែរ ដើម្បីបញ្ជាក់ថាលិខិតឆ្លងដែននោះជារបស់ពិត ឬក៏របស់ក្លែងក្លាយ។
ក៏ប៉ុន្តែតើជានរណាជាអ្នកធ្វើប្រតិបត្តិការ បាញ់រះនៅម្តុំហាងខ្មែរ ? ទាំងនេះនៅមិនទាន់ដឹងចម្លើយទេ។ សាក្សីជាអ្នករស់នៅជិតនោះ បានត្រឹមបញ្ជាក់ថា ភេរវជនប្រដាប់ដោយអាវុធពេញដៃ ជិះឡាន Seat Leon ពណ៌ខ្មៅ និងមិនដឹងមានគ្នាប៉ុន្មាននាក់ឡើយ។ បើតាមប្រសាសន៍របស់រដ្ឋអាជ្ញា នេះអាចចាត់ទុកថាជាក្រុមទីបី។ ពួកនេះនៅទីណា ? គេមិនទាន់អាចបានដឹងនៅឡើយទេ។
ចាប់ខ្លួនបីនាក់ នៅបែលហ្ស៊ិក
ប៉ូលិសប៊ែលហ្សិកបានប្រកាសអំពីការចាប់ខ្លួនបុរសបីនាក់ នៅព្រំប្រទល់បារាំង-ប៊ែលហ្ស៊ិកមែន កាលពីម្សិលមិញ ប៉ុន្តែគេពុំទាន់បានដឹងអំពីអត្តសញ្ញាណ និងតួនាទីរបស់គេនៅឡើយទេ មិនដឹងថា តើជាអ្នករួមដៃ ឬជាក្រុមទីបី។
ជនជាតិបារាំងម្នាក់រស់នៅប៊ែលហ្សិក ជិះរថយន្តមួយក្នុងចំណោមរថយន្តរបស់ភេរវជន ត្រូវបានចាប់ខ្លួននៅពេលឆែកឆេរតាមព្រំដែន ជាមួយបុរសពីរនាក់ផ្សេងជិះរថយន្តជាមួយគ្នា តែជាជនជាតិប៊ែលហ្សិក រស់នៅក្នុងសង្កាត់ Molenbeek ដូចឈ្មោះភូមិក្នុងបណ្ណចំណតឡាន។ រថយន្តដែលពួកខ្មាន់កាំភ្លើងបានប្រើ ត្រូវបានអ្នកអង្កេតកំណាត់អត្តសញ្ញាណបាន តាមរយៈផ្លាកលេខ និងលិខិតបង់ថ្លៃចំណតដែលមានបញ្ជាក់ទីតាំងនិងឈ្មោះភូមិ នៅប៊ែលហ្សិក។ យ៉ាងណាក៏ដោយ ក៏គេអាចសន្និដ្ឋានបានថា បុរសទាំងបីនាក់នេះ ពិតជានៅក្រុងប៉ារីស ពេលមានហេតុការណ៍វាយប្រហារនិងបំផ្ទុះភេរវកម្ម។
ដោយសារតែព័ត៌មាននៅលើឡាននេះហើយ និងផ្តល់ដោយប៉ូលិសបារាំងតាំងពីក្រោយភេរវកម្មភ្លាមនេះហើយ ទើបប៉ូលិសប៊ែលហ្សិកអាចបើកអង្កេត និងបើកប្រតិបត្តិការ តាំងពីថ្ងៃសៅរ៍ម្សិលមិញមក តាមចាប់បណ្តាញភេរវជន ចេញឆែកឆេរ ដល់ភូមិ Molenbeek សង្កាត់ដែលជាជម្រុកពួកអ៊ីស្លាមជ្រុលនិយម។
សូមបញ្ជាក់ថា ភេរវជនដែលបានបាញ់រះនៅមុខសារៈមន្ទីរជីហ្វនៅបែលហ្សិកកាលពីខែឧសភាឆ្នាំ២០១៤ មេឌី នេម៉ូស ភេរជនដែលបានប៉ុនប៉ងធ្វើភេរវកម្មក្នុងរថភ្លើងឆ្លងប្រទេស មិនសម្រេចកាលពីខែសីហាមុន ជនប៉ងធ្វើភេរវកម្មមិនបានសម្រេចមួយទៀតនៅប៉ារីស សុទ្ធតែឆ្លងកាត់និងរស់នៅក្នុងសង្កាត់ Molenbeek របស់បែលហ្សិកនេះទាំងអស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ