តួកគីស្នើរុស្ស៊ីឲ្យចូលរួមនៅក្នុងប្រតិបត្តិការអន្តរជាតិប្រឆាំងអង្គការរដ្ឋអ៊ីស្លាម
នៅថ្ងៃចន្ទ ទី៤ កក្កដា ប្រទេសតួកគីបានធ្វើសំណើទៅកាន់ប្រទេសរុស្ស៊ីឲ្យចូលរួមជាមួយសម្ព័ន្ធមិត្តអន្តរជាតិនៅក្នុងយុទ្ធនាការប្រយុទ្ធប្រឆាំងនឹងអង្គការរដ្ឋអ៊ីស្លាមក្នុងប្រទេសស៊ីរី។ សំណើរបៀបនេះបានធ្វើឡើង បន្ទាប់ពីទីក្រុងអង់ការ៉ា និងទីក្រុងមូស្គូបានយល់ព្រមកាត់បន្ថយភាពតានតឹង និងយល់ព្រមពង្រឹងទំនាក់ទំនងរវាងគ្នាឡើងវិញ។ តែតួកគីបានបដិសេធលើព័ត៌មានដែលថា តួកគីបានយល់ព្រមបើកមូលដ្ឋានយោធា Incirlik របស់តួកគីសម្រាប់កម្លាំងទ័ពរុស្ស៊ី។
ចុះផ្សាយនៅថ្ងៃ៖
ស្តាប់ - ០២:៤០
សំណើរបស់តួកគីរបៀបនេះត្រូវបានលោកប្រមុខការទូតតួកគី Mevlut Cavusoglu រម្លឹកប្រាប់ជាថ្មីក្នុងថ្ងៃចន្ទ ទី៤ កក្កដា។ តែលោក Mevlut បានបដិសេធចំពោះព័ត៌មានដែលថា ការចូលរួមរបស់រុស្ស៊ីមិនមែនជាការបើកមូលដ្ឋានយោធា Incirlik របស់តួកគីឲ្យយន្តហោះចម្បាំងរុស្ស៊ីទេ។ « យើងបាននិយាយថា យើងអាចនឹងរួមសហការណ៍ជាមួយប្រទេសរុស្ស៊ីក្នុងការប្រឆាំងអង្គការរដ្ឋអ៊ីស្លាមនៅស៊ីរី តែខ្ញុំមិនបានធ្វើអត្ថាធិប្បាយអ្វីសោះឡើយទាក់ទងនឹងការអនុញ្ញាតឲ្យយន្តហោះចម្បាំងរុស្ស៊ីប្រើប្រាស់មូលដ្ឋានយោធា Incirlik របស់តួកគី » នេះជាការថ្លែងរបស់លោកប្រមុខការទូតតួកគី Mevlut។
សូមជម្រាបជូនថានៅថ្ងៃអាទិត្យ ទី៣ កក្កដាកន្លងទៅ រូបលោករដ្ឋមន្រ្តីការបរទេសតួកគីដដែលបានថ្លែងនៅក្នុងកិច្ចសន្ទនាមួយជាមួយទូរទស្សន៍ក្នុងស្រុក TRT ថា តួកគីចូលរួមជាមួយគ្រប់ប្រទេសដែលប្រឆាំងអង្គការរដ្ឋអ៊ីស្លាមដូចដែលតួកគីធ្លាប់បានធ្វើកន្លងមក និងបានបើកមូលដ្ឋានយោធា Incirlik របស់តួកគីសម្រាប់ប្រទេសណាដែលចូលរួមយ៉ាងសកម្មក្នុងការប្រយុទ្ធប្រឆាំងនឹងអង្គការរដ្ឋអ៊ីស្លាម។ លោក Mevlut បានចោទសួរខ្លួនឯងថា បើតួកគីយល់ព្រមចូលរួមជាមួយប្រទេសផ្សេង ចុះរឿងអីមិនអាចចូលរួមជាមួយរុស្ស៊ីបាន ព្រោះអង្គការរដ្ឋអ៊ីស្លាមជាសត្រូវរួមរបស់យើងទាំងអស់គ្នា និងដែលយើងត្រូវតែកំចាត់សត្រូវរួមមួយនេះ។
អ្វីជាការកត់សម្គាល់នៅត្រង់ថា បើតួកគី និងរុស្ស៊ីចាត់ទុកអង្គការរដ្ឋអ៊ីស្លាមជាសត្រូវរួមដូចគ្នានៅក្នុងប្រទេសស៊ីរី តែទីក្រុងអង់ការ៉ា និងមូស្គូបានយល់មិនដូចគ្នាទេចំពោះវិបត្តិនយោបាយផ្ទៃក្នុងនៅស៊ីរី។ តួកគីគាំទ្រក្រុមប្រឆាំងរដ្ឋាភិបាលស៊ីរី តែរុស្ស៊ីគាំទ្ររដ្ឋាភិបាលស៊ីរីរបស់លោកប្រធានាធិបតីអាសាដដោយមានជន្ទល់ពីប្រទេសអ៊ីរ៉ង់។ ម្យ៉ាងទៀត ក្រុមប្រទេសសមាជិកអង្គការអូតង់ដែលតួកគីជាសមាជិកម្នាក់ដែរនោះ ពិតជាមិនចង់ឃើញវត្តមានទាហាន និងយន្តហោះចម្បាំងរុស្ស៊ីនៅលើមូលដ្ឋានយោធា Incirlik របស់តួកគីឡើយ ពិសេសចំពេលដែលយន្តហោះអាមេរិក អាល្លឺម៉ង់ អង់គ្លេស អារ៉ាប៊ីសាអូឌីត និងកាតាកំពុងមានវត្តមាននៅមូលដ្ឋានយោធានោះ។
យ៉ាងណាក៏ដោយ រុស្ស៊ីបានចាត់ទុកសំណើរបស់តួកគីថាមានសារៈសំខាន់ខ្លាំង និងយល់ព្រមយកទៅពិនិត្យ ពិចារណា។ សំណើរបៀបនេះបានធ្វើឡើង បន្ទាប់ពីទីក្រុងអង់ការ៉ា និងទីក្រុងមូស្គូបានយល់ព្រមកាត់បន្ថយភាពតានតឹង និងយល់ព្រមពង្រឹងទំនាក់ទំនងរវាងគ្នាឡើងវិញ បន្ទាប់ពីលោកប្រធានាធិបតីតួកគី Erdogan យល់ព្រមសុំទោសរុស្ស៊ីក្នុងរឿងការបាញ់ធ្លាក់យន្តហោះរុស្ស៊ីដោយទ័ពអាកាសតួកគីក្បែរព្រំដែនស៊ីរីកាលពីឆ្នាំ ២០១៥៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ