ប្រធានាធិបតីបារាំង អំពាវនាវឲ្យអ្នកនយោបាយ ឈរលើស្មារតីរួបរួមជាតិតែមួយ
ប្រទេសបារាំង កំពុងតែកាន់ទុក្ខទូទាំងប្រទេស រយៈពេល៣ថ្ងៃ បន្ទាប់ពីបានទទួលរងភេរវកម្ម យ៉ាងធ្ងន់ធ្ងរ កាលពីយប់ថ្ងៃសុក្រទី ១៣ វិចិ្ឆកា។ ស្ថានភាពអាសន្ន ការការពារសន្តិសុខ ត្រូវបានរឹតបណ្តឹង នៅទូទាំងប្រទេស។ ស្របពេលដែល មានពាក្យរិះគន់ បន្ទោសគ្នា ទៅវិញទៅមក ពីគ្រប់មជ្ឈដ្ឋាននយោបាយ ស្តីពីការបណ្តែតបណ្តោយឲ្យក្រុមភេរវករ ចូលមកធ្វើភេរវកម្ម សម្លាប់ប្រជាជនស្លូតត្រង់ លោកប្រធានាធិបតីបារាំង បានអំពាវនាវ ឲ្យអ្នកនយោបាយទាំងអស់ ឈរលើស្មារតីរួបរួមជាតិតែមួយ។ កាលពីថ្ងៃអាទិត្យលោក ប្រធានាធិបតីបារាំង បានអញ្ជើញ មេបក្សប្រឆាំងសំខាន់ៗទាំងបីរបស់បារាំង ឲ្យចូលជួប។ ហើយនៅថ្ងៃចន្ទនេះ មានបើកកិច្ចប្រជុំសភាវិសាមញ្ញមួយ រួមគ្នា ទាំងរដ្ឋសភា ទាំងព្រឹទ្ធសភាជុំគ្នាតែម្តង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៣
ជាមួយនឹងព្រឹត្តិការណ៍ ដ៏គួរឲ្យតក់ស្លុត ដែលបារាំងទើបតែបានរងគ្រោះ នយោបាយផ្ទៃក្នុងបារាំង កាន់តែបង្ហាញពីភាពបែកបាក់។ អ្នកនយោបាយគណបក្សប្រឆាំងបារាំង មានលោកស្រី ម៉ារីន ឡឺប៉ែន មកពីគណបក្សស្តាំនិយមជ្រុល និងលោក នីកូឡា សាកូហ្ស៊ី ប្រធានគណបក្សសាធារណរដ្ឋ បានថ្លែងបន្ទោស លាបព័ណបន្ថែម ជុំវិញភាពអសមត្ថភាពរបស់រដ្ឋាភិបាលលោកប្រធានាធិបតីហូឡង់ ក្នុងការទប់ស្កាត់ អំពើភេរវកម្ម។
ពួកអ្នកនយោបាយគណបក្សប្រឆាំង បាននិយាយរិះគន់ពី នយោបាយសន្តិសុខជាតិបារាំង ដែលគ្មានប្រសិទ្ធិភាព បណ្តោយឲ្យក្រុមជ្រុលនិយមជីហាដអ៊ីស្លាម ពង្រីកបណ្តាញ និងចេញធ្វើភេរវកម្ម ដោយគ្មានឧបសគ្គអ្វីទាំងអស់។ មិនត្រឹមតែប៉ុណ្ណោះ ពាក្យសំដីញុះញង់ស្អប់ខ្ពើម បានរាលដាល ម៉ៃទៅលើប្រជាជនបារាំង ដែលកាន់សាសនាអ៊ីស្លាមទូទៅ ក៏ប៉ុន្តែជាប្រជាជនស្លូតត្រង់ធម្មតា ហើយមិនគាំទ្រនឹងទង្វើជ្រុលនិយម របស់ពួកជីហាដអ៊ីស្លាមទេ។
លោកនាយករដ្ឋមន្ត្រីបារាំង ម៉ានុយអ៊ែល វ៉ាលស៍ បានថ្លែងតាមកញ្ចក់ទូរទស្សន៍ យ៉ាងធ្ងន់ៗថា រដ្ឋាភិបាលបារាំង នឹងមិនអត់ឱន ឲ្យបណ្តាញក្រុមជ្រុលនិយមអ៊ីស្លាមជាដាច់ខាត។ វិធានការក្តៅ និងតឹតរឹង នឹងត្រូវដាក់ចុះ នាពេលឆាប់ៗនេះ ជាក់ស្តែង រដ្ឋាភិបាលកំពុងពិចារណា អំពីលទ្ធភាព នៃការបណ្តេញ ប្រមុខផ្សព្វផ្សាយសាសនាអ៊ីស្លាមណាទាំងអស់ ដែលគេសង្ស័យថាជាអ្នកអូសទាញ យុវជនក្មេងៗ ឲ្យចូលទៅបំរើក្រុមជីហាដ អង្គការរដ្ឋអ៊ីស្លាម។
លោកប្រធានាធិបតីបារាំង បានថ្លែងថា ពេលនេះ មិនមែនជាពេល ដែលត្រូវបន្ទោសគ្នា ឈ្លោះប្រកែកគ្នា លាបពណ៌ឲ្យគ្នាទេ តែជាពេលដែល អ្នកនយោបាយទាំងអស់ មិនថាមកពីបក្សណា ត្រូវតែរួបរួមគ្នា ដើម្បីដោះស្រាយបញ្ហា និងលើកទឹកចិត្តប្រជាពលរដ្ឋទាំងអស់ កុំឲ្យអស់សង្ឃឹម ខ្លបក្លាចនឹងក្រុមឧក្រិដ្ឋជនជីហាដអ៊ីស្លាម។ ដើម្បីកសាងការសាមគ្គី រវាងអ្នកនយោបាយ លោកប្រធានាធិបតីបារាំង បានអញ្ជើញឲ្យចូលជួប កាលពីរសៀលថ្ងៃអាទិត្យ មេបក្សប្រឆាំងទាំងបី មានលោក នីកូឡា សាកូហ្ស៊ី លោក ហ្សង់លុច ម៉េឡង់ឆុង និងលោកស្រីម៉ារីន ឡឺប៉ែន។
ចំណែកនៅថ្ងៃចន្ទនេះ លោកហ្រ្វង់ស័រ ហូឡង់ និងកោះប្រជុំសភាជាតិ ទាំងរដ្ឋសភា ទាំងព្រឹទ្ធសភា រួមគ្នាទាំងអស់ នៅវិមាន Versailles ដើម្បីជជែកគ្នា ពីភាពអាសន្នផ្នែកសន្តិសុខ និងការបង្រ្កាបក្រុមជីហាដអ៊ីស្លាម។ សម័យប្រជុំវិសាមញ្ញនេះ ត្រូវបានធ្វើឡើងក្នុងគោលដៅ ប្រមូលផ្តុំអ្នកនយោបាយបារាំង ពីគ្រប់និន្នាការ ដើម្បីជជែកគ្នា លើកជាសំណើរផ្សេងៗ ក្នុងការកម្ចាត់ មេរោគអ៊ីស្លាមផ្តាច់ការ ដែលជាមេពេជ្ឈឃាតធ្វើភេរវកម្ម។
លោក នាយករដ្ឋមន្ត្រីបារាំង បានបញ្ជាក់ថា រដ្ឋាភិបាលលោក ត្រៀមខ្លួន ស្តាប់គ្រប់សំណើរទាំងអស់ ហើយនឹងយកមកពិចារណា ឲ្យតែជាសំណើរត្រឹមត្រូវ មានប្រសិទ្ធិភាព។ ខាងគណបក្សសាធារណរដ្ឋ របស់លោកសាកូហ្ស៊ី បានសំណូមពរឲ្យ បង្កើតជាក្រុមការងារ ដើម្បីពិភាក្សាគ្នា លើសំណើរផ្សេងៗ ហើយតំណាងក្រុមនិមួយៗ និងលើកសំណើររបស់ខ្លួន ក្នុងពេលប្រជុំវិសាមញ្ញ នៅវិមាន Versailles បន្ទាប់ពីបញ្ចប់សន្ទរកថារបស់លោកប្រធានាធិបតី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ