នៅបេឡារុស ពលរដ្ឋណាដែលអាជ្ញាធរចាត់ទុកថា”ខ្ជិលធ្វើការ” ត្រូវបង់ពន្ធឲ្យរដ្ឋ
ថ្ងៃ១៧មិនានេះ គម្រប់បាន១ខែគត់ តាំងពីនៅរដ្ឋឯករាជ្យបេឡារុស មានចាប់ផ្តើមក្បួនយាត្រាតវ៉ាទល់នឹងក្រិត្យមិនធ្លាប់មានដូច ចេញដោយប្រធានាធិបតីស្តីអំពី “ភាពកម្ជិល សង្គម” ដែលស្របនឹងក្រិត្យនេះ ពលរដ្ឋណាដែលមានសមត្ថភាពអាចធ្វើការ ហើយបែរទៅជាខ្ជិលរកការធ្វើជាផ្លូវការ អស់កន្លះឆ្នាំជាប់ គឺត្រូវបង់ពន្ធឲ្យរដ្ឋ។ ទោះបីអាជ្ញាធរបានសម្រេចផ្អាកធរមាននៃក្រិត្យនេះសម្រាប់រយៈពេល មួយឆ្នាំក្តី ក៏បាតុកម្មប្រឆាំងនៅតែបន្តបោកបក់សឹងគ្មានលោះថ្ងៃណាឡើយ។ ចំណែកតុលាការធម្មនុញ្ញទើបប្រកាសថា “ស្របច្បាប់ ”ទេតើការហូតសារពើពន្ធពីពលរដ្ឋប្រទេស។
ចុះផ្សាយនៅថ្ងៃ៖
គឺកាលពីខែមេសាឆ្នាំ២០១៥ ដែលលោកប្រធានាធិបតីបេឡារុសAlexandre Lukashenko បានចុះហត្ថលេខាលើក្រិត្យ “ ស្តីអំពីមនុស្សខ្ជិលចាំតែរស់ដោយសារគេ” ដែលស្របនឹងក្រិត្យនេះ ពលរដ្ឋណាដែលមានសមត្ថភាពធ្វើការ ប៉ុន្តែមិនព្រមធ្វើការអស់កន្លះឆ្នាំជាប់ គឺត្រូវបង់ពន្ធទៅឲ្យរដ្ឋ ម្តុំ២០០ដុល្លារក្នុង១ឆ្នាំ។
មិទ្ទិញប្រឆាំងលើកដំបូងបង្អស់នៃ”អ្នកស្រុកដែលថាមិនខ្ជិលធ្វើការ” បានប្រព្រឹត្តទៅ១ខែមុន គឺកាលពីថ្ងៃ១៧កុម្ភៈនៅរដ្ឋធានី Minsk តែម្តង។ ពីរថ្ងៃក្រោយមក វាបានរាលដាលដល់ក្រុងឯទៀត ដែលមួយលើកៗ មានអ្នកចូលរួម ពីរាប់រយនាក់ដល់រាប់ពាន់នាក់។ ថ្ងៃអាទិត្យ ទី៥មីនា មានប្រជាពលរដ្ឋប្រមាណ១.០០០នាក់ បានចុះថ្នល់ធ្វើបាតុកម្មក្នុងក្រុងBrest នៅជាប់នឹងព្រំដែនប៉ូឡូញ លុះទាល់តែស្ទះចរាចរណ៏ នៅតាមមហាវិថីក្រុងនេះ។ ពួកបាតុករបាននាំគ្នាស្រែកបន្លឺឡើងនូវការទាមទារពីលោកប្រធានាធិបតី Lukashenko ឲ្យចុះចេញពីតំណែងទៅ និងឲ្យធ្វើការបោះឆ្នោតថ្មីដែលសុចរិត។ គេជ្រោងលើកឡើងនូវផ្ទាំងបដា៖
-យើងមិនចង់បង់ប្រាក់ចិញ្ចឹមពួកចោរ ពួកប៉ូលីស ពួកបញ្ញើក្អែកទេ
-គ្មានប្រាក់ខែប៉ុន្តែត្រូវបង់ពន្ធ
-មិនត្រូវមានទេតំណាងរាស្ត្រដែលស្គាល់តែថង់ប្រាក់
-តំណាងរាស្ត្រដែលអនុម័តក្រិត្យបែបនេះ គឺរស់ដោយសារតែកម្លាំងញើសប្រជាពលរដ្ឋ
ក្នុង៣សប្តាហ៏ចុងក្រោយ នៅរដ្ឋធានី Minsk និងនៅតាមក្រុងធំៗឯទៀត នៃប្រទេសបេឡារុស មានប្រព្រឹត្តទៅបាតុកម្មតវ៉ាទល់នឹងក្រិត្យនោះ ចាត់ចែងឡើងដោយបណ្តាបក្សប្រឆាំង ប៉ុន្តែដែលគ្មានសេចក្តីអនុញ្ញាតរបស់អាជ្ញាធរ។
អ្វីដែលគួរឲ្យកត់សម្គាល់គឺថា ពេលបាតុកម្មប្រព្រឹត្តទៅ ប៉ូលីសគ្រាន់តែឈរមើល ធានាឲ្យមានសណ្តាប់ធ្នាប់។ ប៉ុន្តែក្រោយពីបាតុកម្មចប់ទៅ ប៉ូលីសវាតប្រតិបត្តិការ ទៅចាប់ដល់ផ្ទះសកម្មជនណាដែលហ៊ានប្រមាថរដ្ឋអំណាចជាងគេ ជាពិសេស គឺពួកអ្នកតំណាងនៃបក្សប្រឆាំង។ តាមតួលេខអង្គការការពារសិទ្ធិមនុស្ស បច្ចុប្បន្នជាប់ក្នុងការឃុបឃាំង គឺមានសកម្មជនប្រមាណ១០០នាក់ ដែលពីក្នុងនោះ បុរសត្រូវបានកាត់ទោស ឲ្យជាប់ឃុំ១៥ថ្ងៃ ស្ត្រីឲ្យជាប់ឃុំ៧ថ្ងៃ។
ក្នុងផ្ទៃនៃរលកតវ៉ានេះ លោកប្រធានាធិបតី Lukashenko ថ្ងៃ៩មិនា បានសម្រេចផ្អាក១ឆ្នាំសិន ធរមាននៃក្រិត្យ“ស្តីអំពីការហូតពន្ធលើភាពកម្ជិល”” ប៉ុន្តែមិនលុបក្រិត្យនេះទៅវិញទេ។ គាត់គូសបញ្ជាក់ថា ក្រិត្យនេះមានន័យជាក្រិត្យមនោគមវិជ្ជា និងសីលធម៌។ តាមរយៈក្រិត្យនេះ រដ្ឋមិនទទួលលុយបានក្រាស់ក្រែលឡើយ។ គោលដៅក្រិត្យគឺតែមួយគត់ ៖ ដាស់តឿនឲ្យធ្វើការ អ្នកណាដែលត្រូវធ្វើ និងដែលអាចធ្វើ។
ស្របនឹងក្រិត្យនេះ មានជំពូកពលរដ្ឋដែលត្រូវរំដោះឲ្យផុតពីការបង់ពន្ធបែបនេះ ពោលគឺ៖ មាតាដែលបង្ខំចិត្តដកខ្លួនពីការងារ ដើម្បីថែទាំកូនរហូតដល់វាអាយុបាន៧ឆ្នាំ, ពលរដ្ឋដែលត្រូវឈប់នៅផ្ទះ ដើម្បីកំដរឳពុកម្តាយធ្លាក់ខ្លួនឈឺ, ពលរដ្ឋដែលបរិច្ចាគកិច្ចយោធា, បព្វជិតនៅតាមវិហារសាសនា។ល។ លោកLukashenko ផ្ទុកផ្តាក់រដ្ឋាភិបាលឲ្យលម្អិតបញ្ជីនៃប្រភេទពលរដ្ឋដែលត្រូវបង់ពន្ធចំពោះ“ភាពកម្ជិលសង្គម”។
តាមតួលេខផ្លូវការ គិតមកទល់ថ្ងៃ១មិនា អង្គការខាងទារពន្ធ បានផ្ញើក្រដាសស្នាមទៅកាន់ពលរដ្ឋប្រមាណ៤៧០.០០០នាក់ តម្រូវឲ្យគេបង់ពន្ធចំពោះ”ភាពកម្ជិល” ដែលពីក្នុងនោះ សុខចិត្តបង់ពន្ធបែបនេះទៅហើយ គឺតែជាង៥៤.០០០នាក់ ឬជាង១១%ប៉ុណ្ណោះ។
ថ្ងៃ១៥មីនាម្សិលម៉្ងៃ មុនពេលដែលបាតុកម្មតវ៉ា ត្រូវប្រព្រឹត្តទៅជាថ្មីក្នុងរដ្ឋធានី ជាចម្លើយតបនឹងសំណូមពរ ប្រជាពលរដ្ឋសុំឲ្យពន្យល់បំភ្លឺ តើខ្លឹមសារក្រិត្យនោះ ស្របឬទេ នឹងរដ្ឋធម្មនុញ្ញ ប្រទេសតុលាការធម្មនុញ្ញបេឡារុស ក្នុងសេចក្តីសន្និដ្ឋានរបស់ខ្លួន ចាត់ទុកថា ស្របច្បាប់ ការដែលអាជ្ញាធរតម្រូវឲ្យពលរដ្ឋបង់ពន្ធ ចំពោះ”ភាពខ្ជិលក្នុងសង្គម” បង់នេះ គឺដោយអនុលោម តាមក្រិត្យប្រធានាធិបតី ស្តីពី”ការព្រមានទល់នឹងការរស់នៅដោយសារអ្នកដទៃ”។
តុលាការធម្មនុញ្ញសង្កត់ធ្ងន់ថា ៖ ការបង់សារពើពន្ធ គឺជាការទាមទារឥតប្រកែកបានដោយរដ្ឋ ហូរចេញពីកាព្វកិច្ចពលរដ្ឋម្នាក់ៗ ដូចដែលមានចែងក្នុងមាត្រាទី៥៦ នៃរដ្ឋធម្មនុញ្ញ ដែលជាការរួមវិភាគទាន ទៅក្នុងខ្ទង់ចំណាយរបស់រដ្ឋ សម្រាប់តម្រូវការសង្គម។ តុលាការធម្មនុញ្ញក៏កត់សម្គាល់ថា៖គឺតែប្រធានាធិបតី រដ្ឋសភា តុលាការកំពូល និងក្រុមប្រឹក្សារដ្ឋមន្ត្រី ដែលបំពាក់ទៅដោយសិទ្ធិ សុំតុលាការធម្មនុញ្ញឲ្យពិនិត្យមើល តើច្បាប់ នេះឬនោះ ស្របឬមិនស្របនឹងធម្មនុញ្ញប្រទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ