ភេរវកម្មប៉ារីស៖ចាប់បានជនសង្ស័យ Salah Abdeslam នៅក្នុងប្រទេសបែលហ្ស៊ិក
ជនសង្ស័យម្នាក់ឈ្មោះ Salah Abdeslam ដែលបង្កភេរវកម្មក្នុងទីក្រុងប៉ារីសកាលពីថ្ងៃទី១៣ វិច្ឆិកាត្រូវបានប៉ូលិសបែលហ្សិកចាប់ខ្លួនបានហើយ។ បើផ្អែកតាមមហាអយ្យការបែលហ្ស៊ិកឲ្យដឹងនៅថ្ងៃសុក្រ ទី១៨ មីនាថា គេបានរកឃើញស្នាមម្រាមដៃជន Salah Abdeslam នៅក្នុងផ្ទះមួយនៅស្រុក Forest ប្រទេសបែលហ្ស៊ិក។ គឺជាលំនៅដ្ឋានដែលក្រុមអ្នកស៊ើបអង្កេតជនជាតិបារាំង និងបែលហ្ស៊ិកចំនួន ៦នាក់បានចូលឆែកឆេរដោយចៃដន្យកាលពីថ្ងៃអង្គារ ទី១៥ មីនាដើមសប្តាហ៍ និងបានទទួលរងការបាញ់ប្រហារពីក្រុមជនប្រដាប់អាវុធពីក្នុងផ្ទះនោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤០
ព័ត៌មាននេះត្រូវបានប្រកាសដោយអ្នកនំាពាក្យមហាអយ្យការបែលហ្ស៊ិក តែលោកបានបដិសេធមិនធ្វើអត្ថាធិប្បាយអ្វីបន្ថែមទាក់ទងនឹងលទ្ធផលនៃការស៊ើបអង្កេត។ បើយោងតាមទូរទស្សន៍រដ្ឋបែលហ្ស៊ិកឈ្មោះ RTBF ឲ្យដឹងថា អ្វីៗហាក់បានបង្ហាញកាន់តែច្បាស់ថា ជនម្នាក់ក្នុងចំណោមជនរត់គេចខ្លួនចំនួនពីរនាក់ ក្រោយផ្ទុះអាវុធនៅពេលប៉ូលិសទៅដល់អាចជាជន Salah Abdeslam ដែលរដ្ឋអំណាចបារាំងកំពុងតាមចាប់ខ្លួន។ តែព័ត៌មាននេះនៅមិនទាន់មានការបញ្ជាក់ជាផ្លូវការនៅឡើយទេ។
គួររម្លឹកជូនឡើងវិញថា នៅរសៀលថ្ងៃអង្គារ ទី១៥ មីនាដើមសប្តាហ៍ ក្រុមអ្នកស៊ើបអង្កេតជនជាតិបារាំង និងបែលហ្ស៊ិកចំនួន ៦នាក់បានចូលឆែកឆេរដោយចៃដន្យនៅក្នុងផ្ទះមួយស្ថិតក្នុងស្រុក Forest ប្រទេសបែលហ្ស៊ិក តែត្រូវបានទទួលស្វាគមន៍ដោយគ្រាប់កាំភ្លើងអាកាជាច្រើនគ្រាប់បាញ់ចេញពីផ្ទះនោះ។ ការបាញ់តគ្នារវាងក្រុមប៉ូលិស និងជនប្រដាប់អាវុធបានបណ្តាលឲ្យស្លាប់ខ្មាន់កាំភ្លើងម្នាក់ និងមាន ២នាក់រត់គេចខ្លួនដែលប៉ូលិសកំពុងតាមចាប់ខ្លួនយ៉ាងសកម្មនាពេលនេះ។
តើជនដែលកំពុងគេចខ្លួនទាំងពីរនាក់នោះមានម្នាក់ឈ្មោះ Salah Abdeslam ឬ?។ នៅមិនទាន់មានចម្លើយយ៉ាងណាទេចំពោះសំណួរនេះ តែអ្វីដែលគេដឹង ស្នាមម្រាមដៃ Salah Abdeslam ត្រូវបានក្រុមអ្នកស៊ើបអង្កេតបារាំង បែលហ្ស៊ិករកឃើញនៅក្នុងផ្ទះនោះ។ សូមជម្រាបជូនថា មានអាយុ ២៦ឆ្នាំ ជន Salah Abdeslam បានជាប់សង្ស័យពីបទបានរួមគំនិតរៀបចំអំពើភេរវកម្មក្នុងក្រុងប៉ារីស ប្រទេសបារាំងកាលពីថ្ងៃទី១៣ វិច្ឆិកា ឆ្នាំ ២០១៥ ដែលបានបណ្តាលឲ្យមានមនុស្សស្លាប់ ១៣០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ