លោកពូទីនបញ្ជាឲ្យកងទ័ពយោធភូមិភាគកណ្តាលប្រទេសរុស្ស៊ីត្រៀមប្រយុទ្ធពេញទី
ស្របនឹងបទបញ្ជានៃលោកប្រធានាធិបតីពូទីន ក្នុងឋានៈជាអគ្គមេបញ្ជាការជាន់ខ្ពស់បំផុតនៃប្រទេសអង្គភាពទ័ពអាកាស ទ័ពឆ័ត្រយោង និងកងយន្តហោះដឹកជញ្ជូននៃយោធភូមិភាគកណ្តាលប្រទេសរុស្ស៊ី ចាប់ពីម៉ោង៩និង៣០នាទីព្រឹកថ្ងៃចន្ទ៧កញ្ញានេះ គឺស្ថិតក្នុងភាពផ្ទៀងផ្ទាត់មើលដោយឥតប្រកាសឲ្យដឹងជាមុន អំពីភាពត្រៀមប្រយុទ្ធទាំងស្រុងរបស់គេ សេចក្តីនេះថ្លែងដោយលោករដ្ឋមន្ត្រីការពារជាតិរុស្ស៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥២
ក្នុងកិច្ចប្រជុំបើកធ្វើជាបន្ទាន់ នៃថ្នាក់ដឹកនាំយោធា ដែលប្រព្រឹត្តទៅព្រឹកមិញ ក្នុងមជ្ឈមណ្ឌលជាតិខាងគ្រប់គ្រងការការពារប្រទេសលោកនាយឧត្តមសេនីយ Serguei Shoigou ជារដ្ឋមន្ត្រីការពារជាតិរុស្ស៊ី ក៏បានឲ្យដឹងថា ក្នុងរយៈពេលផ្ទៀងផ្ទាត់មើលភាពត្រៀមប្រយុទ្ធនេះ ដែលនឹងពន្យារទៅលុះរហូតដល់ថ្ងៃ១២កញ្ញា ក្នុង១ថ្ងៃ១យប់ដំបូង នៃដំណើរផ្ទៀងផ្ទាត់នោះ ការយកចិត្តទុកដាក់គឺផ្តោតទៅលើ សមត្ថភាពកងទ័ព បំពេញចំណោទក្នុងកម្រិតជាក់លាក់ ស្របនឹងបទដ្ឋានបណ្តោះអាសន្ន។
បន្ទាប់មក នឹងប្រព្រឹត្តទៅ លំហាត់សឹកនៅតាមវាលវង់ ជាទីដែលត្រូវផ្ទៀងផ្ទាត់មើលភាពត្រៀមខ្លួនរបស់ទ័ពឆ័ត្រយោង បោះពួយទៅចម្ងាយឆ្ងាយៗ និង លុកចូលទៅក្នុងដែនដី ដែលគេមិនធ្លាប់ស្គាល់ តាមរយៈការលោតឆ័ត្រយោង។ ក្នុងដំណើរប្រព្រឹត្តទៅនៃលំហាត់ ក៏នឹងផ្ទៀងផ្ទាត់មើល សមត្ថភាព ក្រសួងសុខាភិបាល ក្រសួងកសិកម្ម ក្រសួងឧស្សាហកម្មនិងពាណិជ្ជកម្ម ស្ថាប័នរដ្ឋខាងនេសាទ ធ្វើការងាររួមគ្នា ក្នុងលក្ខណៈសង្គ្រាម។
នឹងទទួលការផ្ទៀងផ្ទាត់មើល គឺ ការបំពេញដោយអភិបាល នៃខេត្ត៤ ក្នុងតំបន់ស៊ីបេរី ដែលស្ថិតក្នុងយោធភូមិកណ្តាលនោះ។ ជាការកត់សម្គាល់ យោធភូមិនៃភាគកណ្តាលប្រទេសរុស្ស៊ី គឺលាតសន្ធឹងតាមដង ទន្លេវ៉ុលហ្កា តាមតំបន់ស៊ីបេរី និង តាម ជួរភ្នំអួរ៉ាល់ ជួរភ្នំដែលខ័ណ្ឌដែនដីរុស្ស៊ីនៅទ្វីបអឺរ៉ុប ពី ដែនដីរុស្ស៊ីនៅ ទ្វីបអាស៊ី។ គិតជាតួលេខ យោធភូមិនៃភាគកណ្តាលប្រទេសរុស្ស៊ី ស្ថិតនៅលើដែនដី មានផ្ទៃ ក្រឡា ៧លាន៦ម៉ឺនគ.ម.ការ៉េ ឬ ជាង៤០% នៃដែនដីរុស្ស៊ី និងរស់នៅដោយ បណ្តាជន ៥៤លាន៩សែននាក់ ឬ ៣៩% នៃបណ្តាជនទូទាំងប្រទេសរុស្ស៊ី។
សហព័ន្ធរុស្ស៊ី ចាប់ពីថ្ងៃទី១ធ្នូឆ្នាំ២០១០មក បែងចែក ជាយោធភូមិ៤ គឺ យោធភូមិបស្ចិម យោធភូមិទក្សិណ យោធភូមិកណ្តាល យោធភូមិបូព៌ា។ ប្រាកដណាស់ ដែលការផ្ទៀងផ្ទាត់នេះ គឺជាការប្រុងជើងការ ទល់នឹង លំហាត់ជារឿយៗ ធ្វើដោយកងទ័ពអូតង់ នៅតាមព្រំដែនខាងលិចនិងខាងត្បូង របស់រុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ