អ្នកជំនាញ និងអ្នកនយោបាយក្នុងលោកគិតគូរឡើងវិញលើច្បាប់ស្តីពីពាណិជ្ជកម្មសត្វ និងរុក្ខជាតិព្រៃដែលរងការផុតពូជ
ក្រុមអ្នកជំនាញ ក្រុមអ្នកនយោបាយ ក្រុមអ្នកតំណាងអង្គការនានា និងក្រុមអ្នកការពារបរិស្ថានមានគ្នាសរុបជាច្រើនពាន់នាក់មកពីជាង ១៨០ប្រទេសក្នុងលោកបានផ្តើមកិច្ចប្រជុំរយៈពេល ១២ថ្ងៃនៅក្នុងប្រទេសស្វ៊ីស។ កិច្ចប្រជុំដែលរៀបចំដោយអនុសញ្ញាស្តីពីពាណិជ្ជកម្មអន្តរជាតិលើប្រភេទសត្វ និងរុក្ខជាតិព្រៃរងការគំរាមផុតពូជមានកម្មវត្ថុជជែកលើសំណើចំនួន ៥៦ ដើម្បីពង្រឹងលើច្បាប់ស្តីពីការការពារពពួកសត្វ និងរុក្ខជាតិព្រៃដែលកំពុងប្រឈមនឹងការផុតពូជ។ លោកស្រីអ៊ីវន ហ៊ីហ្កឺរ៉ូ អគ្គលេខាធិការនៃអនុសញ្ញាស្តីពីពាណិជ្ជកម្មអន្តរជាតិលើប្រភេទសត្វ និងរុក្ខជាតិព្រៃដែលគំរាមផុតពូជបានថ្លែងដោយព្រមានថា គេមិនអាចបន្តអនុវត្តលើអនុសញ្ញាមួយនេះបានទៀតឡើយសម្រាប់ពេលបច្ចុប្បន្ន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៦
អនុសញ្ញាស្តីពីពាណិជ្ជកម្មអន្តរជាតិលើប្រភេទសត្វ និងរុក្ខជាតិព្រៃដែលគំរាមផុតពូជ ឬហៅអនុសញ្ញាក្រុងវ៉ាស៊ីតោនជាកិច្ចព្រមព្រៀងអន្តររដ្ឋាភិបាលដែលបានចុះហត្ថលេខាក្នុងថ្ងៃទី៣ មីនា ឆ្នាំ ១៩៧១។ អនុសញ្ញាមួយនេះបានកំណត់ច្បាប់ស្តីពីពាណិជ្ជកម្មលើពពួកសត្វ និងរុក្ខជាតិព្រៃជាង ៣៥ ០០០ប្រភេទ ហើយអនុសញ្ញាដដែលនេះក៏បានចែងពីយន្តការណ៍ដាក់ទណ្ឌកម្មលើប្រទេសណាដែលមិនព្រមគោរពតាមដែរ។ តែប្រឈមនឹងការជិតផុតពូជពពួកសត្វ និងរុក្ខជាតិសព្វថ្ងៃ គេមិនអាចបន្តអនុវត្តលើអនុសញ្ញាកាលពីជាង ៤០ឆ្នាំមុនបានទៀតឡើយ នេះជាការថ្លែងរបស់លោកស្រីអ៊ីវន ហ៊ីហ្កឺរ៉ូ អគ្គលេខាធិការនៃអនុសញ្ញាស្តីពីពាណិជ្ជកម្មអន្តរជាតិលើប្រភេទសត្វ និងរុក្ខជាតិព្រៃដែលគំរាមផុតពូជ។
ក្តីសង្ឃឹមរបស់លោកស្រីអ៊ីវន ហ៊ីហ្កឺរ៉ូនៅក្នុងកិច្ចប្រជុំរយៈពេល ១២ថ្ងៃ គឺកែប្រែអនុសញ្ញាដែលមានស្រាប់ដោយពង្រឹងបន្ថែមលើវិធានការការពារលើពពួកសត្វ និងរុក្ខជាតិព្រៃដែលកំពុងទទួលការផុតពូជ។ ចំណែករដ្ឋមន្រ្តីក្រសួងមហាផ្ទៃស្វ៊ីសលោកអាឡាំង ប៊ែរស៊េតបានទាមទារឲ្យមានវិធានការម៉ឹងម៉ាត់ និងបន្ទាន់ចំពោះអ្នកបរបាញ់ និងជួញដូរសត្វព្រៃដោយខុសច្បាប់។ គួរបញ្ជាក់ថា សន្និសីទរវាងក្រុមអ្នកជំនាញ ក្រុមអ្នកនយោបាយ ក្រុមអ្នកតំណាងអង្គការនានា និងក្រុមអ្នកការពារបរិស្ថានក្នុងប្រទេសស្វ៊ីសពេលនេះបានធ្វើឡើង បន្ទាប់ពីអង្គការសហប្រជាជាតិបានចេញផ្សាយរបាយការណ៍មួយដែលបញ្ជាក់ថា មានសត្វព្រៃគ្រប់ប្រភេទចំនួន ១លានកំពុងរងការវិនាសផុតពូជ។
តាមលោកស្រីអ៊ីវន ហ៊ីហ្កឺរ៉ូ ប្រធានបទនៃការធ្វើពាណិជ្ជកម្មខុសច្បាប់ពិតជាបញ្ហាដ៏ធំមួយដោយលោកស្រីសម្គាល់ឃើញថា មានការចូលរួមឃុបឃិតពីក្រុមអង្គការមួយចំនួនដែលមានឥទ្ធិពលខ្លាំង។ នៅក្នុងន័យនេះ លោកស្រីបានសំណូមពរឲ្យដាក់ទោសចាស់ដៃលើអ្នកជួញដូរសត្វព្រៃដែលរងការផុតពូជឲ្យដូចនឹងអ្នកជួញដូរមនុស្ស ឬអ្នកជួញដូរគ្រឿងញាន។ ក្រៅពីផ្តោតលើការពង្រឹងច្បាប់ស្តីពីការការពារពពួកសត្វ និងរុក្ខជាតិព្រៃដែលកំពុងប្រឈមនឹងការផុតពូជ កិច្ចប្រជុំដែលរៀបចំរៀងរាល់ ៣ឆ្នាំម្តងរយៈពេល ១២ថ្ងៃក៏នឹងសិក្សាលើសំណើមួយចំនួនស្តីពីសត្វដំរីនៅទ្វីបអាហ្រ្វិក និងលើកទៅជជែកជាលើកទី១ ទាក់ទងនឹងសត្វ ក វែងនៅទ្វីបអាហ្រ្វិកដែលបានបាត់បង់អស់ ៤០% ក្នុងរយៈពេល ៣ទសវត្សចុងក្រោយនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ