បារាំងកំពុងបារម្ភពីកិច្ចសន្យាលក់យន្តហោះចំបាំងទៅអោយឥណ្ឌា
នៅពេលនេះ បារាំងកំពុងមានការបារម្ភខ្លាចបរាជ័យគំរោងលក់យន្តហោះចំបាំងបារាំង១២៦គ្រឿងទៅអោយឥណ្ឌា ដែលមានតំលៃទឹកប្រាក់ប្រមាណ១១ពាន់លានអឺរ៉ូ។ ព្រោះថា កាលពីថ្ងៃពុធដើមសប្តាហ៍នេះ អ្នកទទួលខុសត្រូវឥណ្ឌា ទទួលបន្ទុកសំណុំរឿងនេះ បានទទួលមរណភាពដោយគាំងបេះដូង។ កិច្ចចរចារវាងបារាំង និងឥណ្ឌាក្នុងការទិញ-លក់យន្តហោះនេះ ជាប់គាំងជាច្រើនខែមកហើយ។ ការស្លាប់អ្នកទទួលខុសត្រូវសំខាន់នេះ ជាបញ្ហាថ្មីមួយទៀត អាចធ្វើអោយកិច្ចសន្យាទិញ-លក់យន្តហោះចំបាំងត្រូវរាំងស្ទះ ពិសេសនៅពេលដែលឥណ្ឌា ជិតរៀបចំការបោះឆ្នោតសភា នៅឆ្នាំ ២០១៤ខាងមុខទៀតនោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣១
កាលពីថ្ងៃពុធដើមសប្តាហ៍ មរណភាពរបស់លោក អារុណ គូម៉ា បាល់ អាយុ៥២ឆ្នាំ ជាអ្នកទទួលខុសត្រូវជាន់ខ្ពស់មកពីក្រសួងការពារជាតិឥណ្ឌា ទទួលបន្ទុកទទួលទិញយន្តហោះចំបាំងបារាំងនោះ បានធ្វើអោយបារាំងមានការបារម្ភខ្លាចគំរោងលក់យន្តហោះចំបាំង១២៦គ្រឿងរបស់ខ្លួន ទៅអោយឥណ្ឌា ត្រូវធ្លាក់ទឹក។
រដ្ឋាភិបាលឥណ្ឌានឹងរកមនុស្សថ្មីទៀតមកជំនួសលោក គូម៉ា បាល់។ ប៉ុន្តែ ក្នុងពេលរង់ចាំអោយដំណើរការនេះបានរលូនទៅមុខ រឿងលក់យន្តហោះទៅអោយឥណ្ឌា អាចស្ទះដំណើរការជាច្រើនសប្តាហ៍។ ឥណ្ឌាត្រូវរៀបចំការបោះឆ្នោតសភា នៅឆ្នាំ២០១៤ខាងមុខ ហើយរដ្ឋាភិបាលថ្មីដែលឡើងមកនោះ ប្រហែលជាត្រូវសើរើមើលរឿងនេះឡើងវិញ អាចធ្វើអោយការទិញ-លក់យន្តហោះចំបាំងបារាំងនេះ ជាប់គាំងតទៅទៀត។ បារាំងមានការបារម្ភខ្ពស់ ពិសេសពេលនេះ ក្រុមហ៊ុនអាកាសចរណ៍ Dassault បារាំង បានបកក្រោយមើលឡើងវិញ នូវខសំខាន់នៃកិច្ចសន្យាលក់យន្តហោះនេះ។
គួររំលឹកថា កាលពីឆ្នាំ២០១២ រដ្ឋាភិបាលឥណ្ឌាបានសំរេចចិត្តទិញយកយន្តហោះចំបាំងRafales របស់បារាំង បន្ទាប់ពីបានចេញការដាក់ដេញថ្លៃ អស់រយៈពេល៤ឆ្នាំមក។ ក្រុមហ៊ុនអាកាសចរណ៍ Dassault បារាំង ត្រូវផលិតយន្តហោះRafales ១៨គ្រឿង នៅបារាំង ហើយត្រូវពិនិត្យការផ្គុំផលិតយន្តហោះសេសសល់១០៨គ្រឿងទៀត នៅក្នុងសហគ្រាស Hindustan នៅភាគខាងជើងឥណ្ឌា។ ប៉ុន្តែ ក្រុមហ៊ុនបារាំងប្រហែលជាបានប្តូរបែបបទវិញ ដែលធ្វើអោយកិច្ចសន្យានេះ មានបញ្ហា។
ក្រុមហ៊ុន Dassault ធ្លាប់បានយល់ព្រមបញ្ជូនបច្ចេកទេសគ្រប់បែបយ៉ាង ទៅអោយឥណ្ឌា តែបានប្តូរចិត្តមកវិញ។ យោងតាមអ្នកស្រាវជ្រាវនៅក្រុងញូវដេល្លីមួយរូប នេះប្រហែលមកពីក្រុមហ៊ុនអន្តរការី Reliance Aerospace ដែលបារាំងបានជ្រើសរើសយកនោះ មិនបានគ្រប់គ្រងកិច្ចការបានល្អ។
លើសពីនេះទៅទៀត ក្រុមហ៊ុន Dassault បារាំង ក៏នៅមិនទាន់ទុកចិត្តសមត្ថភាពឥណ្ឌាក្នុងការផលិតគ្រឿងសម្ភារៈយន្តហោះនោះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ