លោកស្រី មែរកិល ជាប់ជាឥស្សរជនឆ្នើមប្រចាំឆ្នាំ២០១៥របស់ទស្សនាវដ្តីTime
លោកស្រីប្រមុខរដ្ឋាភិបាលអាល្លឺម៉ង់ Angela Merkel ត្រូវបានទស្សនាវដ្តីអាមេរិក ថែម Time ផ្តល់ចំណាត់ថ្នាក់ ជាឥស្សរជនឆ្នើមប្រចាំឆ្នាំ ២០១៥ ព្រោះលោកស្រីមែរកិល មានស្នាដៃនិងសមត្ថភាពខ្ពស់ ប្រឈមមុខនឹងវិបត្តិជាច្រើននៅអឺរ៉ុប ដែលកើតឡើងពេញមួយឆ្នាំកន្លងមកនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៨
បើតាមនាយកបោះផ្សាយរបស់ទស្សនាវដ្តីថែម អ្នកស្រី ណង់ស៊ី ជីប (Nancy Gibbs) ការផ្តល់កិត្តិយសចាត់ទុកលោកស្រីប្រមុខរដ្ឋាភិបាលអាល្លឺម៉ង់ថា ជាឥស្សរជនឆ្នើម មកពីទស្សនាវដ្តីចង់អបអរ នឹងចំណាត់ការដោះស្រាយវិបត្តិជាច្រើន កើតឡើងនៅអឺរ៉ុបដូចជា វិបត្តិក្រិក វិបត្តិជនអន្តោប្រវេសន៍ និងចម្លើយតបរបស់រដ្ឋាភិបាលអាល្លឺម៉ង់ចំពោះការគំរាមកំហែងជីហាតរដ្ឋអ៊ីស្លាម។
នៅក្នុងសេចក្តីថ្លែងការណ៍ចេញផ្សាយនារសៀលថ្ងៃពុធនេះ អ្នកស្រី ណង់ស៊ី ជីប បានពន្យល់បន្ថែមទៀតថា លោកអ្នកអានអាចយល់ព្រម ឬមិនយល់ព្រម នឹងសេចក្តីសម្រេចចិត្តរបស់លោកស្រីមែរកិលក្នុងដោះស្រាយវិបត្តិនីមួយៗ តែប្រមុខរដ្ឋាភិបាលអាល្លឺម៉ង់រូបនេះបានជ្រើសរើសផ្លូវដែលស្រួលជាងគេ។ គឺចូលប្រលូកឧបសគ្គដោយខ្លួនឯង នៅពេលដែលដឹងថាពលរដ្ឋមិនចង់ធ្វើតាម។
តើមានប្រមុខដឹកនាំប្រទេសប៉ុន្មាននាក់ហ៊ានធ្វើដូចលោកស្រីមែរកិល ? លោកស្រីបានស្នើសុំ ពីប្រទេស យ៉ាងច្រើននូវអ្វីដែលមេដឹកនាំប្រទេសផ្សេងជាច្រើនទៀតមិនហ៊ានធ្វើ ! លោកស្រីហ៊ានប្រឈមមុខនឹងការដឹកនាំបែបផ្តាច់ការ និងបែបឱកាសនិយម និងពីព្រោះតែលោកស្រីបានធ្វើខ្លួនជាអ្នកដឹកនាំប្រកបដោយស្មារតី និងសីលធម៌ខ្ពស់ដ៏កម្រមាននៅលើលោកនេះហើយ ទើបទស្សនាវដ្តីថែមសម្រេចលើកលោកស្រី ជាឥស្សរជនឆ្នើមប្រចាំឆ្នាំ២០១៥។
សូមបញ្ជាក់ថា នៅក្នុងការប្រកួតប្រជែងនេះ លោកស្រីប្រមុខរដ្ឋាភិបាលអាល្លឺម៉ង់បានជាប់ចំណាត់ថ្នាក់លេខមួយ នាំមុខ តាមលេខរៀង មេកើយដឹកនាំចលនាជីហាតនៃអង្គការរដ្ឋអ៊ីស្លាម Abou Bakr al-Baghdadi -បេក្ខជនប្រធានាធិបតីអាមេរិក ដូណាល់ ត្រំ Donald Trump -ចលនាអាមេរិកដើម្បីសិទ្ធិជនស្បែកខ្មៅ Black Lives Matte និងប្រធានាធិបតីអ៊ីរ៉ង់ ហាសាន់ រ៉ូហានី។
ឆ្លើយតបនឹងសំណួរថាតើថែមមិនខ្លាចមានផលប៉ះពាល់ ប្រសិនបើលើកមេកើយរដ្ឋអ៊ីស្លាមជាមនុស្សឆ្នើមប្រចាំឆ្នាំ អ្នកស្រី ណង់ស៊ី ជីប បានបញ្ជាក់ថា ថែមបានទម្លាក់ចំណាត់ថ្នាក់អាប៊ូបាអាល់បាដាដី មិនមែនព្រោះខ្លាចមានផលប៉ះពាល់ទេ តែមកពីនៅឆ្នាំនេះ ពួកអង្គការរដ្ឋអ៊ីស្លាមចាញ់ច្រើន។ គ្មានអ្វីថាទៅមិនរួចឡើយ ! ថែមធ្លាប់បានផ្តល់ចំណាត់ថ្នាក់ជនអាក្រក់ខ្លាំងជាមនុស្សឆ្នើមប្រចាំឆ្នាំរួចមកម្តងហើយ គឺ អ៊ីត្លែរ នៅឆ្នាំ១៩៣៨៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ