វិបត្តិអ៊ុយក្រែន ៖ សហភាពអឺរ៉ុបប្រជុំគ្នារកវិធីលួងលោកពូទីនឱ្យចូលតុចរចា
សហភាពអឺរ៉ុបបានសម្រេចចិត្តនៅថ្ងៃចន្ទទី ១៧ វិច្ឆិកា ២០១៤ នេះ ពង្រីកទណ្ឌកម្ម ប្រឆាំងនឹងក្រុមមេដឹកនាំចង់ផ្តាច់ទឹកដីនៅភាគខាងកើតអ៊ុយក្រែន ប៉ុន្តែទន្ទឹមគ្នានេះ ក៏កំពុងស្វែងរកជាពិសេសមធ្យោបាយនាំលោក វ្លាឌីមៀពូទីន ឱ្យសុខចិត្តវិលមកអង្គុយក្នុងតុចរចារួមគ្នា ដើម្បីដោះស្រាយវិបត្តិឱ្យអ៊ុយក្រែន។ នេះបើតាមការគូសបញ្ជាក់របស់ប្រមុខការទូតសហភាពអឺរ៉ុប លោក Fererica Mogherini ដែលបានជួបប្រជុំជាមួយរដ្ឋមន្ត្រីការបរទេសនៃរដ្ឋជាសមាជិក។
ចុះផ្សាយនៅថ្ងៃ៖
ស្តាប់ - ០១:៥៧
ទណ្ឌកម្មថ្មីរបស់សហភាពអឺរ៉ុប គឺគ្មានអ្វីក្រៅអំពីការផ្អាប់ទ្រព្យធន និងហាមប្រាមការធ្វើដំណើរ ដោយមិនផ្តល់ទិដ្ឋាការឱ្យបុគ្គលជាបក្សពួកស្និទ្ធនឹងមេដឹកនាំជាន់ខ្ពស់នៃក្រុមបះបោរស្និទ្ធនឹងរុស្ស៊ី នៅភាគខាងកើតប្រទេសអ៊ុយក្រែនឡើយ។ គិតមកទល់នឹងពេលនេះ មានអ្នកទទួលខុសត្រូវនៅភាគខាងកើតអ៊ុយក្រែន និងអ្នកទទួលខុសត្រូវរុស្ស៊ី ១១៩នាក់ ដែលជាប់ទណ្ឌកម្មរបស់សហភាពអឺរ៉ុប។ ចំនួននេះនឹងអាចកើនឡើងបន្ថែមទៀត ប្រសិនបើសហភាពសម្រេចចិត្ត នៅចុងខែ។
ប៉ុន្តែការពង្រីកទណ្ឌកម្មនេះ គ្មានកម្មវត្ថុធ្វើបាបភាគីណាម្នាក់ទេ តែត្រូវបានប្រើជាឧបករណ៍សម្រាប់ស្វែងរកដំណោះស្រាយ និងមានប្រយោជន៍ពីរយ៉ាង ៖ ទីមួយអាចជំរុញឱ្យរដ្ឋាភិបាលអ៊ុយក្រែនបន្តធ្វើកំណែទម្រង់ និងទីពីរដើម្បីផ្តល់សន្ទុះថ្មីដល់ការចរចាជាមួយនឹងរុស្ស៊ី។
ស្ថានភាពនៅភាគខាងកើតអ៊ុយក្រែនធ្លាក់ចុះដុនដាបយ៉ាងខ្លាំង។ ក្រោយការបោះឆ្នោតនៅថ្ងៃទី ២វិច្ឆិកា ដែលលោកខាងលិចមិនទទួលស្គាល់ ការប្រយុទ្ធគ្នាមានសន្ធឹកកាន់តែខ្លាំង។ ក្នុងរយៈពេលតែ២៤ម៉ោងចុងក្រោយនេះអំពើហិង្សានិងការវាយប្រហារគ្នាផ្តាច់ជីវិតទាហាន៦នាក់ និងប៉ូលិសអ៊ុយក្រែនបីនាក់។ បស្ចឹមលោកចោទម៉ូស្គូថាបានបញ្ជូនកម្លាំងនិងអាវុធយុទ្ធភណ្ឌដល់ពួកបះបោរ ឯរុស្ស៊ីបដិសេធ។ ដូច្នេះទាមទារចាំបាច់ត្រូវមានការចរចា ទើបអាចដោះស្រាយជម្លោះនេះបាន។
ក្នុងដំណាក់កាលនេះ សហភាពអឺរ៉ុបមិនទាន់និយាយអំពីទណ្ឌកម្មសេដ្ឋកិច្ចទេ។ ប្រធានបទនេះអាចនឹងត្រូវលើកពិភាក្សានាឱកាសជំនួបកំពូលអឺរ៉ុប គ្រោងធ្វើនៅខែធ្នូខាងមុខ។ សហភាពអឺរ៉ុប បានដាក់ទណ្ឌកម្មសេដ្ឋកិច្ចលើរុស្ស៊ីរួចហើយ ពីបទបានចូលជ្រៀតជ្រែងក្នុងវិបត្តិអ៊ុយក្រែន តាមរយៈការហាមឃាត់ធនាគារ ក្រុមហ៊ុនធំៗក្នុងវិស័យការពារជាតិ ថាមពលប្រេង មិនឱ្យមានទំនាក់ទំនងហិរញ្ញវត្ថុជាមួយអឺរ៉ុប។ វិធានការនេះ បានដាក់ឡើងនៅខែកក្កដា និងកញ្ញា ដែលបានធ្វើសេដ្ឋកិច្ចរុស្ស៊ីជួបការលំបាកខ្លាំង ប៉ុន្តែមិនបានធ្វើឱ្យលោកពូទីន ប្តូរឥរិយាបថអ្វីទេ។
ក្នុងពេលដែលសហភាពអឺរ៉ុបជួបប្រជុំគ្នាពិភាក្សាពង្រីកទណ្ឌកម្ម ប្រធានាធិបតីរុស្ស៊ីវិញបង្កើនភាពតានតឹងយ៉ាងខ្លាំង បានបណ្តេញទូតអាល្លឺម៉ង់ ប៉ូឡូញ ចេញពីម៉ូស្គូជាបន្តបន្ទាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ