ប្រទេសអាល្លឺម៉ង់បន្ថែមលុយចំនួន ៦ ០០០លានអឺរ៉ូសម្រាប់ជនភៀសខ្លួន
នៅយប់ថ្ងៃអាទិត្យឆ្លងចូលថ្ងៃចន្ទ ទី៧ កញ្ញានេះ រដ្ឋាភិបាលអាល្លឺម៉ង់បានសម្រេចចិត្តដំឡើងថវិកាជាតិបន្ថែមចំនួន ៦ ០០០លានអឺរ៉ូសម្រាប់ជួយទំនុកបម្រុងដល់ជនភៀសខ្លួន និងអ្នកសុំសិទ្ធិជ្រកកោណដែលប្រទេសអាល្លឺម៉ង់ទើបបានយល់ព្រមទទួលយកបន្ថែមនារយៈពេលចុងក្រោយនេះ។ ការសម្រេចចិត្តនេះត្រូវបានធ្វើឡើង បន្ទាប់ពីមានកិច្ចប្រជុំរវាងថ្នាក់ដឹកនំាគណបក្សក្នុងរដ្ឋាភិបាលចម្រុះ និងលោកស្រីនាយករដ្ឋមន្រ្តីអង់ហ្កឺឡា មែរកិល។
ចុះផ្សាយនៅថ្ងៃ៖
បើយោងតាមឯកសារអនុម័តនៅយប់ថ្ងៃអាទិត្យឆ្លងចូលថ្ងៃចន្ទ ទី៧ កញ្ញានេះឲ្យដឹងថា ទឹកប្រាក់បន្ថែមចំនួន ៦ ០០០លានអឺរ៉ូសម្រាប់ធានារ៉ាប់រងដល់អ្នកសុំសិទ្ធិជ្រកកោណ និងជនភៀសខ្លួននឹងត្រូវចែកចេញជាពីរផ្នែក ទី១ រដ្ឋសហព័ន្ធនឹងត្រូវដំឡើងថវិកាជាតិសម្រាប់ឆ្នំា ២០១៦ ចំនួន ៣ ០០០លានអឺរ៉ូ និងទី២ ទឹកប្រាក់ចំនួន ៣ ០០០លានអឺរ៉ូទៀតនឹងត្រូវប្រគល់ទៅឲ្យតំបន់ ព្រមទំាងស្រុកណាដែលមានតួនាទីត្រូវទទួលអ្នកសុំសិទ្ធិជ្រកកោណ និងជនភៀសខ្លួនឲ្យស្នាក់នៅ។ យ៉ាងណាក៏ដោយ ការបែងចែកចំណាយលំអិតនឹងត្រូវសម្រេចនៅថ្ងៃទី២៤ កញ្ញាខាងមុខ នៅក្នុងកិច្ចប្រជុំរវាងអ្នកតំណាងរដ្ឋសហព័ន្ធ និងអ្នកតំណាងតំបន់ ស្រុកផ្សេងៗទៀត។
អ្នកតំណាងនៅក្នុងកិច្ចប្រជុំយប់មិញបានបញ្ចេញប្រតិកម្មថា អាល្លឺម៉ង់ចំាបាច់ត្រូវតែចាត់វិធានការថ្នាក់ជាតិមួយដើម្បីឆ្លើយតបនឹងតម្រូវការរបស់ចំនួនជនភៀសខ្លួនដ៏ច្រើនសម្បើមដែលអឺរ៉ុបមិនធ្លាប់ជួបប្រទះ។ ការសម្រេចរបស់រដ្ឋាភិបាលអាល្លឺម៉ងពេលនេះបានធ្វើឡើង ខណៈពេលដែលមានជនភៀសខ្លួនប្រមាណជា ២០ ០០០នាក់បានទៅដល់ទីក្រុងមុយនិចស្ថិតប៉ែកខាងត្បូងប្រទេសអាល្លឺម៉ង់នាចុងសប្តាហ៍កន្លងទៅ។ ជនភៀសខ្លួនទំាងនោះបានធ្វើដំណើរមកពីប្រទេសអូទ្រីស្ត និងដែលភាគច្រើនជនជាតិស៊ីរី។
ដោយឡែក និងក្រៅពីសម្រេចដំឡើងថវិកាសម្រាប់ជួយទំនុកបម្រុងដល់ជនភៀសខ្លួន និងអ្នកសុំសិទ្ធិជ្រកកោណ កិច្ចប្រជុំរវាងថ្នាក់ដឹកនំាគណបក្សក្នុងរដ្ឋាភិបាលចម្រុះ និងលោកស្រីនាយករដ្ឋមន្រ្តីអង់ហ្កឺឡា មែរកិលក៏បានសម្រេចបន្ថែមប្រទេសចំនួន ៣ គឺកូសូវ៉ូ អាល់បានី និងម៉ុងតេនេហ្រ្កូទៅក្នុងបញ្ជីប្រទេសដែលអាល្លឺម៉ង់ចាត់ទុកថា មានសន្តិសុខ និងសុវត្ថិភាពល្អ។ វិធានាការនេះនឹងជួយជម្រុញឲ្យមានការបញ្ជូនទៅកាន់ប្រទេសកំណើតវិញនូវបេក្ខជនសុំសិទ្ធិជ្រកកោណណាដែលមានសញ្ជាតិដើមជាកូសូវ៉ូ អាល់បានី និងម៉ុងតេនេហ្រ្កូ។
គួររម្លឹកជូនថា អាល្លឺម៉ង់បាន និងកំពុងប្រឈមមុខនឹងលំហូរជនភៀសខ្លួនដែលមិនធ្លាប់មាន ពិសេសជនភៀសខ្លួនមកពីតំបន់ជម្លោះ ដូចយ៉ាងនៅស៊ីរី តែក៏មានជនភៀសខ្លួនមកពីបណ្តាប្រទេសគ្មានជម្លោះនៅតំបន់បាល់កង់ផងដែរ និងដែលជនភៀសខ្លួនប្រភេទនេះបានរត់ចោលស្រុកដើម្បីស្វែងរកអនាគតល្អ។ ក្នុងឆ្នំា ២០១៥ នេះ បេក្ខជនសុំសិទ្ធិជ្រកកោណនៅអាល្លឺម៉ង់មានប្រមាណជា ៨០០ ០០០នាក់ ពោលច្រើនជាងក្នុងឆ្នំា ២០១៤ ដែលមានតែជាង ២០០ ០០០នាក់ប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ