ម៉ូស្គូ និង អង់ការ៉ាមានទស្សនៈមិនដូចគ្នា ចំពោះឃាតកម្មអគ្គរដ្ឋទូតរុស្ស៊ី
ថ្ងៃ២២ធ្នូនេះ ក្នុងរដ្ឋធានីម៉ូស្គូ លោកប្រធានាធិបតីពូទីន អមដោយលោករដ្ឋមន្ត្រី ការបរទេស ឡាវ៉្រូវ ចូលរួមក្នុងពិធីផ្តល់កិត្តិយសថ្នាក់ជាតិ ជាលើកចុងក្រោយ ជូនសពលោក Andrei Karlov ឯកអគ្គរដ្ឋទូតរុស្ស៊ីប្រចាំ នៅតួកគី ដែល កាលពីបីថ្ងៃមុន ត្រូវបានខ្មាន់កាំភ្លើងជា ប៉ូលីសតួកគី បាញ់ដល់ទៅ ៩គ្រាប់ ផ្តាច់ជីវិតគាត់ ក្នុងពិធីតាំងពិព័រណ៌រូបថត ក្នុងទីក្រុងអង់ការ៉ា។ សពគាត់ ត្រូវបានដឹកមកដល់ម៉ូស្គូ កាលពីយប់ម្សិលម៉្ងៃ។ បើអាជ្ញាធរតួកគី ចោទ បព្វជិតតួកគី Gulen ជា សត្រូវលោកប្រមុខរដ្ឋអ៊ែរដូហ្កាន់ កំពុងជ្រកកោននៅស.រ.អា ថា ស្ថិតនៅពីក្រោយ ឃាតកម្មនេះ នោះ តាមយោបល់ម៉ូស្គូ គប្បីរង់ចាំសិនទៅ លទ្ធផលអង្កេតធ្វើ នៅតួកគី ដោយមានការចូលរួម នៃ ក្រុមអ្នកជំនាញរុស្ស៊ីមានគ្នាដល់ ១៨នាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្របនឹងក្រឹត្យចេញម្សិលមិញ លោកប្រធានាធិបតីរុស្ស៊ី បានបំពាក់ជូន លោកឯកអគ្គរដ្ឋ ទូត Andrei Karlov នូវ ឋានន្តរស័ក្តិបច្ឆាមរណៈជា វីរបុរសសហព័ន្ធរុស្ស៊ី ។ អ្នកនាំពាក្យវិមាន ក្រេមឡាំង លោក ឌ្មីទ្រី ពេស្កូវ បានប្រកាសថា សពវីរបុរសនេះ ក្រោយ ពីទទួលនូវការផ្តល់ កិត្តិយសថ្នាក់ជាតិ នឹងត្រូវបញ្ចុះ នៅស្មសានដ៏ល្បីនៃក្រុងម៉ូស្គូ ថ្ងៃព្រហស្បតិ៍ ២២ធ្នូនេះ ដោយ មានវត្តមាន មានមុខនៃ លោកប្រធានាធិបតីពូទីនផ្ទាល់។
ឃាតកម្មរូបអគ្គរដ្ឋទូតនេះ ត្រូវបានបរិហារ ដោយរុស្ស៊ី និងតួកគី ក្នុងឋានៈជា ”អំពើបង្កហេតុ” សំដៅ បង្ខូចទំនាក់ទំនង ដែលទើបៗស្តារ ឲ្យមានប្រក្រតីភាពវិញ រវាងប្រទេសទាំងពីរ ក្រោយពី ធ្លាក់ក្នុងវិបត្តិអស់សឹងមួយឆ្នាំ។
រដ្ឋាភិបាលតួកគី សង្ស័យមែនទែនថា ស្ថិតនៅពីក្រោយឃាតកម្មនេះ គឺ បព្វជិតតួកគី លោក Fethullah Gulen សព្វថ្ងៃរស់នៅ ក្នុងស្ថានភាពនិរទេស នៅ ស.រ.អា. គាត់ជាគូប្រឆាំងនឹងលោក ប្រធានាធិបតីតួកគី អ៊ែរដូហ្កាន់។ រីឯ ឃាតករ មុននឹងវាត្រូវកំទេចដោយកងកម្លាំងពិសេសតួកគី បានស្រែកហើយ ស្រែកទៀតថា វាចង់សងសឹករុស្ស៊ី ចំពោះក្រុង អាឡិប នៅស៊ីរី។
ប៉ុន្តែ សម្រាប់ក្រេមឡាំង គឺកុំប្រញាប់អះអាងពេក តើនរណាដែលស្ថិតនៅពីក្រោយ ឃាតកម្ម។ ត្រូវរង់ចាំសិន លទ្ធផលអង្កេតកំពុងធ្វើ នៅតួកគី ដោយ មានការចូលរួម នៃ ក្រុមជំនាញរុស្ស៊ី ផ្សំ ឡើងពី អ្នកអង្កេត ភ្នាក់ងារសម្ងាត់ និង អ្នកការទូត សរុបទៅមានគ្នាដល់ ១៨នាក់។ ភាគីតួកគី សុខចិត្ត ឲ្យក្រុមជំនាញរុស្ស៊ី ចូលរួមទៅផង ក្នុងការវះពិនិត្យសព លោក Andrei Karlov។
គួរនិយាយថា អាជ្ញាធរតួកគី ឃាត់ខ្លួនបាន ១៣នាក់ហើយ ជនជាប់សង្ស័យថា ពាក់ព័ន្ធ នឹងឃាតកម្ម។ អ្នកទាំងនោះភាគច្រើន គឺជំនិតនឹងខ្មាន់កាំភ្លើង ជាឃាតករ ដែលពីរឆ្នាំកន្លះ ចុងក្រោយ ស្ថិតក្នុងកងកម្លាំងប៉ូលីសខាងបង្ក្រាបកុប្បកម្ម នៅក្រុង អង់ការ៉ា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ