តួកគីនិងរុស្ស៊ីព្រមព្រៀងគ្នានៅលើបទឈប់បាញ់គ្នាមួយនៅទូទាំងប្រទេសស៊ីរី
ប្រទេសតួកគីនិងរុស្ស៊ី បានឯកភាពគ្នានៅលើកិច្ចព្រមព្រៀងឈប់បាញ់នៅទូទាំងប្រទេសស៊ីរីចាប់ពីយប់អាធ្រាតនេះទៅ” នេះជាព័ត៌មានប្រកាសដោយទីភ្នាក់ងារព័ត៌មានរបស់រដ្ឋាភិបាលតួកគីនៅថ្ងៃពុធ២៨ធ្នូនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
ផែនការរុស្ស៊ីនិងតួកគី មានគោលដៅ ពង្រីកបទឈប់បាញ់គ្នានៅទូទាំងប្រទេសស៊ីរី។ បទឈប់បាញ់ដែលត្រូវបានបង្កើតឡើងតាំង២សប្តាហ៍មុននៅក្រុងអាឡិបតាមរយៈការចរចានិងឧបត្ថម្ភដោយទីក្រុងម៉ូស្គូនិងអង់ការ៉ានិងដែលបានអនុញ្ញាតការដឹកជំលៀសប្រជាជនស៊ីរីចេញពីសង្កាត់នានារបស់ក្រុមបះបោរនៅអាឡិប។
ក៏ដូចជាកិច្ចព្រមព្រៀងបទឈប់បាញ់លើកមុនៗដែរ ដែលចរចាដោយយសហរដ្ឋអាមេរិកនិងរុស្សី កិច្ចព្រមព្រៀងឈប់បាញ់លើកនេះ ក៏ពុំមានរាប់បញ្ចូលក្រុមពួកភេរវជនដែរ។
ទីភ្នាក់់ងារព័ត៌មានរបស់តួកគីដែលគាំទ្ររដ្ឋាភិបាល បានបញ្ជាក់បន្ថែមទៀតថា “បើសិនជាជោគជ័យ កិច្ចព្រមព្រៀងថ្មីនេះ អាចយកធ្វើជាមូលដ្ឋានបាន សំរាប់ការចរចានយោបាយនានា រវាងរបបស៊ីរីនិងក្រុមបះបោរ ដែលទីក្រុងមូស្គូនិងអង់ការ៉ាមានបំណងរៀបចំធ្វើឡើងនៅទីក្រុង Astana ប្រទេស Kazakhstan" ។
គួររំលឹកថា រុស្ស៊ីនិងតួកគី បានចូលរួមចំណែកយ៉ាងសកម្មបំផុតនៅក្នុងបញ្ហាស៊ីរី តែ ទីក្រុងអង់ការ៉ា ធ្វើការគាំទ្រខាងក្រុមបះបោរស៊ីរី រីឯទីក្រុងម៉ូស្គូវិញ ក៏ដូចជាប្រទេសអ៊ីរ៉ង់ដែរ គឺជាសម្ព័ន្ធមិត្តដ៏ជិតដិតបំផុតរបស់ក្រុងដាម៉ាស។
ទោះជាយ៉ាងណាក្តី រុស្សីនិងតួកគី នៅតែចូលរួមសហប្រតិបត្តិការយ៉ាងជិតស្និទ្ធបំផុតមួយជាមួយប្រទេសស៊ីរី នាអំឡុងប៉ុន្មានខែចុងក្រោយនេះ ដោយបានខិតខំរៀបចំទំនាក់ទំនងនឹងគ្នាឲ្យមានភាពកក់ក្តៅឡើងវិញ ក្រោយពីមានវិបត្តិជាមួយគ្នានៅក្នុងការបាញ់ធ្លាក់យន្តហោះរុស្ស៊ីមួយគ្រឿងកាលពីខែវិច្ឆិកាឆ្នាំ២០១៥នៅក្បែរព្រំដែនតួកគី-ស៊ីរីមក។
គួរបញ្ជាក់ថានៅថ្ងៃអង្គារម្សិលមិញ នៅក្នុងសន្និសីទសាព័ត៌មានមួយដោយមានវត្តមានរបស់ប្រធានាធិបតី ហ្គីណេ Allpha Condé ផងដែរ នាឱកាសដំណើរទស្សនកិច្ចនៅទីក្រុងអង់ការ៉ា លោកប្រធានាធិបតីតួកគី បានថ្លែងចោទប្រកាន់យ៉ាងត្រង់ៗថា”លោកខាងលិច ពុំបានធ្វើការគោរពកិច្ចសន្យានានារបស់ខ្លួនទេនៅក្នុងបញ្ហាស៊ីរី និងបានគាំទ្រខាងក្រុមភេរវជនស៊ីរីក្នុងនោះក៏មានក្រុមរដ្ឋអ៊ីស្លាមផងដែរ”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ