អាល្លឺម៉ង់រងភេរវកម្មថ្មីមួយទៀត ពីសំណាក់ជនភៀសខ្លួនស៊ីរី
គ្រោះជាន់លើគ្រោះ ! ក្នុងរយៈពេលតែមួយសប្តាហ៍សោះ អាល្លឺម៉ង់បានស្គាល់ភេរវកម្មនិងការបាញ់ប្រហារដល់ទៅបីករណី។ នៅយប់ថ្ងៃអាទិត្យវេលាម៉ោង ២២ និង១២នាទី យប់មិញ ជនភៀសខ្លួនជាតិស៊ីរី អាយុ២៧ឆ្នាំ បានចុចបំផ្ទុះគ្រាប់បែកនៅមុខភោជនីដ្ឋានមួយ ក្បែរមាត់ច្រកចូលមហោស្រពតន្រ្តី ក្នុងក្រុងAnsbach ភាគខាងត្បូងប្រទេសអាល្លឺម៉ង់។ មានមនុស្ស១២នាក់រងរបួស។ អាជ្ញាធរអាល្លឺម៉ង់បានប្រកាសចាត់ទុកភ្លាម នៅព្រឹកថ្ងៃចន្ទនេះ ថាជាទង្វើភេរវកម្ម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១១
“នេះជាភេរវកម្មថ្មីមួយទៀត ដែលប្រាកដណាស់ថានឹងធ្វើការព្រួយបារម្ភមានកាន់ខ្លាំង” ! នេះជាប្រសាសន៍របស់រដ្ឋមន្ត្រីក្រសួងមហាផ្ទៃទៅកាន់អ្នកសារព័ត៌មាន ដែលបានអះអាងបន្ថែមទៀត ថាកំពុងស្រាវជ្រាវបញ្ជាក់ក្រែងជាភេរវកម្មរបស់ពួកអ៊ីស្លាមជ្រុលនិយម។
នៅវេលាម៉ោងប្រមាណជា១០យប់ ភេរវជន បានប៉ងចូលទៅក្នុងទីលានប្រគុំតន្ត្រីហាលវាល ដែលមានមនុស្សម្នាចូលទស្សនាប្រមាណជាងពីរពាន់នាក់ តែគ្មានសំបុត្រចូលទើបត្រូវទើត្រឹមមាត់ច្រកសុវត្ថិភាព ហើយចុចបំផ្ទុះគ្រាប់បែកស្លាប់ខ្លួននៅខាងមុខច្រកចូល។ ល្បាយលោហៈក្នុងគ្រាប់ផ្ទុះ វត្ថុជាច្រើននៅក្នុងកាបូបស្ពាយរបស់ភេរវជន ជាភស្តុតាងបញ្ជាក់កាន់តែច្បាស់អំពីសម្មតិកម្ម ថាភេរវជនមានចេតនាចង់សម្លាប់មនុស្សឱ្យបានច្រើន។ ហេតុដូច្នេះហើយបានជាប៉ូលិសកំពុងសំលឹងមើលដានភេរវកម្មជីហាត។
ធ្លាប់ជាប់ក្នុងបញ្ជីប៉ូលិសពីបទប្រព្រឹត្តគ្រឿងញៀន ជននេះធ្លាប់បានសាកល្បងធ្វើអត្តឃាតពីរដង និងធ្លាប់ចូលពេទ្យវិកលចរិកផង។ ភេរវជនជាតិស៊ីរីរូបនេះ បានធ្វើដំណើរមកដល់អាល្លឺម៉ង់កាលពីពីរឆ្នាំមុន ក្នុងនាមជាជនភៀសខ្លួន។ អាជ្ញាធរអាល្លឺម៉ង់បានបដិសេធសំណើសុំជ្រកកោននយោបាយរបស់ជននេះ កាលពីឆ្នាំទៅ តែបានចេញបណ្ណស្នាក់នៅឱ្យ។ គេពុំដឹងថាតើជននេះបានធ្វើការផ្តាច់ខ្លួនជាអ្នកអ៊ីស្លាមនិយមដែរឬអត់នោះទេ។
ភេរវកម្មបានកើតឡើងក្នុងខណៈដែលអាល្លឺម៉ង់ និងអឺរ៉ុប រងការគំរាមកំហែងភេរវកម្មពីសំនាក់ពួកអង្គការដ្ឋអ៊ីស្លាម។ អាល្លឺម៉ង់កំពុងស្ថិតក្នុងសម្ពាធស្រាប់។ ក្នុងរយៈពេលតែមួយសប្តាហ៍សោះ មានការវាយប្រហារសំដៅលើជនស៊ីវិលដល់បីករណី។ កាលពីថ្ងៃចន្ទមុន ជនភៀសខ្លួនអាយុ១៧ឆ្នាំបានប្រើពូថៅកាំបិតធ្វើភេរវកម្មប្រឆាំងអ្នកដំណើរក្នុងរថភ្លើង។ នៅល្ងាចថ្ងៃសុក្រ យុវជនជាតិអាល្លឺម៉ង់ដើមកំណើតអ៊ីរ៉ង់បានបាញ់រះសម្លាប់មនុស្ស៩នាក់និងរបួសជាច្រើននាក់នៅផ្សារទំនើប តែមិនពាក់ព័ន្ធនឹងភេរវកម្មជីហាតអ៊ីស្លាមទេ។ នៅអាទិត្យម្សិលមិញនេះ មុនភេរវកម្មបំផ្ទុះគ្រាប់បែកបន្តិច ជនភៀសខ្លួនស៊ីរីមា្នក់អាយុ២១ឆ្នាំបានកាប់ស្ត្រីម្នាក់ស្លាប់និងរបួសបីនាក់ ទំនងដោយមូលហេតុឧក្រិដ្ឋបុគ្គល។
ទោះបីជារដ្ឋាភិបាលអំពាវនាវមិនឱ្យពលរដ្ឋម៉ៅលើជនភៀសខ្លួនក្តី ក៏ហេតុការណ៍ផ្ទួនៗនេះ ជាឱកាសដ៏ប្រពៃសម្រាប់បក្សប្រឆាំងវាយលុកលើនយោបាយបើកចំហទទួលអន្តោប្រវេសន៍ របស់លោកស្រីប្រមុខរដ្ឋាភិបាលមែលកិល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ