ប្រធានក្រុមជម្រើសជាតិបាល់ទាត់អាមេរិកាំងរិះគន់Fifaថា មិនយុត្តិធម៌
ក្រុមបាល់ទាត់ស្រ្តីអាមេរិកាំង នៅថ្ងៃអាទិត្យទី ៧ កក្កដា បានក្លាយជាជើងឯកបាល់ទាត់ពិភពលោកឆ្នាំ ២០១៩ បន្ទាប់ពីយកប្រកួតយកឈ្នះ លើក្រុមជម្រើសជាតិហូឡង់ ជាមួយពិន្ទុ ២ ទល់នឹងសូន្យ នៅក្នុងការប្រកួតបាល់ទាត់ពិភពលោក នៅប្រទេសបារាំង។ ក្រុមបាល់ទាត់ស្រ្តី អាមេរិកដណ្តើមពានរង្វាន់បាល់ទាត់ពិភពលោក ជាលើកទី ៤ ក្នុងពេលជាមួយគ្នានេះ ក៏កំពុងកើតមានផងដែរ បញ្ហាចម្រូងចម្រាស ជុំវិញ ភាពមិនស្មើគ្នា រវាងការបាល់ទាត់ ស្រី ហើយនិងបាល់ទាត់ បុរស។
ចុះផ្សាយនៅថ្ងៃ៖ កែប្រែថ្ងៃទី៖
នៅថ្ងៃសៅរ៍ នៅមួយ ថ្ងៃមុនការប្រកួតផ្តាច់ព័ត្រ ជាមួយក្រុមជម្រើសជាតិហូឡង់ ប្រធានក្រុមបាល់ទាត់ ស្រ្តីអាមេរិកាំង លោកស្រី Megane Rapinoe នៅក្នុងសន្និសីទកាសែត បានរិះគន់សហព័ន្ធកីឡាបាល់ទាត់អន្តរជាតិ FIFA ថាលំអៀង មិនយុត្តិធម៌ ទាំងក្នុងរឿងចំណាយ ប្រាក់ ហើយនិងការគោរពដល់ក្រុមបាល់ទាត់ស្ត្រី។
សម្រាប់ការប្រកួតបាល់ទាត់ស្រ្តីពិភពលោកឆ្នាំ២០១៩ Fifa បានបង្កើនការចំណាយប្រាក់ ពី ១៥ ទៅ ៦០លានដុល្លារ សម្រាប់រង្វាន់ បាល់ទាត់ស្រ្តី នៅក្នុងពេលការចំណាយសម្រាប់ការបាល់ទាត់ពិភពលោកផ្នែកបុរស មានដល់ទៅ ៤០០លានដុល្លារ។ ប្រធានក្រុមបាល់ទាត់អាមេរិកាំង លោកស្រី Megane Rapinoe ដែលបានទទួលពានរង្វាន់ស្បែកជើងមាស សម្រាប់ការទាត់បញ្ចូលទី ច្រើនគ្រាប់ (៦គ្រាប់) ក្នុងរយៈពេលខ្លី បានសំដែងការខកចិត្ត ដែលFifa រៀបចំការប្រកួតពីរផ្សេងទៀត នៅចំថ្ងៃតែមួយ ដែលមានការប្រកួតផ្តាច់ព្រ័ត្រកីឡាបាល់ទាត់ពិភពលោក ស្រ្តី នៅប្រទេសបារាំង កាលពីថ្ងៃអាទិត្យ។
ប្រសាសន៍របស់លោកស្រី Megane Rapinoe ប្រធានក្រុមបាល់ទាត់អាមេរិក ប្រែសម្រួលដោយឈាង បុប្ផា
“វាជាគំនិតមិនល្អ ដែលដាក់អ្វីគ្រប់យ៉ាង នៅក្នុងថ្ងៃតែមួយ។
ច្បាស់ណាស់ថា មានការប្រកួតផ្តាច់ព្រ័ត ២ផ្សេងទៀត នៅថ្ងៃអាទិត្យ ប៉ុន្តែ នេះគឺជាការប្រកួតបាល់ទាត់ពិភពលោក ផ្តាច់ព្រ័ត្រ គឺជាថ្ងៃដែលគេត្រូវលុបចោលអ្វីទាំងអស់ផ្សេងទៀត។ ខ្ញុំមិនដឹងថា តើវាអាចកើតឡើងបានយ៉ាងម៉េច។
ខ្ញុំលឺនៅកន្លែងផ្សេងថា គេគ្រាន់តែមិនបានគិតនឹកដល់។
អីចឹង តើអ្នកគិតយ៉ាងម៉េច? វាមានបញ្ហា ដែលអ្នកមិនបានគិតនឹកដល់រឿងនេះ ជាពិសេស នៅពេលការប្រកួតបាល់ទាត់ ត្រូវបានរៀបចំទុក តាំងតែពីយូរមកហើយ។
វាជារឿងមិនគួរឲ្យជឿទាល់តែសោះ។ អីចឹង ឥលូវនេះ ខ្ញុំមិនគិតថា យើងហ្នឹង មានអារម្មណ៍ ទទួលបានការគោរព ស្មើពីFifa ដូចដែលFifa មានសម្រាប់កីឡាបាល់ទាត់បុរស ឬជាទូទៅនោះទេ។”
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ