ជនអន្តោប្រវេសន៍៖ហេតុអ្វីបានជាសហភាពអឺរ៉ុប និងប្រទេសតួកគីពិបាកនិយាយចុះសម្រុងគ្នា?
នៅថ្ងៃសុក្រ ទី១៨ មីនានេះ ជាថ្ងៃទី២ និងជាថ្ងៃចុងក្រោយនៃជំនួបកំពូលអឺរ៉ុបក្នុងទីក្រុងព្រុចសែល ប្រទេសបែលហ្សិក។ គោលដៅនៃជំនួបរបស់ប្រទេសសមាជិកអឺរ៉ុបទាំង ២៨ប្រទេស គឺស្វែងកិច្ចព្រមព្រៀងចុងក្រោយមួយជាមួយប្រទេសតួកគីស្តីពីសំណុំរឿងជនអន្តោប្រវេសន៍។ គឺជាសំណុំរឿងមួយដ៏ស្មុគស្មាញ និងមានការតថ្លៃគ្នាយ៉ាងប្រទាញប្រទង់រវាងអឺរ៉ុប និងតួកគីអស់ជាច្រើនសប្តាហ៍កន្លងមកហើយ។ សូម្បីតែនៅក្នុងរង្វង់ប្រទេសអឺរ៉ុបគ្នាឯងក៏ពិបាកនិយាយសម្លេងតែមួយដែរ។ ថ្ងៃនេះ អឺរ៉ុបបានត្រឹមដាក់ឲ្យតួកគីពិចារណានូវអត្ថបទរួមមួយរបស់អឺរ៉ុប មុននឹងឈានដល់អនុម័តលើកិច្ចព្រមព្រៀងជាមួយតួកគី។
ចុះផ្សាយនៅថ្ងៃ៖
ស្តាប់ - ០៥:៥៨
សំណុំរឿងជនអន្តោប្រវេសន៍មិនមែនជារឿងស្មុកស្មាញត្រឹមតែរវាងអឺរ៉ុប និងតួកគីទេ សូម្បីតែក្នុងប្រទេសសមាជិកអឺរ៉ុបគ្នាឯងក៏ពិបាកនិយាយចុះសម្រុងគ្នាដែរ។ ជាក់ស្តែងនៅក្នុងកិច្ចចរចាពេញមួយថ្ងៃព្រហស្បតិ៍ ទី១៧ មីនារហូតរំលងអធ្រាត្រយប់មិញក៏អឺរ៉ុបមិនអាចសម្រេចបាននូវកិច្ចព្រមព្រៀងរួមគ្នាដែរ។ អ្វីដែលប្រទេសសមាជិកអឺរ៉ុបទាំង ២៨ប្រទេសបានឯកភាពគ្នានៅទៀបភ្លឺព្រឹកមិញ គឺជាអត្ថបទរួមមួយដែលយកទៅធ្វើជាមូលដ្ឋានក្នុងការចរចាជាមួយភាគីតួកគីថ្ងៃនេះរវាងលោកនាយករដ្ឋមន្រ្តីតួកគីអាម៉េត ដាវូតូគ្លុយ លោកប្រធានក្រុមប្រឹក្សាអឺរ៉ុបដូណាល់ ទូស្ក និងលោកប្រធានគណកម្មការអឺរ៉ុបហ្សង់ក្លូដ យុងកឺ។
លោកប្រមុខរដ្ឋាភិបាលតួកគីបានព្រមានទុកជាមុននាពេលទៅដល់ទីក្រុងព្រុចសែល ប្រទេសបែលហ្ស៊ិកនៅព្រឹកមិញថា តួកគីនឹងមិនធ្វើការតថ្លៃចុះ ឡើងជាមួយអឺរ៉ុបក្នុងសំណុំរឿងជនអន្តោប្រវេសន៍នេះទេ ព្រមទាំងបញ្ជាក់ច្បាស់ៗថា តួកគីក៏មិនចង់ក្លាយជាគុកឥតជញ្ជាំង ដំបូលប្រក់មេឃសម្រាប់ជនអន្តោប្រវេសន៍ដែរ។ តាមរយៈសម្តីព្រមានរបស់ប្រមុខរដ្ឋាភិបាលតួកគីដូចនេះនាំឲ្យគេសន្និដ្ឋានបានថា នៅមានចំណុចជាច្រើនទៀតដែលអឺរ៉ុប និងតួកគីត្រូវបន្តដោះស្រាយ មុននឹងឈានទៅអនុម័តលើកិច្ចព្រមព្រៀងចុងក្រោយមួយ។
លោកប្រធានាធិបតីបារាំងហ្រ្វង់ស័រ ហូឡង់ក៏បានបញ្ជាក់ថា លោកមិនធានាថានឹងមានសេចក្តីសន្និដ្ឋានមួយដែលអាចទទួលយកបានទាំងអស់គ្នាឡើយ។ ចំណែកលោកស្រីប្រមុខរដ្ឋាភិបាលអាល្លឺម៉ង់អង់ហ្កឺឡា មែលកិលវិញសង្ឃឹមថា កិច្ចព្រមព្រៀងមួយរវាងអឺរ៉ុប និងតួកគីគឺជាឱកាសល្អមួយក្នុងការបិទបញ្ចប់ការរត់ពន្ធមនុស្ស។
តើមានសម្បទានអ្វីខ្លះដែលអឺរ៉ុប និងតួកគីយល់ព្រមរវាងគ្នា?
ជំនួបកំពូលអឺរ៉ុបរយៈពេល ២ថ្ងៃពីថ្ងៃទី១៧ និងទី១៨ មីនានេះ គឺសំដៅពិនិត្យជាថ្មីលើសំណើ ឬលក្ខខណ្ឌដែលតួកគី និងអឺរ៉ុបបានព្រមព្រៀងគ្នាកាលពីជំនួបកំពូលក្នុងថ្ងៃទី៧ និងទី៨ មីនាកន្លងទៅ។ នៅក្នុងកិច្ចព្រមព្រៀងកាលណោះ ទីក្រុងអង់ការ៉ាបានយល់ព្រមបន្តទទួលយកជនភៀសខ្លួនពីប្រទេសក្រិកឲ្យស្នាក់នៅក្នុងទឹកដីខ្លួន ជាថ្នូរនឹងសម្បទានចំនួន ៣ ពីអឺរ៉ុប ទី១ ការលប់ទិដ្ឋាការអឺរ៉ុបចំពោះប្រជាជនតួកគីដែលចង់ចូលក្នុងប្រទេសសមាជិកអឺរ៉ុប ពិសេសប្រទេសសមាជិកក្នុងលំហSchengen ទី២ ពន្លឿនដំណើរការចរចាក្នុងការបញ្ចូលតួកគីជាសមាជិកអឺរ៉ុប និងទី៣ ការបន្ថែមលុយឲ្យតួកគីសម្រាប់ជួយទំនុកបម្រុងជនភៀសខ្លួនចំនួន ២លាន ៧សែននាក់ដែលកំពុងរស់ក្នុងទឹកដីតួកគី។ ទីក្រុងអង់ការ៉ាបានសុំបន្ថែមលុយចំនួន ៣ ០០០លានអឺរ៉ូពីពេលនេះដល់ឆ្នាំ ២០១៨។
អ្វីជាការកត់សម្គាល់ សម្បទានទាំង ៣ ដែលតួកគីចង់បានពីអឺរ៉ុបក៏ត្រូវបានអឺរ៉ុបដាក់លក្ខខណ្ឌត្រឡប់វិញដែរ។ ជាក់ស្តែងនៅក្នុងសម្បទានស្នើឲ្យប្រជាជនតួកគីអាចធ្វើដំណើរក្នុងប្រទេសសមាជិកអឺរ៉ុបដោយមិនចាំបាច់មានទិដ្ឋាការត្រូវបានអឺរ៉ុបទាមទារឲ្យអង់ការ៉ាគោរពលក្ខខណ្ឌសន្តិសុខចំនួន ៧២ចំណុច។ តែមកទល់ពេលនេះ មានតែ ៣៦ចំណុចប៉ុណ្ណោះដែលតួកគីបានបំពេញ។ ក្រៅពីនោះ រឿងសិទ្ធិមនុស្សក៏បន្តជាចំណោតក្នុងការបង្កើនល្បឿនកិច្ចចរចាក្នុងការបញ្ចូលតួកគីជាសមាជិកអឺរ៉ុបដែរ។
លោកបាន គីមូនស្នើឲ្យអឺរ៉ុបគោរពតម្លៃជាសារវន្តរបស់ខ្លួន
អ្វីដែលសហភាពអឺរ៉ុបមិនចង់បន្តឃើញតទៅមុខទៀត គឺការហូរជនអន្តោប្រវេសន៍ដែលភាគច្រើនជាជនជាតិស៊ីរីមកក្នុងដែនដីអឺរ៉ុប ពិសេសទៅក្នុងប្រទេសក្រិកដោយឆ្លងកាត់តាមប្រទេសតួកគី។ នៅក្នុងន័យនេះ និងបើផ្អែកតាមគម្រោងកិច្ចព្រមព្រៀងរវាងអឺរ៉ុប និងតួកគីនៅក្នុងជំនួបកាលពីថ្ងៃទី៧ និងទី៨ មីនា អឺរ៉ុប និងតួកគីបានយល់ព្រមអនុវត្តន៍គោលការណ៍ « មួយទៅ មួយមក » មានន័យថាចាប់ពីពេលនេះទៅ ជនភៀសខ្លួនស៊ីរីម្នាក់ដែលទើបមកដល់ថ្មីក្នុងទឹកដីតួកគី និងដែលត្រូវតួកគីបញ្ជូនចេញវិញនោះ អឺរ៉ុបនឹងទទួលយកជនភៀខ្លួនស៊ីរីម្នាក់ដែលកំពុងស្ថិតលើទឹកដីតួកគីឲ្យរស់ក្នុងទឹកដីអឺរ៉ុប។ ការធ្វើយ៉ាងដូចនេះ គឺក្នុងគោលដៅទប់ស្កាត់កុំឲ្យប្រជាជនស៊ីរីនាំគ្នាសម្រុកចុះទូកធ្វើដំណើរផ្សងព្រេង និងក៏ជាវិធានការប្រឆាំងទប់នឹងការរត់ពន្ធមនុស្សរបស់ឈ្មួញមួយចំនួន។
តែទង្វើនេះត្រូវបានទទួលការបរិហារយ៉ាងចាស់ដៃពីក្រុមអង្គការអ្នកការពារសិទ្ធិមនុស្ស។ ពួកគេបានចាត់ទុកទង្វើរបៀបនេះថា ជាការរំលោភលើសេចក្តីថ្លៃថ្នូររបស់មនុស្សដែលជាតម្លៃសាកលគ្មាននរណាអាចបំពានបាន។ លោកអគ្គលេខាធិការអង្គការសហប្រជាជាតិបាន គីមូនដែលបានទៅចូលរួមនៅក្នុងជំនួបកំពូលអឺរ៉ុប តួកគីថ្ងៃនេះបញ្ជាក់ថា ការសាងសង់ជញ្ជាំង ការរើសអើង ឬមួយក៏ការបញ្ជូនជនភៀសខ្លួនចេញវិញ មិនមែនជាដំណោះស្រាយទេ។ ទន្ទឹមគ្នានេះ លោកបាន គីមូនក៏បានអំពាវនាវប្រទេសអឺរ៉ុបឲ្យបង្ហាញពីតម្លៃជាសារវន្តរបស់ខ្លួនក្នុងបញ្ហាមនុស្សធម៌៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ