កាសែតរុស្ស៊ីនំាគ្នាចាប់អារម្មណ៍ពីចំហាយនៃឃាតកម្មរូបមេបក្សប្រឆាំង គឺលោកបូរិស ញ៉េមសូវ
ចេញផ្សាយនេះ ពីព្រោះថ្ងៃសៅរ៍ និងថ្ងៃអាទិត្យកន្លងទៅ បន្ទាប់ពីឃាតកម្មភ្លាម សម្រាប់កាសែតរុស្ស៊ីភាគច្រើនដាច់ខាត ជាថ្ងៃឈប់ ទើបថ្ងៃចន្ទនេះ កាសែតនាំគ្នាចេញផ្សាយដូចធម្មតាវិញ ហើយជាពិសេស ថ្ងៃអាទិត្យម្សិលមិញក្នុងរដ្ឋធានីម៉ូស្គូមានប្រព្រឹត្តទៅ ក្បួនយាត្រាយ៉ាងគគ្រឹកគគ្រេងរំលឹកវិញ្ញាណក្ខន្ធលោកញ៉េមសូវដែលធ្លាប់ធ្វើជាអភិបាលខេត្ត និងឧបនាយករដ្ឋមន្ត្រី។
ចុះផ្សាយនៅថ្ងៃ៖
ស្តាប់ - ០២:១៩
តាមកាសែត Kommersant របស់មជ្ឈដ្ឋានធុរកិច្ច ឃាតកម្មលោកបូរិស ញ៉េមសូវញ៉ាំងឲ្យកើតឡើងជាប្រតិកម្មវិសាមញ្ញខុសពីធម្មតា សមនឹងជាន់ថ្នាក់ឥស្សរជននេះ ដោយចាត់ទុកមរណភាពគាត់ថាជា មរណភាពអ្នកនយោបាយ។ កាសែតភាគច្រើនកត់សម្គាល់ថា ក្នុងក្បួនយាត្រាថ្ងៃអាទិត្យម្សិលមិញ រំលឹកវិញ្ញណក្ខន្ធគាត់ យោងលើសម្តីអ្នកចាត់ចែង មានមនុស្សចូលរួមដល់ទៅ ៧ម៉ឺននាក់ ក្បួនដែលបន្លាយទៅប្រវែង ជាង២គ.ម.ហូរតាមសង្កាត់បេះដូងរដ្ឋធានីតែម្តង រំលឹកឲ្យឃើញពីមហាបាតុកម្មភ្លូកទឹកភ្លូកដីកាលពីឆ្នាំ២០១១ និង ២០១២ ប្រឆាំងនឹងលោកប្រធានាធិបតីពូទីន។
ក្បួនយាត្រានោះបានជ្រោងលើកឡើងនូវផ្ទាំងរូបថតលោកបូរិស ញ៉េមសូវអមទៅដោយបដាសរសេរពាក្យស្លោក បែបយ៉ាង លោកញ៉េមសូវ ស្លាប់ដើម្បីអនាគតប្រទេសជាតិ គាត់បានតស៊ូដើម្បីសេរីភាពប្រទេសរុស្ស៊ី តាមពិត វីរបុរសមិនចេះស្លាប់ទេ។ ក្បួនយាត្រាបានស្នើសាលាក្រុងម៉ូស្គូឲ្យប្រែឈ្មោះស្ពាន ជាទីដែលគាត់ត្រូវបានឃាតករផ្តាច់ជីវិតទៅជាស្ពានឈ្មោះញ៉េមសូវ។ តាមព្យាករណ៍កាសែតហិរញ្ញវត្ថុ Vedomosti ឃាតកម្មលោកញ៉េមសូវក្លាយជាព្រំដែនចិត្តសាស្ត្រប្រែប្រទេសរុស្ស៊ីឲ្យលែងមានមុខមាត់ដូចមុនទៀតឡើយ ដ្បិតបាតុករជាច្រើននាំគ្នានិយាយថា ក្រោយពីឃាតកម្មនេះ គេភ្ញាក់ពីដំណេក គឺក្នុងប្រទេសមួយផ្សេងស្រឡះ ម៉្លោះហើយបានជាគេហៅក្បួនយាត្រានោះ ថាជាក្បួនយាត្រាជំនះលើការភិតភ័យ។
កាសែតប្រជាប្រិយ Komsomolckaya Pravda ចោទជាសំណួរថា តើពីក្នុងចំណោមយើង នរណាមួយដែលហ៊ានបាញ់សម្លាប់ដោយមកពីមូលហេតុនយោបាយសុទ្ធសាធ? យើងមិនមែនស្ថិតក្នុងប្រទេសអ៊ុយក្រែនឯណា។ គេបាញ់ គឺដើម្បីលុយ។ ដើម្បីនយោបាយ គេមិនបាញ់ទេ។ តាមកាសែតប្រឆាំង Novaya Gazeta គឺមិនអាស្រ័យនឹងលទ្ធផលនៃការស៊ើបអង្កេតឡើយ ឃាតកម្មលោកញ៉េមសូវ ជាស្ពានរបត់ឥតត្រឡប់ក្រោយ ច្រានប្រទេសរុស្ស៊ីឲ្យផុងខ្លួនក្នុងអស្ថិភាពនយោបាយដែលផលប៉ះពាល់របស់វា នៅមិនអាចត្រូវគេស្មានឃើញឡើយ។
គួរបញ្ជាក់ថា ចំពេលដែលការស៊ើបអង្កេតកំពុងបន្តធ្វើ អាជ្ញាធររុស្ស៊ីទើបបានប្រកាសប្រគល់រង្វាន់ជាប្រាក់ចំនួន ៣លានរូប្ល ឬស្មើនឹងជាង ៤ម៉ឺន ៨ពាន់ដុល្លារដល់ជនណាដែលអាចផ្តល់ព័ត៌មាននាំទៅកាន់ការចាប់ខ្លួនឃាតករសម្លាប់លោកញ៉េមសូវ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ