បារាំង

អាជ្ញាធរបារាំង៖ យន្តហោះ Airbus A ៣២០ និងសាកសព អ្នកដំណើរ បែកខ្ទេច ជាបំណែកតូចៗ

នៅថ្ងៃពុធទី ២៥ មីនា ប៉ូលិស និងក្រុមជួយសង្រ្គោះបារាំង បានចាប់ផ្តើមជាថ្មី ប្រតិបត្តិការរុករកសាកសពរបស់អ្នកជិះ ទាំង១៥០នាក់ របស់យន្តហោះAirbus A ៣២០ របស់ក្រុមហ៊ុនអាកាសចរណ៍អាល្លឺម៉ង់ Germanwing ដែលបានធ្លាក់ កាលពីថ្ងៃអង្គារទី ២៤ មីនា នៅប៉ែកខាងត្បូងបារាំង។ ប្រអប់ខ្មៅ មួយ ក្នុងចំណោមពីរ ដែលបានថតរាល់សំឡេង នៅក្នុងបន្ទប់អ្នកបើកបរយន្តហោះ ត្រូវបានគេរកឃើញ នៅល្ងាចថ្ងៃអង្គារ។ នៅថ្ងៃពុធទី ២៥ មីនា ប្រធានាធិបតី បារាំង និងនាយករដ្ឋមន្រ្តីអាល្លឺម៉ង់ អេស្ប៉ាញត្រូវធ្វើដំណើរ រួមគ្នា ទៅកន្លែងកើតហេតុ ដែលយន្តហោះបានធ្លាក់បែកខ្ទេចខ្ទីរ។ ក្រុមហ៊ុនអាកាសចរណ៍ Germanwing វិញ បានប្រកាសលុបចោលជើងហោះហើររបស់ខ្លួន ខ្លះ នៅថ្ងៃនេះ ដោយសារតែអ្នកបើកបររបស់ក្រុមហ៊ុននៅជាប់រន្ធត់នឹងហេតុការណ៍ធ្លាក់ស្លាប់អ្នកដំណើរ និងសហជីវិនរបស់ខ្លួន កាលពីថ្ងៃម្សិលមិញ។

ចុះផ្សាយនៅថ្ងៃ៖ 25/03/2015 - 13:07កែប្រែថ្ងៃទី៖ 25/03/2015 - 15:58

កម្ទេចបំណែកយន្តហោះ និងសាកសពអ្នកដំណើរ នៅរាយប៉ាយនលើជំរាលភ្នំ នៅភាគខាងត្បូងបារាំង Reuters TV/Pool

ដោយ៖ ឈាង បុប្ផា

ផ្សាយពាណិជ្ជកម្ម

ក្រុមជួយសង្រ្គោះបារាំងមិនទាន់បានធ្វើការរុករក ឲ្យធំ ដុំកំភួនទេ។ ប្រតិបត្តិការរបស់ក្រុមជួយសង្រ្គោះបារាំង ប្រព្រឹត្តទៅដោយយឺតៗ ហើយគេគិតថា ប្រតិបត្តិការរុករកសាកសពនឹងអាចត្រូវការពេលវេលាយូរថ្ងៃ ព្រោះថា កន្លែងដែលយន្តហោះ Airbus A ៣២០ បានធ្លាក់ កាលពីថ្ងៃម្សិលមិញ គឺស្ថិតនៅក្នុងជ្រលងភ្នំ ដែលគេមិនអាចធ្វើដំណើរដោយជើង ឬរថយន្ត ទៅដល់ដោយងាយស្រួល។ រហូតមកដល់ពេលនេះ ប្រតិបត្តិរុករក ធ្វើឡើងតាមមធ្យោបាយតែមួយ គឺតាមរយៈឧទ្ធម្ភាគចក្រតែប៉ុណ្ណោះ។

តាមក្រុមជួយសង្រ្គោះបារាំង គេពិបាកនឹងអាចរកឃើញសាកសព ដោយងាយណាស់។ បើមើលរូបភាពដែលបង្ហាញដោយប្រព័ន្ធផ្សព្វផ្សាយបារាំង យន្តហោះ របស់ក្រុមហ៊ុនGermanwingបានបែក ខ្ទេច ល្អិតផង់ រ៉ាយប៉ាយ ក្នុងជ្រលងភ្នំ កំពស់ជាង ១ពាន់ម៉ែត្រ គឺដូចជាកំទេចសំរាមអេឡិចត្រូនិកដែលគេចាក់ចោល នៅលើជំរាល ភ្នំ។ បំណែកយន្តហោះធំបំផុតដែលគេរកឃើញ គឺមានតែកង់ខាងមុខ យន្តហោះ ក្រៅពីនោះ គឺជាបំណែកតូចល្អិតទាំងអស់។ បើយន្តហោះបែកខ្ទេច ល្អិតផង់យ៉ាងដូច្នេះ តើជោគវាសនារបស់អ្នកដំណើរនឹងទៅជាយ៉ាងណា? ពាក្យយ៉ាងខ្លីដែលក្រុមជួយសង្រ្គោះបារាំង អាចនិយាយបាន គឺសាកសពរបស់អ្នកដំណើរត្រូវបែក ដាច់ចេញ ជាបំណែកតូចៗ គ្មានសល់អ្វីទេ។ ការកំណត់អត្តសញ្ញាណ និង ការផ្គុំប្រមូលសាកសព គឺជារឿងពិបាក និងត្រូវការពេលយូរ។

តាមរដ្ឋមន្រ្តីក្រសួងមហាផ្ទៃបារំាង លោកBernard Cazeneuve បំណែកយន្តហោះ បែកល្អិត រាយប៉ាយ ក្នុងទំហំដីមួយហិចតាកន្លះ។ នេះ សបញ្ជាក់ថា ការបុកទង្គិច រវាងយន្តហោះបានហោះទៅបុកទង្គិច យ៉ាងខ្លាំង នឹងកំពូលភ្នំ។

តើគេដឹងពីអ្វីខ្លះ ពីគ្រោះថ្នាក់ធ្លាក់យន្តហោះ Germanwing?
យន្តហោះ Airbus A ៣២០ របស់ក្រុមហ៊ុន Germanwing ដឹកអ្នកដំណើរ ១៤៤នាក់ និង៦នាក់ទៀត ជាអ្នកបម្រើ និងអ្នកបើកយន្តហោះ។ តាមទីភ្នាក់ងារព័ត៌មានបារាំង AFP ៦៤នាក់ ជាជនជាតិអាល្លឺម៉ង់ ក្នុងនោះ មានសិស្សសាលា១៦នាក់ និងកូនង៉ែតពីរនាក់។ ៤៥នាក់ ផ្សេងទៀត ជាជនជាតិអេស្ប៉ាញ។ នៅថ្ងៃនេះ ប្រទេសជប៉ុន តួកគី អូស្ត្រាលី អាហ្សង់ទីន កូឡុំប៊ី និងបែលហ្ស៊ិក ជាដើម បាននិយាយថា មានជនជាតិរបស់ខ្លួន នៅក្នុងគ្រោះថ្នាក់យន្តហោះម្សិលមិញដែរ។ យន្តហោះ Airbus A ៣២០ របស់Germanwing បានហោះចេញពីទីក្រុងបាសឺឡូន ប្រទេសអេស្ប៉ាញ នៅម៉ោង១០ព្រឹក ម៉ោងក្នុងប្រទេសបារាំង សំដៅទីឌុយសែលដូហ្វ របស់អាល្លឺម៉ង់។ Airbus A ៣២០ ជាយន្តហោះដែលក្រុមហ៊ុនអាកាសចរណ៍អាល្លឺម៉ង់ lufthansa ដាក់ឲ្យប្រើប្រាស់តាំងពីឆ្នាំ ១៩៩០ ហើយវាទើបតែចាប់ហោះ នៅខែមករា ឲ្យក្រុមហ៊ុនGermanwing ដែលជាសាខាហោះហើរក្នុងស្រុករបស់ lufthansa។ អ្នកបើកបរយន្តហោះវិញ មានបទពិសោធន៍ហោះហើរយន្តហោះ ១០ឆ្នាំ។

ប៉ុន្តែ នៅម៉ោង ១០ កន្លះ យន្តហោះនេះបានបាត់ពីរ៉ាដា របស់ក្រុមត្រួតពិនិត្យអាកាសចរណ៍បារាំង។ នៅពេលនោះ ក្នុងរយៈពេល ៨នាទី យន្តហោះ របស់ក្រុមហ៊ុនGermanwing បានទម្លាក់កំពស់ហោះហើរ និងហោះបន្ទាបខ្លួន ចុះ យ៉ាងលឿន ដោយមិនដឹងមូលហេតុ។ តាមទីភ្នាក់ងារស៊ើបអង្កេត និងវាយតម្លៃរបស់បារាំង នៅពេលនោះ អ្នកបើកបរយន្តហោះ របស់ក្រុមហ៊ុន Germanwing មិនបានផ្តល់ សុំជំនួយ ឬសញ្ញាអាសន្ន អ្វី ទេ។ គឺវិស្វករបារាំងខាងត្រួតពិនិត្យអាកាសចរណ៍ទេ ដែលបានទាញសញ្ញាអាសន្ន ដោយខ្លាចក្រែងថា យន្តហោះអាចបាត់ខ្លួន ដោយសារមានការចាប់ជំរិតរបស់ក្រុមភេរវជន។ យន្តហោះចម្បាំងបារាំង ដែលប្រចាំការសម្រាប់ ឆ្លើយតបនឹងអំពើភេរវកម្ម នៅពេលនោះបានចេញដំណើរទៅម្តុំកន្លែងដែលយន្តហោះ Airbus A ៣២០បានបាត់ខ្លួន។ គឺពេលនោះហើយ ដែលគេដឹងថា យន្តហោះ Airbus A ៣២០បានហោះទៅបុកភ្នំ និងផ្ទុះឆេះខ្ទេចខ្ទីរ។

ប្រអប់ខ្មៅមួយរបស់យន្តហោះ របស់ក្រុមហ៊ុនGermanwingដែលរើសចេញពីកំទេច បំណែកយន្តហោះ ធ្លាក់ថ្ងៃអង្គារ © REUTERS/BEA/Handout

ក្រុមភេរវនិយម មិនមែនជាអាទិភាព នៅក្នុងការស៊ើបអង្កេត ក្នុងការធ្លាក់យន្តហោះ អាល្លឺម៉ង់
តាមរដ្ឋមន្រ្តីការក្រសួងមហាផ្ទៃបារាំង លោកBernard Cazeneuve ដែលបានធ្វើដំណើរទៅដល់កន្លែងកើតហេតុ យន្តហោះ Airbus A ៣២០ របស់ក្រុមហ៊ុនអាកាសចរណ៍អាល្លឺម៉ង់ Germanwing គេបានរកឃើញ ប្រអប់ខ្មៅ មួយ ក្នុងចំណោមប្រអប់ខ្មៅពីររបស់យន្តហោះ។ បើទោះបីជាប្រអប់ខ្មៅ ត្រូវខូចខាតខ្លះ ប៉ុន្តែ រដ្ឋមន្រ្តីបារាំងនិយាយថា គេនៅអាចជួសជុល ស្រង់យកព័ត៌មានពីប្រអប់ខ្មៅបាន។

ប្រអប់ខ្មៅ ដែលគេរកឃើញ កាលពីថ្ងៃម្សិលមិញ ជាប្រអប់ខ្មៅ ដែលថតរាល់កិច្ចសន្ទនា នៅក្នុងបន្ទប់បើកយន្តហោះ។ ប្រអប់ខ្មៅនេះនឹងអាចផ្តល់ព័ត៌មានថា ហេតុអ្វីបានជាអ្នកបើកយន្តហោះទម្លាក់កំពស់ហោះហើរ ខុសប្រក្រតីយ៉ាងដូច្នេះ។ តាមរយៈកិច្ចសន្ទនាដែលប្រអប់ខ្មៅថតបាន គេនឹងដឹងទៀតថា ហេតុអ្វីបានជាអ្នកបើកយន្តហោះមិនព្រមបញ្ជូនសញ្ញាអាសន្ន Mayday ទៅអ្នកត្រួតពិនិត្យអាកាសចរណ៍ នៅពេលយន្តហោះបាត់បង់លំនឹង និងកំពស់ហោះហើរហើយនោះ?

ទាក់ទងនឹងសម្មតិកម្មដែលថា យន្តហោះអាចធ្លាក់ដោយសារស្នាដៃក្រុមភេរវកម្មវិញ រដ្ឋមន្រ្តីមហាផ្ទៃបារាំងបាននិយាយថា វាមិនមែនជារឿងចំបង ដែលគេផ្តល់អាទិភាព ខ្លាំង នៅការស៊ើបអង្កេតនោះទេ។ យ៉ាងណាក៏ដោយ តាមរដ្ឋមន្រ្តីបារាំង គ្រប់សម្មតិកម្មទាំងអស់ ដែលមានតាំងពីបញ្ហាបច្ចេកទេស ឬភេរវកម្មនោះ នឹងត្រូវគេសិក្សាលំអិត។ ហើយគេអាចធ្វើការសន្និដ្ឋានផ្លូវការណាមួយ ស្តីពីមូលហេតុដែលធ្វើឲ្យយន្តហោះ ធ្លាក់ នៅពេលណាគេសិក្សាបូកបញ្ចូន ទិន្នន័យរបស់ប្រអប់ខ្មៅមួយទៀត របស់យន្តហោះ ដែលពេលនេះ គេកំពុងស្វែងរកនៅឡើយនោះ។ ទីក្រុងវ៉ាស៊ីនតោនវិញបាននិយាយ កាលពីថ្ងៃម្សិលមិញថា យន្តហោះអាល្លឺម៉ង់ដែលធ្លាក់ អាចមិនមែនជាស្នាដៃរបស់ក្រុមភេរវជនទេ។ ក្រុមហ៊ុនGermanwing ផ្ទាល់ក៏ទាត់ចោលសម្មតិកម្មដែលថា យន្តហោះអាចធ្លាក់ដោយសារ ភេរវជន។

ក្រុមហ៊ុនហោះហើរ ដែលមានតម្លៃ ថោក Low Cost មិនអាចធានាសុវត្ថិភាពដល់អ្នកដំណើរ?
យន្តហោះ Airbus A ៣២០ ត្រូវបានក្រុមហ៊ុនអាកាសចរណ៍ lufthansaផ្ទេរទៅឲ្យសាខាក្នុងស្រុករបស់ខ្លួន គឺក្រុមហ៊ុន Germanwing ជាយន្តហោះដែលធានាសុវត្ថិភាពបំផុត។

យន្តហោះ Airbus A ៣២០ដែលធ្លាក់នៅថ្ងៃអង្គារ ត្បិតវាមានអាយុ ២៤ឆ្នាំ គឺចាស់មែនទែន ព្រោះយន្តហោះមួយអាចមានអាយុ ហោះហើរត្រឹម២៥ឆ្នាំ ប៉ុន្តែ វា បានទទួលការជួសជុល រុះរើដ៏សម្បើមមួយកាលពីឆ្នាំ ២០១៣។ តាមក្រុមហ៊ុនGermanwing Airbus A ៣២០ ទើបត្រូវបានបំពាក់ដោយប្រព័ន្ធកុំព្យូទ័រទំនើបចុងក្រោយទៀត។ ចំណែកអ្នកបើកបរមានបទពិសោធន៍ ជាង ១០ឆ្នាំ។

យន្តហោះរបស់ក្រុមហ៊ុនlow Cost មិនមែនសុទ្ធតែគ្រោះថ្នាក់ សម្រាប់អ្នកដំណើរនោះទេ។ នៅអឺរ៉ុប ក្រុមហ៊ុន low Cost មានកេរ្តិ៍ឈ្មោះល្បី និងត្រូវគេបានទទួលស្គាល់ខាងធានាសុវត្ថិភាពបំផុត។ ក្រុមហ៊ុន low Cost អាចផ្តល់តម្លៃសំបុត្រថោក ដោយសារគេមានសន្សំសំចៃ ខាងផ្នែក សេវា ប៉ុន្តែ មិនមានន័យថា យន្តហោះរបស់ក្រុមហ៊ុន low Costយន្តហោះធុនអន់ ឬបានទទួលការជួសជុល តិចតួច ជាង យន្តហោះរបស់ក្រុមហ៊ុនហោះហើរធំៗនោះទេ។ ជាញឹកញយ ក្រុមហ៊ុនហោះហើរ low Cost ភាគច្រើន ច្រើនប្រើយន្តហោះទើបផលិតចេញថ្មី ព្រោះមិនចង់ចំណាយច្រើនលើ ការថែទាំ និងជួសជុល។

ក្នុងរយៈពេល១០ឆ្នាំ នេះជាលើកទីពីរ ប៉ុណ្ណោះ ដែលយន្តហោះរបស់ក្រុមហ៊ុន low Costរបស់អឺរ៉ុប ធ្លាក់ និងសម្លាប់មនុស្សច្រើនបែបនេះ។ កាលពីឆ្នាំ ២០០៥ យន្តហោះ ប៊ូអ៊ីង៧៣៧ របស់ក្រុមហ៊ុន low Costរបស់ប្រទេសស្ហ៊ីបបានធ្លាក់ និងសម្លាប់អ្នកនៅលើយន្តហោះ ទាំង ១២១ បន្ទាប់ពីប្រព័ន្ធខ្យល់អុកស៊ីហ្សែនរបស់យន្តហោះខូច រហូតធ្វើឲ្យអ្នកដំណើរ និងអ្នកបើកបរយន្តហោះត្រូវស្លាប់ដោយសារតែគ្មានខ្យល់ដក។

មានតែប្រអប់ខ្មៅរបស់យន្តហោះដែលនឹងអាចឲ្យគេពី មូលហេតុពិតប្រាកដ ដែលធ្វើឲ្យយន្តហោះរបស់ក្រុមហ៊ុនអាល្លឺម៉ង់ Germanwing ធ្លាក់ កាលពីថ្ងៃអង្គារ៕