អ៊ុយក្រែនដង្ហើយសុំជំនួយហិរញ្ញវត្ថុបន្ថែម
នាយករដ្ឋមន្ត្រីអ៊ុយក្រែន លោក អាសេនី យ៉ាសេនូក (Arseni Iatseniouk) បានប្រកាសទាមទារនៅថ្ងៃព្រហស្បតិ៍ទី ១១ ធ្នូនេះ រៀបចំសន្និសីទអន្តរជាតិនៃក្រុមប្រទេសអ្នកផ្តល់ជំនួយ ដើម្បីស្វែងរកជំនួយហិរញ្ញវត្ថុបន្ថែម មកជួយស្រោចស្រង់អ៊ុយក្រែន ពីការក្ស័យធន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៨
ដើម្បីអាចត្រដររស់ និងបញ្ចៀសការក្ស័យធន អ៊ុយក្រែនចង់បានសន្និសីទអន្តរជាតិនៃក្រុមប្រទេសអ្នកផ្តល់ជំនួយ ដើម្បីអនុម័តផែនការផ្តល់សន្ទុះដល់សេដ្ឋកិច្ចអ៊ុយក្រែន និងផែនការផ្តល់ជំនួយពីសំណាក់ក្រុមបស្ចឹមលោក! នេះជាប្រសាសន៍របស់លោកនាយករដ្ឋមន្ត្រី ទៅកាន់អង្គសភាអ៊ុយក្រែនដែលទើបបោះឆ្នោតអនុម័តលើផែនការកំណែទម្រង់ជាតិស៊ីជម្រៅ លើប្រព័ន្ធពន្ធដារ ដំឡើងតម្លៃថាមពល និងធ្វើឯកជនភាវូបនីកម្មក្រុមហ៊ុនរដ្ឋ ស្របតាមការចង់បានរបស់អង្គការមូលនិធិរូបិយវត្ថុអន្តរជាតិ (IMF)។
ជាមួយនឹងកំណែទម្រង់នេះ អ៊ុយក្រែន អាចទទួលបានមកវិញនូវប្រាក់ជំនួយសរុប ២៧ពាន់លានដុល្លារ ពីមូលនិធិរូបិយវត្ថុអន្តរជាតិផង ពីធនាគារពិភពលោកផង ប៉ុន្តែទំហំទឹកប្រាក់ជំនួយដ៏សន្ធឹកសន្ធាប់នេះ នៅតែមិនគ្រប់គ្រាន់សម្រាប់អ៊ុយក្រែនដដែល។ កាលពីថ្ងៃពុធ រដ្ឋមន្ត្រីក្រសួងសេដ្ឋកិច្ចអ៊ុយក្រែន បានទទូចឱ្យIMF ពង្រីកកញ្ចប់ថវិកាជំនួយបន្ថែម១៧ពាន់លានដុល្លារទៀត ព្រោះទស្សនវិស័យសេដ្ឋកិច្ចអ៊ុយក្រែនធ្លាក់ដុនដាបខ្លាំងណាស់ មិនអាចត្រដររស់បានជាមួយនឹងកញ្ចប់ថវិកាដំបូងទេ។
អាជ្ញាធរក្រុងគៀវ ត្រូវប្រឈមមុខនឹងវិបត្តិនៅភាគខាងកើតប្រទេស តាំងពីខែមេសាមក អ៊ុយក្រែនត្រូវចំណាយច្រើនក្នុងសង្គ្រាម បាត់បង់ចំណូលពីឧស្សាហកម្មនៅតំបន់កាន់កាប់ដោយក្រុមឧទ្ទាម ត្រូវសងបំណុលអស់រាប់លានទៅរុស្ស៊ីសម្រាប់ថ្លៃឧស្ម័ន។
ក៏ប៉ុន្តែសម្រាប់បក្សប្រឆាំងវិញ កម្មវិធីកំណែទម្រង់នេះ គឺជារឹតត្បិតថវិកាដែលប៉ះពាល់ខ្លាំងដល់ផ្នែកជំនួយសង្គម។ មានន័យថា ប្រជាជនអ៊ុយក្រែនធ្លាក់ក្រមួយដំណាក់ទៀតជាមួយនឹងកំណែទម្រង់របស់រដ្ឋាភិបាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ