សម្តេចប៉ាបលើកឡើងពីភាពអាម៉ាស់របស់ព្រះអង្គក្នុងទង្វើបំពានផ្លូវភេទពីក្រុមសង្ឃកាតូលិក
ប្រមុខសង្ឃកាតូលិកសម្តេចប៉ាបហ្រ្វង់ស័រផ្តើមទស្សនកិច្ចរយៈពេល ២ថ្ងៃនៅក្នុងប្រទេសអៀរឡង់ដោយចាប់ផ្តើមនាថ្ងៃសៅរ៍ ទី២៥ សីហា។ នេះជាលើកទី២ ដែលប្រមុខសង្ឃកាតូលិកបានទៅកាន់ប្រទេសអៀរឡង់ បន្ទាប់ពីទស្សនកិច្ចរបស់សម្តេចប៉ាបហ្សង់ប៉ូលទី២ ក្នុងឆ្នាំ ១៩៧៩។ តែអ្វីជាការកត់សម្គាល់ វត្តមានរបស់ប្រមុខសង្ឃកាតូលិកក្នុងទឹកដីអៀរឡង់ពេលនេះកំពុងបំពុលដោយរឿងអាស្រូវផ្លូវភេទដែលប្រព្រឹត្តដោយក្រុមសង្ឃកាតូលិក។
ចុះផ្សាយនៅថ្ងៃ៖
ស្តាប់ - ០១:៥២
តាំងពីបានក្លាយជាប្រមុខសង្ឃកាតូលិកក្នុងឆ្នាំ ២០១៣ មក នេះជាទស្សនកិច្ចលើកទី២៤ របស់សម្តេចប៉ាបហ្រ្វង់ស័រនៅក្រៅទឹកដីអ៊ីតាលី។ ចំណែកជម្រើសទៅកាន់ទីក្រុងឌុយប្លាំង ប្រទេសអៀរឡង់ពេលនេះក៏ដើម្បីចូលរួមបិទកម្មវិធីជួបជុំគ្រួសារពិភពលោកដែលប្រទេសអៀរឡង់បានរៀបចំតាំងពីថ្ងៃទី២១ សីហា។ តែទន្ទឹមគ្នានឹងកម្មវិធីគ្រួសារដ៏រីករាយមួយនេះ សម្តេចប៉ាបហ្រ្វង់ស័រក៏កំពុងក្រពុលមុខនឹងរឿងអាស្រូវផ្លូវភេទដែលបានបែកធ្លាយនៅអាមេរិកកាលពី ២សប្តាហ៍មុនតាមរយៈរបាយការណ៍របស់អគ្គរដ្ឋអាជ្ញាក្នុងរដ្ឋ Pennsylvanie។
នៅក្នុងរបាយការណ៍នោះ អគ្គរដ្ឋអាជ្ញាបានបរិហារពីការបំពានផ្លូវភេទប្រព្រឹត្តក្រុមសង្ឃកាតូលិកចំនួន ៣០០អង្គក្នុងរយៈពេល ៧០ឆ្នាំ។ នាថ្ងៃចន្ទ ទី២០ សីហាដើមសប្តាហ៍នេះ សម្តេចប៉ាបបានផ្ញើលិខិតមិនធ្លាប់មានទៅកាន់រដ្ឋអំណាចកាតូលិកនៅទូទាំងពិភពលោកដោយអំពាវនាវឲ្យចូលរួមបំបាត់ទង្វើគួរឲ្យស្អប់ខ្ពើម។ នៅក្នុងប្រទេសអៀរឡង់ សម្តេចប៉ាបហ្រ្វង់ស័របានទទួលជួបសន្ទនាដោយប្រធានាធិបតីលោក Michael Higgins និងនាយករដ្ឋមន្រ្តីអៀរឡង់លោក Leo Varadkar។ លោក Varadkar បានបញ្ជាក់ថា ការសុំទោសជាសាធារណៈមិនគ្រប់គ្រាន់ដើម្បីបិទបញ្ចប់ទង្វើបំពានផ្លូវភេទលើកុមារពីសំណាក់ក្រុមសង្ឃកាតូលិកបានទេ។
អ្វីដែលលោក Varadkar ចង់បាន គឺចង់ឲ្យសម្តេចប៉ាបប្តូរពីពាក្យសម្តីទៅជាការអនុវត្តជាក់ស្តែងដោយចាត់វិធានការចាស់ដៃលើសង្ឃកាតូលិកដែលមានជាប់ពាក់ព័ន្ធនឹងរឿងអាស្រូវផ្លូវភេទ។ ជាការឆ្លើយតបវិញ សម្តេចប៉ាបបានយល់ពីកំហឹងរបស់ប្រជាជនអៀរឡង់ដែលប្រឆាំងនឹងភាពអសមត្ថភាពរបស់ថ្នាក់ដឹកនាំវិហារកាតូលិកប្រឈមនឹងឧក្រិដ្ឋកម្មគួរឲ្យស្អប់ខ្ពើម និងថា សហគមន៍កាតូលិកទាំងមូលមានភាពអាម៉ាស់ខ្លាំងណាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ