អង់គ្លេសត្រៀមខ្លួនចូលធ្វើសង្រ្គាមប្រឆាំងក្រុមអង្គការរដ្ឋអ៊ីស្លាមនៅប្រទេសស៊ីរី
លោកប្រធានាធិបតីបារាំង ហ្រ្វង់ស័រ ហូឡង់ នៅថ្ងៃចន្ទទី ២៣វិច្ឆិកា បានធ្វើគារវកិច្ច ទទួល លោកនាយករដ្ឋមន្រ្តីអង់គ្លេស ដាវីដ កាមឺរូន នៅទីក្រុងប៉ារីស។ ប្រមុខដឹកនាំបារាំង និងអង់គ្លេសបានអញ្ជើញទៅដាក់ផ្កា នៅមុខសាលប្រគំតន្រ្តី បាតាក្លង់ ដើម្បីគោរពវិញ្ញាណក្ខន្ធជនរងគ្រោះ ទាំង ១៣០នាក់ ដែលបានស្លាប់ នៅក្នុងភេរវកម្មបង្កឡើងដោយសមាជិករបស់ក្រុមជីហាតនៃអង្គការរដ្ឋអ៊ីស្លាម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៨:៥១
លោកនាយករដ្ឋមន្រ្តី អង់គ្លេស ដាវីដ កាមឺរូនបានប្រកាសគាំទ្រសកម្មភាពរបស់បារាំង ដែលបើកប្រតិបត្តិការទ័ពអាកាស វាយប្រហារទៅលើក្រុមជីហាតនៃអង្គការរដ្ឋអ៊ីស្លាម នៅក្នុងប្រទេសស៊ីរី។ រដ្ឋមន្រ្តីអង់គ្លេសបានអំពាវនាវផងដែរ ឲ្យប្រទេសនៅអឺរ៉ុបសហការគ្នា ដោះដូរគ្នា ព័ត៌មានស្តីពីជនជាតិអឺរ៉ុបដែលទើបត្រលប់មកពី ប្រយុទ្ធនៅប្រទេសស៊ីរី។ “យើងត្រូវខំប្រឹងធ្វើការបន្ថែមដើម្បីកំណត់មុខសញ្ញាជនប្រដាប់អាវុធ បរទេស ដែលទើបមកពីស៊ីរី និងដែលគំរាមធ្វើភេរវកម្មនៅ អឺរ៉ុប។ វាជារឿងគួរអស់សំណើចណាស់ ដែលយើងទទួលបានព័ត៌មានសម្ងាត់ស្តីពីក្រុមភេរវជនអឺរ៉ុបពីប្រទេសដែលស្ថិតនៅក្រៅរង្វង់សហភាពអឺរ៉ុប” នេះជាការថ្លែងសោកស្តាយរបស់លោកដាវីដ កាមឺរូន។
នៅក្នុងការប្រកាសរួមជាមួយប្រធានាធិបតីបារាំង លោកនាយករដ្ឋមន្រ្តីអង់គ្លេសបាននិយាយថា លោកជឿជាក់ថា អង់គ្លេសនឹងចូលរួមជាមួយបារាំង ដើម្បីធ្វើប្រតិបត្តិការទ័ព នៅស៊ីរី។ លោកបន្ថែមថា នៅសប្តាហ៍នេះ លោកនឹងដាក់យុទ្ធសាស្រ្តរួមមួយ ដើម្បីប្រយុទ្ធប្រឆាំងនឹងក្រុមជីហាតនៃអង្គការរដ្ឋអ៊ីស្លាមទៅឲ្យសភាអង់គ្លេស អនុម័ត។
ដើម្បីសំដែងសាមគ្គីភាព និងគាំទ្របារាំង ក្នុងយុទ្ធនាការប្រយុទ្ធប្រឆាំងនឹងក្រុមជីហាត នៃអង្គការរដ្ឋអ៊ីស្លាម លោកនាយករដ្ឋមន្រ្តីអង់គ្លេសបាននិយាយប្រាប់ប្រធានាធិបតីបារាំងថា បារាំងអាចប្រើមូលដ្ឋានទ័ពអង់គ្លេស នៅប្រទេសស៊្ហីប សម្រាប់យន្តហោះបារាំងដែលមានបេសកកម្មចេញទៅវាយប្រហារក្រុមជីហាតនៅស៊ីរី។
មុននឹងអាចដាក់ គម្រោងយុទ្ធសាស្រ្តទៅឲ្យសភាអនុម័ត លោកនាយករដ្ឋមន្រ្តីអង់គ្លេសចាំបាច់ត្រូវតែប្រមូលព័ត៌មានឲ្យបានច្រើន ពីបារាំង ដែលទើបតែរងគ្រោះដោយភេរវកម្ម។ គោលដៅ គឺដើម្បីមានអំណះអំណាងច្រើនដើម្បីនិយាយបញ្ចុះបញ្ចូលសភាអង់គ្លេស។
សេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ កាលពីថ្ងៃសុក្រមុន ដែលបើកផ្លូវឲ្យប្រទេសនីមួយៗ ចូលរួមប្រយុទ្ធប្រឆាំង នឹងក្រុមជីហាតនៃអង្គការរដ្ឋអ៊ីស្លាម គឺជាទម្ងន់មួយ សម្រាប់រដ្ឋាភិបាលអង់គ្លេសយកទៅនិយាយ បញ្ចុះបញ្ចូលសភាអង់គ្លេស។ តាមមន្រ្តីរដ្ឋាភិបាលអង់គ្លេសម្នាក់ ទាល់តែរដ្ឋាភិបាលច្បាស់ក្នុងចិត្តថា មានឯកសាររឹងមាំ មានអំណះអំណាងគ្រប់គ្រាន់ ដើម្បីបញ្ចុះបញ្ចូលសមាជិកសភា ទើបរដ្ឋាភិបាលដាក់ស្នើទៅសភាឲ្យអនុម័តបោះឆ្នោតគាំទ្រសកម្មភាពរបស់ខ្លួន។
សភាអង់គ្លេសធ្លាប់បានបោះឆ្នោត អនុញ្ញាតឲ្យរដ្ឋាភិបាលអង់គ្លេសធ្វើប្រតិបត្តិការទ័ពប្រឆាំងក្រុមជីហាតនៃអង្គការរដ្ឋអ៊ីស្លាម នៅប្រទេស អ៊ីរ៉ាក់ ប៉ុន្តែមិននៅស៊ីរីទេ។ លើកនេះ បើសិនរដ្ឋាភិបាលដាក់ស្នើគម្រោងធ្វើប្រតិបត្តិការទ័ពនៅស៊ីរី ប៉ុន្តែ សភាបែរជាមិនបោះឆ្នោតគាំទ្រ នោះរដ្ឋាភិបាលអង់គ្លេសពិតជាបាក់មុខ ហើយក្រុមជីហាតនៃអង្គការរដ្ឋអ៊ីស្លាមពិតជាបានចិត្ត យកបរាជ័យរបស់រដ្ឋាភិបាលទៅផ្សព្វផ្សាយឃោសនាសម្រាប់ប្រយោជន៍ខ្លួនមិនខាន។
អង់គ្លេសប្រកាសដំឡើងថវិកាប្រយុទ្ធប្រឆាំង ភេរវកម្ម ប្រមាណ ៣០ភាគរយ
ភេរវកម្មមិនត្រឹមសម្លាប់មនុស្ស ប៉ុន្តែ វាធ្វើឲ្យប្រទេសដែលរងគ្រោះ ចំណាយលុយច្រើនរាប់ពាន់លានដុល្លារ។ នៅក្រោយភេរវកម្ម ឆ្នាំ ២០០១ សហរដ្ឋអាមេរិក បានចំណាយលុយប្រមាណ ១០០ពាន់លានដុល្លារ ក្នុងមួយឆ្នាំៗ ដើម្បីប្រយុទ្ធប្រឆាំងសកម្មភាពភេរវកម្ម។ ពោលគឺប្រជាជនអាមេរិកាំងម្នាក់ត្រូវចំណាយប្រមាណ ៣០០ដុល្លារ ក្នុងមួយឆ្នាំ សម្រាប់ការប្រយុទ្ធប្រឆាំងអំពើភេរវកម្ម។
បើទោះបីជាពេលនេះ មិនបានរងគ្រោះដោយផ្ទាល់ ប៉ុន្តែ អង់គ្លេសវិញ ក៏បានបង្កើនកញ្ចប់ថវិកាប្រយុទ្ធប្រឆាំងភេរវកម្ម ពង្រឹងសន្តិសុខ នៅក្រោយឃើញទីក្រុងប៉ារីសរងភេរវកម្ម ។ តាមរដ្ឋមន្រ្តីហិរញ្ញវត្ថុ អង់គ្លេស George Osborne រដ្ឋាភិបាលគ្រោងនឹងដំឡើងថវិកាប្រយុទ្ធប្រឆាំងភេរវកម្មប្រមាណ ៣០ភាគរយ (២១ពាន់លានអឺរ៉ូ) សម្រាប់រយៈពេល ៥ឆ្នាំ។ នាយករដ្ឋមន្រ្តីអង់គ្លេសវិញ នៅថ្ងៃនេះ បានសន្យាផងដែរ ដំឡើងថវិកាយោធាអង់គ្លេស ឲ្យដល់១៧ពាន់លានអឺរូ សម្រាប់រយៈពេល៥ឆ្នាំដែរ។
នៅបារាំង ការដំឡើងថវិកាសម្រាប់ប្រយុទ្ធប្រឆាំងភេរវកម្មមានជាបន្តបន្ទាប់ ចាប់តាំងពីប៉ារីសរងភេរវកម្មនៅខែមករា ដើមឆ្នាំ២០១៥។ ជាសរុប ខ្ទង់ចំណាយសម្រាប់ប្រយុទ្ធប្រឆាំង នឹងភេរវកម្ម ដែលនៅក្នុងនោះ មានការចំណាយលើប៉ូលិស ទាហាន ដែលត្រូវពង្រាយ ធានាសន្តិសុខក្នុងប្រទេស មានដល់ទៅ ១ពាន់ ៧រយលានអឺរ៉ូ ក្នុងមួយឆ្នាំៗ។ នេះគេនៅ ទាន់បូកបញ្ចូលចំណាយដែលបារាំងត្រូវធ្វើ សម្រាប់បញ្ជូនយន្តហោះរបស់ខ្លួនទៅធ្វើប្រតិបត្តិការនៅសមរភូមិបរទេសនោះទេ។ គ្រាន់តែជាឧទាហរណ៍ នាវាផ្ទុយយន្តហោះបារាំង Chales de Gaulle ដែលបារាំងទើបបញ្ជូនទៅក្នុងសមរភូមិប្រយុទ្ធនឹងក្រុមជីហាតនៅស៊ីរី ធ្វើឲ្យបារាំង ត្រូវចំណាយលុយប្រមាណ ៥ម៉ឺនអឺរ៉ូ ក្នុងមួយម៉ោង។
រកឫសគល់នៃបញ្ហា
ទោះជាគេចំណាយលុយច្រើន និងបញ្ជូនយន្តហោះចម្បាំងច្រើនទៅស៊ីរី ប៉ុន្តែ បើគេគ្មានចេតនា ឆន្ទៈ ពិតប្រាកដ ដើម្បីបំផ្លាញក្រុមជីហាត នៃអង្គការរដ្ឋអ៊ីស្លាម នោះក្រុមជីហាតនៅតែមានជីវិតដដែល។ ការបំផ្លាញក្រុមជីហាត នៃអង្គការរដ្ឋអ៊ីស្លាម គឺមិនសំខាន់ ទៅលើការបញ្ជូនយន្តហោះទៅទម្លាក់គ្រាប់បែក ឬបញ្ជូនទ័ពជើងគោកនោះទេ ប៉ុន្តែ គឺគេត្រូវរកឲ្យឃើញឫសគល់របស់វា។
ដំបូង គ្រប់ភាគី មិនថា ប្រទេសលោកខាងលិច ឬក្រុមប្រឆាំង ស៊ីរី និយាយថា ទាល់តែប្រធានាធិបតីបាស្ហា អាល់អាសាដចុះចេញពីតំណែង ទើបសង្រ្គាមស៊ីវិលនៅស៊ីរី អាចបិទបញ្ចប់។ ពោលគឺក្រុមជីហាតនៃអង្គការរដ្ឋអ៊ីស្លាមនឹងអស់មានទឹកមាត់ ដើម្បីនិយាយបញ្ចុះបញ្ចូលជនបរទេសឲ្យចូលប្រយុទ្ធនឹងខ្លួន ដើម្បីប្រឆាំងនឹងទាហានរដ្ឋាភិបាលស៊ីរី។ ប៉ុន្តែ សង្គ្រាមស៊ីវិលនៅស៊ីរី បានប្រែក្លាយជាសង្រ្គាមពង្រីកទឹកដីរបស់ក្រុមជីហាត នៅពេលបច្ចុប្បន្ន។ ក្រុមជីហាតនៃអង្គការរដ្ឋអ៊ីស្លាមកកើតដំបូង ក៏ដោយសារតែ ការចុះខ្សោយនៃនិកាយស្ហ៊ីអ៊ីត នៅប្រទេសអ៊ីរ៉ាក់ និងវិបត្តិនយោបាយនៅស៊ីរី។ អារ៉ាប៊ី សាអូឌីត កាតារ ដែលជាប្រទេសមានប្រជាជនកាន់និកាយស៊ុននីតច្រើនធ្លាប់បានចាយលុយ សម្រាប់ឧបត្ថម្ភគាំទ្រអាវុធ និងលុយ ដល់ក្រុមជីហាត នៃអង្គការរដ្ឋអ៊ីស្លាម ដើម្បីឲ្យក្រុមនេះអាចបង្កអស្ថរិភាព នៅអ៊ីរ៉ាក់ និងស៊ីរី ដែលមានរដ្ឋាភិបាលជាសម្ព័ន្ធមិត្តរបស់អ៊ីរ៉ង់ និកាយស៊្ហីអ៊ីត។ ការរីកធំធាត់ក្រុមជីហាតនៃអង្គការរដ្ឋអ៊ីស្លាម ក៏ដោយសារតែ ជម្លោះរវាងក្រុមអ៊ីស្លាម និកាយស៊្ហីអ៊ីត និងស៊ុននីត។ ទាល់តែបន្ធូរបន្ថយ ជម្លោះនិកាយសាសនា និងបិទខ្ទប់ប្រាក់ចំណូល របស់ក្រុមជីហាតនៃអង្គការរដ្ឋអ៊ីស្លាមទើបគេអាចសង្ឃឹមធ្វើឲ្យក្រុមជីហាតរលាយសាបសូន្យ។
ចំណុចចុងក្រោយមួយទៀត ដែលគេត្រូវចាប់អារម្មណ៍។ នៅក្រោយភេរវកម្មនៅក្រុងប៉ារីសទាំងពីរលើក និងភេរវកម្មនៅបែលហ្ស៊ិក គេឃើញថា ជនរងគ្រោះជាមនុស្សចម្រុះជាតិសាសន៍ ភាគច្រើនជាអឺរ៉ុប ហើយនិងកាន់សាសនាជ្វីហ្វ។ ក្រុមភេរវនិយមវិញ សុទ្ធតែជាយុវជនអឺរ៉ុប ដែលបានចេញដំណើរទៅប្រយុទ្ធក្នុងក្រុមជីហាត នៅស៊ីរី ឬអ៊ីរ៉ាក់។ បើមើលទៅលើដាន ប្រវត្តិរបស់ក្រុមនេះ គឺភាគច្រើនជាជនជាតិបរទេស កាន់សាសនាអ៊ីស្លាម ដែលបានកើតធំដឹងក្តីនៅបារាំង និងបែលហ្ស៊ិក។ តាមអ្នកវិភាគខ្លះ ក្រុមជីហាតនៃអង្គការរដ្ឋអ៊ីស្លាមជាក្បាលម៉ាស៊ីន ធ្វើភេរវកម្មនៅអឺរ៉ុបពិតមែនហើយ ប៉ុន្តែ គឺយុវជនអឺរ៉ុបទៅវិញទេ ដែលត្រលប់មកដាក់គ្រាប់បែក សម្លាប់ជនជាតិឯង។ សកម្មភាពរបស់យុវជនទាំងនោះ បានឆ្លុះបញ្ចាំងឲ្យគេឃើញ ពីការតស៊ូ ប្រឆាំងទាមទាររបស់ក្រុមយុវជន ដើមកំណើតបរទេស ដែលធ្លាប់ទទួលការរើសអើង ស្បែកសំបុរ ឬសាសនា ក្នុងសង្គមបារាំង។
ដើម្បីបំផ្លាញក្រុមជីហាត គេត្រូវកាត់បន្ថយចំនួនយុវជនដែលទៅធ្វើជាទាហានបរទេសឲ្យក្រុមជីហាត។ ធ្វើដូច្នេះ បាន លុះត្រាណាតែរដ្ឋាភិបាលរបស់ប្រទេសនីមួយៗ ត្រូវកែលម្អ ស្ថានភាពរបស់យុវជនដែលធ្លាប់រស់នៅអស់សង្ឃឹមក្នុងទឹកដីបារាំង។ ការបង្កើតការងារធ្វើមិនគ្រប់គ្រាន់ នោះទេ ប៉ុន្តែ គេត្រូវជួយលើកទឹកចិត្ត ដើម្បីឲ្យយុវជនដើមកំណើតបរទេស ស្រឡាញ់ជីវិត មិនទៅចូលរួមក្នុងក្រុមជីហាតនៃអង្គការរដ្ឋអ៊ីស្លាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ