ភពProxima B ស្រដៀងនឹងភពផែនដី ហើយអាចហ៊ុំព័ទ្ធទៅដោយមហាសមុទ្រ
កាលពីចុងខែសីហាកន្លងទៅ អ្នកវិទ្យាសាស្ត្របានស្រាវជ្រាវរកឃើញភពមួយ ដែលនៅមិនឆ្ងាយពីប្រព័ន្ធព្រះអាទិត្យ ហើយដែលមានទំហំប្រហាក់ប្រហែលនឹងភពផែនដីយើង ដែលមានឈ្មោះថាភព Proxima B។ នៅថ្ងៃព្រហស្បតិ៍ ម្សិលមិញ អ្នកវិទ្យាសាស្ត្របារាំង បានចេញរបាយការណ៍សន្និដ្ឋានបថមថា ភព Proxima B នេះអាចហ៊ុំព័ទ្ធទៅដោយមហាសមុទ្រ ដែលនេះជាកត្តាចាំបាច់បំផុត ក្នុងការអនុញ្ញាតិឲ្យមានទំរង់ជីវិតរស់ណាមួយ នៅទីនោះ។
ចុះផ្សាយនៅថ្ងៃ៖
ស្តាប់ - ០២:៣៤
គិតមកត្រឹមថ្ងៃនេះ ភពក្រៅដែលស្ថិតនៅក្រៅប្រព័ន្ធព្រះអាទិត្យយើង ត្រូវបានអ្នកវិទ្យាសាស្រ្តស្រាវជ្រាវរកឃើញ ចំនួនជាង៣ពាន់ភពហើយ។ ភពក្រៅចុងក្រោយគេ ដែលទើបតែរកឃើញគឺភព Proxima B ដែលត្រូវបានប្រកាសកាលពីថ្ងៃទី២៤ សីហា។ រកឃើញចុងក្រោយគេ ហើយភពនេះ មានលក្ខណៈពិសេសច្រើន ដែលកំពុងបណ្តាលចិត្តអ្នកវិទ្យាសាស្ត្រ ឲ្យផ្តោតការចាប់អារម្មណ៍ជាពន្លឹក។
ទីមួយគឺភពនេះ វិលជុំវិញក្នុងចំងាយប្រមាណជា៤លាន២សែនឆ្នាំពន្លឺពីផ្កាយមួយដួង ឈ្មោះថា Proxima du Centaure ដែលផ្កាយនេះ ជាផ្កាយដែលស្ថិតនៅក្បែរប្រព័ន្ធព្រះអាទិត្យយើងជាងគេ។ ចំណុចពិសេសមួយទៀត គឺភព Proxima B ស្ថិតក្នុងតំបន់មួយ ដែលមានអំណោចផលអាចឲ្យមានជីវិតរស់នៅលើនោះបាន។
ក្រុមអ្នកវិទ្យាសាស្ត្របារាំងនៃមជ្ឈមណ្ឌលស្រាវជ្រាវវិទ្យាសាស្ត្រ CNRS ដោយរួមសហការជាមួយមន្ទីរពិសោធន៍តារាសាស្ត្រ នៃសកលវិទ្យាល័យបារាំង Aix/Marseille បានបង្ហើបប្រាប់ថា បើតាមការសន្និដ្ឋាន នៅលើភព Proxima B នេះអាចមានហ៊ុំព័ទ្ធទៅដោយមហាសមុទ្រ។ វត្ថុធាតុរាវ រឺទឹកនេះ គឺជាធាតុដ៏ចាំបាច់បំផុតសម្រាប់ទ្រទ្រង់ជីវិត។ បើសិននេះជាការពិតមែន មានន័យថានៅលើនោះ អាចមានជីវិតរស់នៅ។
តាមការឲ្យដឹង អ្នកវិទ្យាសាស្ត្របារាំង កំពុងធ្វើការវិភាគវាស់វែង ប្រវែងកាំនៃភព Proxima B នេះ ហើយដោយលើកយកអំណះអំណាងពីរផ្សេងគ្នា។ ទីមួយ បើសិនជាភពនេះ មានកាំប្រវែងយ៉ាងតិចប្រមាណជា៥៩៩០គីឡូម៉ែត្រ គឺមានន័យថាម៉ាសនៃភពនោះ នឹងពេញទៅដោយលោហៈធាតុ សឹងតែ២ភាគ៣។ ក្នុងករណីនេះនៅស្រទាប់លើអាចមានស្រោបដោយផែនថ្ម ហើយអាចនឹងមានទឹកមួយផ្នែក ក៏ថាបាន។ ករណីនេះគឺវាប្រហាក់ប្រហែលនឹងភពផែនដីយើង ដែលមានកាំប្រវែង ៦៣៧១គីឡូម៉ែត្រ ហើយដែលមានផែនទឹកនៅស្រោបពីលើប្រមាណតែ០,០៥% នៃម៉ាសសរុប។
ចំណែកការសន្និដ្ឋានទីពីរ គឺភព Proxima B អាចមានកាំប្រវែងវែងបំផុត៨៩២០គីឡូម៉ែត្រ។ ក្នុងករណីនេះគឺម៉ាសរបស់វា៥០% អាចជាស្រទាប់ថ្ម ហើយ៥០%ទៀត គឺជាទឹកទាំងអស់។ មានន័យថា ផ្ទៃទឹកដែលមានជំរៅប្រមាណ២០០គីឡូម៉ែត្រ គឺអាចនៅរុំជុំវិញភពនេះ។
យោងតាមរបាយការណ៍របស់អ្នកវិទ្យាសាស្ត្រ ទោះក្នុងករណីណាក៏ដោយ ឲ្យតែមានទឹក គឺនៅជុំវិញបរិយាកាសនៃភពនោះ ប្រាកដជាមានស្រទាប់ឧស្ម័នដូចនៅលើភពផែនដីយើងអញ្ចឹង។ ដូច្នេះ ធាតុផ្សំទាំងនេះ នឹងញ៉ាំងឲ្យភពនេះ អាចជាភពដែលមានទំរង់ជីវិតរស់នៅបាន។
អ្នកស្រាវជ្រាវអវកាស កំពុងសិក្សា ក្នុងការបញ្ជូនយានស្ទង់ទិន្ន័យពិសេស ទៅសំចតលើនោះ ដើម្បីស្រាវជ្រាវឲ្យបានច្បាស់។ របាយការណ៍លំអិត នៃការស្រាវជ្រាវរបស់អ្នកវិទ្យាសាស្ត្របារាំង នឹងមានចុះផ្សាយក្នុងពេលដ៏ឆាប់ខាងមុខ នៅក្នុងទស្សនាវត្តីវិទ្យាសាស្ត្រ The Astrophysical Journal Letters៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ