អសប៖ ជនភៀសខ្លួនស៊ីរីមិនមែនជាទំនិញដោះដូរ ដើម្បីហេតុផលនយោបាយ
មូលនិធិរបស់អង្គការសហប្រជាជាតិ ដើម្បីកុមារ UNICEF នៅថ្ងៃសុក្រម្សិលមិញបានបរិហារថា គេមិនបានធ្វើតាមការសន្យា ក្នុងរឿងទទួល ការពារជនភៀសខ្លួន។ ជាលទ្ធផលគឺកុមារដែលរងគ្រោះខ្លាំងជាងគេ។ ប្រតិកម្មរបស់ទីភ្នាក់ងារអង្គការសហប្រជាជាតិធ្វើឡើងនៅមួយថ្ងៃក្រោយ រដ្ឋមន្រ្តីក្រសួងមហាផ្ទៃ តួកគី គំរាម ឈប់ អនុវត្តកិច្ចព្រមព្រៀងស្តីពីជនអន្តោប្រវេសន៍ ដែលតួកគី បានចុះហត្ថលេខាជាមួយ សហភាពអឺរ៉ុប កាលពី១ឆ្នាំមុន។
ចុះផ្សាយនៅថ្ងៃ៖ កែប្រែថ្ងៃទី៖
ទៅតាមកិច្ចព្រមព្រៀង ដែលតួកគីចុះជាមួយ សហភាពអឺរ៉ុប តួកគី ដែល ជាកន្លែងឆ្លងកាត់របស់ជនភៀសខ្លួន ស៊ីរី និងជនអន្តោប្រវេសន៍ នៅតំបន់ដើមបូព៌ា បានសុខចិត្ត ចូលរួមជួយទប់កុំឲ្យមានលំហូរជនអន្តោប្រវេសន៍ និងជនភៀសខ្លួន ហូរចូលទៅអឺរ៉ុប។ ជាការតបស្នងវិញ តួកគីនឹងបានទទួលថវិកាពីសហភាពអឺរ៉ុប សម្រាប់ជំរំជនភៀសខ្លួននៅក្នុងទឹកដីតួកគី។ លើសពីនោះ សហភាពអឺរ៉ុបបានសម្រេចបើកទូលាយ ឲ្យជនជាតិតួកគីធ្វើដំណើរទៅអឺរ៉ុបដោយមិនចាំបាច់ទិដ្ឋាការ។ អឺរ៉ុបសន្យាផងដែរ ថានឹងជួយពន្លឿនការចរចាដើម្បីយកតួកគី ចូលជាសមាជិករបស់សហភាពអឺរ៉ុប។
ប៉ុន្តែ សង្រ្គាមពាក្យសំដី និងវិបត្តិការទូត រវាងតួកគី ជាមួយបណ្តាប្រទេសមួយចំនួន នៅអឺរ៉ុប បានធ្វើឲ្យតួកគី ចង់ដកខ្លួន ដោយឯកតោភាគី ពីកិច្ចព្រមព្រៀងជាមួយ អឺរ៉ុប។ តួកគីដែលខឹងនឹងអាល្លឺម៉ង់ ហើយនិងប្រទេសហូឡង់ ដែលហាមមិនឲ្យរដ្ឋមន្រ្តីរបស់ខ្លួន ចូលធ្វើយុទ្ធនាការនៅក្នុងសហគមន៍ជនជាតិតួកគី នៅបរទេស បានគំរាម លែងចង់អនុវត្តតាមកិច្ចព្រមព្រៀង ដែលមានទិសដៅទប់ស្កាត់លំហូរជនអន្តោប្រវេសន៍ ទៅក្នុងទឹកដីអឺរ៉ុប។ នៅល្ងាចថ្ងៃពុធ រដ្ឋមន្រ្តីក្រសួងមហាផ្ទៃបានព្រមានថា តួកគីអាចបើកបញ្ជូនចេញ ក្នុងមួយខែៗ ជនភៀសខ្លួន និងជនអន្តោប្រវេសន៍ ប្រមាណ ១ម៉ឺន ៥ពាន់ ទៅក្នុងទឹកដី អឺរ៉ុប បើសិនតួកគីចង់។
នៅថ្ងៃសុក្រ អ្នកជំនាញខាងស្ថានភាពអាសន្នរបស់អង្គការUNICEF លោកLucio Melandri បានព្រមានកុំឲ្យគេយកជីវិត ជោគវាសនារបស់ជនភៀសខ្លួន ទៅធ្វើជាទំនិញ ដោះដូរ ដើម្បីហេតុផលនយោបាយ។ មន្រ្តីរបស់អង្គការUNICEF នៅបានរំលឹកថា គេមិនបានធ្វើតាមការសន្យា ដែលថា នឹងទទួលយកជនភៀសខ្លួន ១សែន ២ម៉ឺននាក់ ឲ្យរស់នៅក្នុងទឹកដីអឺរ៉ុប។ តាមUNICEF រហូតមកដល់ពាក់កណ្តាលខែមីនា ពោលគឺនៅបីថ្ងៃមុនខួបមួយឆ្នាំនៃកិច្ចព្រមព្រៀង អឺរ៉ុប តួកគី មានជនភៀសខ្លួនប្រមាណ ១០ភាគរយប៉ុណ្ណោះ ដែលអឺរ៉ុបបានទទួល ផ្តល់កន្លែងជ្រកកោន។ កង្វល់មួយទៀត របស់UNICEF គឺកុមារដែលរត់គេចពីសង្រ្គាម និងបានបែកពីឪពុកម្តាយ មកត្រសាត់អណ្តែត នៅក្នុងជំរំជនភៀសខ្លួន នៅក្រិក អ៊ីតាលី ឬនៅតួកគី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ