បារាំង-រុស្ស៊ី៖លោកពូទីនលុបចោលទស្សនកិច្ចក្នុងប្រទេសបារាំងដែលគ្រោងធ្វើនៅថ្ងៃទី១៩ តុលា
នៅទីបំផុត វិមានក្រេមឡាំងបានប្រកាសឲ្យដឹងជាផ្លូវការនាថ្ងៃចន្ទ ទី១១ តុលាថា លោកប្រធានាធិបតីរុស្ស៊ីពូទីនបានសម្រេចលុបចោលដំណើរទស្សនកិច្ចក្នុងប្រទេសបារាំងដែលគ្រោងធ្វើនៅថ្ងៃទី១៩ តុលាសប្តាហ៍ក្រោយ។ ការសម្រេចរបស់លោកពូទីនរបៀបនេះបានធ្វើឡើង បន្ទាប់ពីលោកប្រធានាធិបតីបារាំងហ្រ្វង់ស័រ ហូឡង់បានប្រាប់ឲ្យដឹងថា លោកយល់ព្រមទទួលលោកពូទីនតែក្នុងករណីណាដែលលោកពូទីនយល់ព្រមនិយាយពីបញ្ហានៅក្នុងប្រទេសស៊ីរី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣១
« លោកពូទីន ប្រធានាធិបតីរុស្ស៊ីត្រូវមកកាន់ទីក្រុងប៉ារីសនាពេលខាងមុខដើម្បីចូលរួមនៅក្នុងពិធីបើកសម្ពោធផ្សេងៗ និងនៅក្នុងពិធីផ្សេងៗទៀត។ ខ្ញុំទទួលជួបលោកពូទីននាឱកាសដំណើរទស្សនកិច្ចនេះ តែនៅក្នុងក្របខណ្ឌណាដែលទស្សនកិច្ចអាចអនុញ្ញាតឲ្យមានការនិយាយពីបញ្ហានៅក្នុងប្រទេសស៊ីរី និយាយពីរឿងស៊ីរីតែមួយគត់។
ខ្ញុំបានជម្រាបព័ត៌មាននេះទៅឲ្យលោកពូទីនដឹងរួចហើយថា បើគាត់ត្រូវមកប៉ារីស ខ្ញុំនឹងមិនជូនដំណើរគាត់នៅក្នុងពិធីបើកសម្ពោធផ្សេងៗ ឬមួយនៅក្នុងពិធីអ្វីផ្សេងទៀតទេ។ តែខ្ញុំបានត្រៀមខ្លួនដើម្បីបន្តកិច្ចសន្ទនាដើម្បីស្វែងរកដំណោះស្រាយឲ្យវិបត្តិស៊ីរី។
ទីបំផុត លោកពូទីនបានសម្រេចឈប់មកប៉ារីស និងសុខចិត្តលើកទស្សនកិច្ចនេះទៅថ្ងៃក្រោយវិញ។ ទោះជាយ៉ាងនេះក្តី ក៏ការសម្រេចចិត្តនេះមិនបានធ្វើឲ្យប៉ះពាល់ដល់កិច្ចសន្ទនានៅពេលក្រោយដែរ តែពេលនេះ គាត់អត់មកប៉ារីសទេ។ ចាប់ពីពេលនេះទៅ និងអ្វីដែលខ្ញុំសង្ឃឹមនោះគឺថា បើរុស្ស៊ីសម្រេចចិត្តពិតប្រាកដនៅថ្ងៃណាមួយក្នុងការបិទបញ្ចប់ការទម្លាក់គ្រាប់បែកលើស៊ីរីដោយជួយគាំទ្ររបបស៊ីរីនោះ ខ្ញុំត្រៀមខ្លួនរួចជាស្រេចដើម្បីផ្តើមកិច្ចសន្ទនា »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ